मुंबई : राज्यातील विधान परिषदेच्या मतदान काल संपले मात्र यात सर्वाधिक चर्चा झाली नाशिक पदवीधर मतदार संघाच्या (Nashik MLC Election) निवडणुकीची. नाशिकमध्ये काँग्रेसमध्ये तांबे पितापुत्रावरून (Satyjeet Tambe) कलगीतुरा रंगाला. शुभांगी पाटील (Shubhangi patil) महाविकास आघाडीच्या उमेदवार झाल्या तर सत्यजित तांबे भाजप अन् शिंदे गटाचे उमेदवार होते का? हे शेवटपर्यंत जाहीर झाले नाही. परंतु आतून मात्र तांबे यांनाच या दोन्ही पक्षांचा पाठिंबा होता.
भाजपनं आपला सस्पेन्स कायम ठेवला
नाशिक पदवीधर मतदारसंघात यंदा नाट्यमय घडामोडी बघायला मिळाल्या. या घडामोडी मतदानाच्या दिवसापर्यंत कायम होत्या. भाजपनं आपला सस्पेन्स कायम ठेवला. प्रदेशाध्यक्ष चंद्रशेखर बावनकुळे म्हणाले की, नाशिकमध्ये भाजपच्या स्थानिक नेत्यांनी सत्यजित तांबे यांना पाठिंबाचा निर्णय घ्यावा. त्यांनी जो निर्णय घेतला त्याला माझा ना नसेल, भाजपची मतं विभाजित होणार नाही, हे निश्चित, असे मत चंद्रशेखर बावनकुळे यांनी मांडले होते. त्यामुळे जाहिररित्या नाहीतर तर आतून भाजपचा सत्यजित तांबे यांना पाठिंबा होता.
भाजपमध्ये आल्यास त्यांचे स्वागतच
चंद्रशेखर बावनकुळे यांनी आता सत्यजित तांबे यांना भाजपने मदत केल्याचे मंगळवारी सांगितले. त्यामुळे निकाल चांगले असतील अशी अपेक्षा व्यक्त केली. तसेच सत्यजित तांबे भाजपमध्ये आल्यास त्यांचे स्वागतच करु, असेही त्यांनी सांगितले. म्हणजेच आता नाशिक पदवीधर मतदार संघातून तांबे विजयी झाल्यास त्यांचा भाजप प्रवेश निश्चित असल्याची चर्चा सुरु झाली आहे.
