सौजन्य - नवराष्ट्र टीम
पुणे : पुण्यातून एक मोठी बातमी समोर आली आहे. पुण्यातील काँग्रेसच्या काही पदाधिकाऱ्यांनी पक्ष सोडण्याचा निर्णय घेतला आहे. काँग्रेस युवक सरचिटणीस रोहन सुरवसे पाटील आणि त्यांच्यासोबत काही अन्य पदाधिकारी व कार्यकर्ते लवकरच अजित पवार यांच्या राष्ट्रवादी काँग्रेस पक्षात प्रवेश करणार असल्याची माहिती मिळाली आहे. सुरवसे पाटील यांची पार्थ पवार आणि सुनील तटकरे यांच्यासोबत बैठक पार पडली आहे, अशी माहिती सुत्रांनी दिली आहे.
राजकारणात करिअर घडवण्यासाठी कार्यकर्ता आपला संपूर्ण वेळ आणि मेहनत झोकून देतो. मात्र, काही नेते कार्यकर्त्यांना मोठं होण्याची संधी देत नाहीत. याच कारणामुळे पुण्यातील काँग्रेसच्या काही पदाधिकाऱ्यांनी पक्ष सोडण्याचा निर्णय घेतला आहे. काँग्रेस युवक सरचिटणीस रोहन सुरवसे पाटील आणि त्यांच्या सोबत काही अन्य पदाधिकारी व कार्यकर्ते लवकरच अजित पवार यांच्या राष्ट्रवादी काँग्रेस पक्षात प्रवेश करणार असल्याची माहिती मिळाली आहे. अद्याप प्रवेशाची ठोस तारीख निश्चित झालेली नसली, तरी चर्चासत्रे आणि भेटीगाठींचे अंतिम टप्पे पार पडले आहेत.
कोण आहेत सुरवसे पाटील?
रोहन सुरवसे पाटील हे काँग्रेसचे आक्रमक युवा नेते म्हणून ओळखले जातात. त्यांनी विविध आंदोलनांत सक्रिय सहभाग घेतला आहे. खासदार राहुल गांधी यांनी सावरकरांबद्दल केलेल्या विधानाला समर्थन देत त्यांनी सारसबाग येथील सावरकर पुतळ्याजवळ “माफीवीर” असा बॅनर लावला होता. यानंतर त्यांना पोलिस कोठडीला सामोरे जावे लागले आणि ५० हजारांच्या जामिनावर मुक्तता मिळाली. त्यानंतरही त्यांनी काँग्रेसमध्ये सक्रिय राहून पक्षसंघटनासाठी काम केले. तथापि, अनेक वर्षे पक्षासाठी झटूनही संधी मिळत नसल्याची भावना पदाधिकारी आणि कार्यकर्त्यांमध्ये आहे. याशिवाय, शहरातील वरिष्ठ नेते संघटन कार्यात मदत करत नसल्याचा आरोप कार्यकर्त्यांकडून होत आहे. आगामी निवडणुकीच्या पार्श्वभूमीवरही काँग्रेसमध्ये जुन्याच पदाधिकाऱ्यांना संधी दिली जात आहे. या सर्व कारणांमुळे रोहन सुरवसे पाटील आणि त्यांच्या सहकाऱ्यांनी काँग्रेसला रामराम करत अजित पवार यांच्या राष्ट्रवादी काँग्रेसमध्ये प्रवेश करण्याचा निर्णय घेतला आहे.
धंगेकर शिवसेनेत जाणार?
काँग्रेसचे नेते, माजी आमदार रवींद्र धंगेकर यांची शिवसेना पक्षात प्रवेशाची चर्चा सुरू असतानाच मंत्री उदय सामंत यांनी त्यांची भेट घेतल्याने पक्षप्रवेशाच्या चर्चांना बळ मिळाले आहे. धंगेकर लवकरच शिवसेना पक्षात प्रवेश करतील, असेही सांगितले जाते. मात्र दुसरीकडे या चर्चांचे खंडन रवींद्र धंगेकर यांनी केले आहे. काँग्रेसवर नाराज असलेले रवींद्र धंगेकर यांच्या मनात पक्षबदलाचा विचार सुरू असल्याचे त्यांच्या निकटवर्तींकडून सांगितले जाते.
