Top Marathi News Today Live : 'मी कार्याध्यक्ष होणार असल्याच्या चर्चा निराधार, त्यात कोणतेही तथ्य नाही'; आदित्य ठाकरेंचे विधान
16 Apr 2026 12:45 PM (IST)
नेहरुनगर परिसरात पूर्ववैमनस्यातून एका तरुणावर आणि त्याच्या वडिलांवर जीवघेणा हल्ला करण्यात आला. ही घटना मंगळवारी (१४ एप्रिल) रात्री ११.४५ वाजण्याच्या सुमारास नेहरुनगर येथील पवार पेट्रोल पंपाशेजारील बालाजी ट्रेडर्ससमोर घडली. या प्रकरणी दानिश आरिफ शेख (१८, नेहरुनगर, पिंपरी) यांनी संत तुकाराम नगर पोलीस ठाण्यात फिर्याद दिली आहे. त्यानुसार शहाबाज उर्फ टिपू शहा (३०, नेहरुनगर, पिंपरी), इर्रशाद शहा (३२, भोसरी), सूरज उर्फ आसिफ शेख (२१, नेहरुनगर, पिंपरी) आणि रामा दुर्गाअप्पा चौधरी (२५, नेहरुनगर, पिंपरी) यांच्या विरोधात गुन्हा दाखल करण्यात आला आहे.
16 Apr 2026 12:30 PM (IST)
विद्येचे माहेरघर आणि आयटी हब म्हणून ओळखला जाणारा पुणे जिल्हा आता सायबर गुन्हेगारांच्या रडारवर आला आहे. गेल्या पाच वर्षांतील आकडेवारी पाहता, पुणे शहर, पिंपरी-चिंचवड आणि पुणे ग्रामीण या तिन्ही पोलीस दलांच्या हद्दीत सायबर चोरट्यांनी अक्षरशः धुमाकूळ घातला आहे. सुमारे १,७७५ कोटी रुपयांची लूट केली आहे. २०२६ च्या पहिल्या साडेतीन महिन्यांतच 'शेअर बाजार' आणि 'डिजिटल अरेस्ट'च्या नावाखाली शेकडो कोटी रुपये लुटले गेले आहेत.
16 Apr 2026 12:12 PM (IST)
महाराष्ट्रातील तरुणपिढीला बरबाद करणारे ड्रग्जचे विष आता मुंबई-पुणे सारख्या मोठ्या शहरातच नाही तर तालुक्यापर्यंत पोहोचलेले आहे. गुजरातच्या कांडला बंदरातून महाराष्ट्रापर्यंतच्या ड्रग्ज कॉरिडॉरमधून हे विष आपल्या राज्यात येत आहे. राजकीय आशिर्वादामुळेच ‘उडता पंजाब’ प्रमाणे ‘डुबता महाराष्ट्र’ बनवण्याचे पाप महायुतीने केले आहे. महाराष्ट्राच्या तरुणाईला बरबाद करणाऱ्या महायुती सरकारला जनता कदापी माफ करणार नाही, असा इशारा काँग्रेस प्रदेशाध्यक्ष हर्षवर्धन सपकाळ यांनी दिला आहे.
16 Apr 2026 12:00 PM (IST)
शेवाळेवाडी (म्हासोली), ता. कराड येथील अथणी शुगर्स (रयत युनिट) या साखर कारखान्याचा हंगाम यशस्वीरित्या पूर्ण झाला आहे. गळीत हंगाम २०२५-२६ मध्ये गाळप केलेल्या संपूर्ण ऊसाचे (Sugarcane News) बिल थेट शेतकऱ्यांच्या बँक खात्यावर जमा करून विश्वासार्हतेची परंपरा कायम ठेवली आहे. यामुळे शेतकऱ्यांनी आनंद आणि समाधान व्यक्त केले. उगवलेल्या सोन्यासारख्या पिकाचे योग्य भाव मिळाल्यामुळे बळीराजा सुखावला आहे.
16 Apr 2026 11:55 AM (IST)
जागतिक राजकारणातील सर्वात चर्चेत असलेली डोनाल्ड ट्रम्प आणि जॉर्जिया मेलोनी (Giorgia Meloni) यांची मैत्री आता संपुष्टात आल्याचे चित्र स्पष्ट झाले आहे. इराणविरुद्धच्या युद्धात इटलीने अमेरिकेला (America) साथ देण्यास नकार दिल्याने हे दोन्ही नेते आता एकमेकांविरुद्ध उभे ठाकले आहेत. एकेकाळी एकमेकांचे कट्टर समर्थक असलेले हे नेते आता एकमेकांवर वैयक्तिक टीका करत आहेत, ज्यामुळे पाश्चात्य देशांच्या युतीमध्ये मोठी फूट पडली आहे.
16 Apr 2026 11:50 AM (IST)
“वाचाल तर वाचाल” हा संदेश B. R. Ambedkar यांनी दिला असून, त्याचे महत्त्व आजच्या तरुण पिढीसाठी अधिक अधोरेखित होत आहे. डॉ. बाबासाहेब आंबेडकर जयंतीनिमित्त ‘नाचून मोठे होण्यापेक्षा वाचून मोठे होऊया’ या संकल्पनेतून उपविभागीय पोलिस अधिकारी प्रदीप पाटील यांनी स्पर्धा परीक्षांची तयारी करणाऱ्या विद्यार्थ्यांसाठी २०० पुस्तकांचे मोफत वाटप केले. सुमारे २८ हजार रुपयांच्या या पुस्तकांचे वितरण भीमजयंतीच्या पूर्वसंध्येला करण्यात आले.
16 Apr 2026 11:45 AM (IST)
कराड तालुक्यात लवकरच होणाऱ्या १०५ ग्रामपंचायतींच्या निवडणुकांच्या पार्श्वभूमीवर तयार करण्यात आलेल्या प्रभाग रचनांवर हरकतींचा पाऊस पडला आहे. ७ ते १३ एप्रिलदरम्यान हरकती नोंदविण्याची मुदत असताना तब्बल २८ गावांमधून ६६ हरकती दाखल झाल्याने प्रशासनासमोर मोठे आव्हान उभे राहिले आहे. आता या हरकतींवर काय निर्णय घेतला जाणार, याकडे ग्रामस्थांसह राजकीय वर्तुळाचे लक्ष लागले आहे.
16 Apr 2026 11:40 AM (IST)
जगभरातील प्रेक्षकांच्या हृदयावर अधिराज्य गाजवणारे विनोदसम्राट चार्ली चॅपलिन यांनी प्रेक्षकांना खळखळून हसवले. त्यांचे नाटक शब्द नसले तरी मनाला भावते. मूकपटांच्या काळात त्यांनी केवळ हास्य निर्माण केले नाही, तर समाजातील विषमता, गरिबी आणि मानवी वेदना अत्यंत प्रभावीपणे मांडल्या. ‘ट्रॅम्प’ या त्यांच्या व्यक्तिरेखेतून त्यांनी सामान्य माणसाचे दुःख आणि संघर्ष जिवंत केले.
16 Apr 2026 11:35 AM (IST)
यवतमाळच्या विरगव्हाण येथे आंबेडकर जयंती मिरवणुकीत नाचताना धक्का लागल्याच्या क्षुल्लक कारणावरून वाद झाला. संतापलेल्या अल्पवयीन मुलाने 15 वर्षीय लकी ढोलेवर चाकूने वार करून त्याची हत्या केली. पोलिसांनी आरोपीला ताब्यात घेतलं.
16 Apr 2026 11:30 AM (IST)
‘मी संसार माझा रेखिते’ ही मालिका अल्पावधीतच प्रेक्षकांच्या पसंतीस उतरली असून, एका स्त्रीची संसार आणि स्वप्नांमधील कसरत प्रभावीपणे दाखवण्यात आली आहे. या मालिकेत अनुप्रियाचं रेडिओ जॉकी होण्याचं स्वप्न लग्नानंतर अपूर्ण राहिलेलं दिसतं. संसाराच्या जबाबदाऱ्यांमध्ये अडकूनही तिच्या मनातील हे स्वप्न मात्र कायम जिवंत राहिलं आहे. आता मात्र अनुप्रिया धाडस दाखवत पुन्हा एकदा तिच्या स्वप्नांच्या दिशेने पाऊल टाकताना दिसणार आहे.
16 Apr 2026 11:20 AM (IST)
जागतिक अर्थव्यवस्थेची जीवनवाहिनी मानल्या जाणाऱ्या होर्मुझच्या सामुद्रधुनीतील (Strait of Hormuz) तणाव निवळण्याची चिन्हे दिसत आहेत. २८ फेब्रुवारी रोजी अमेरिका आणि इराण यांच्यात सुरू झालेल्या भीषण युद्धामुळे संपूर्ण जगाचा तेल पुरवठा विस्कळीत झाला होता. मात्र, आता इराणने एक पाऊल मागे घेत ओमानमार्गे व्यापारी जहाजांना सुरक्षित रस्ता देण्याचा प्रस्ताव मांडला आहे. या प्रस्तावामुळे गेल्या अनेक महिन्यांपासून आखातात अडकून पडलेल्या शेकडो जहाजांना आणि हजारो खलाशांना मोठा दिलासा मिळण्याची शक्यता आहे.
16 Apr 2026 11:17 AM (IST)
छत्रपती संभाजीनगरमध्ये उच्च न्यायालयाच्या वकिलाची निर्घृण हत्या उघडकीस आली. मिथुन भास्कर यांचा मृतदेह गांधेली फाट्याजवळ झुडपात आढळला. चाकूच्या वाराने त्यांचा मृत्यू झाला असून लूटमार की वैमनस्य याचा तपास सुरू आहे.
16 Apr 2026 10:10 AM (IST)
प्रधानमंत्री नरेंद मोदी यांच्या नेतृत्वाखाली 2023 मध्ये 6000 कोटी रुपयांच्या राष्ट्रीय क्वांटम मिशनची सुरुवात झाली. त्यामुळे देशाच्या क्वांटम क्षेत्रातील प्रगतीस मोठा वेग मिळाला. त्याचबरोबर, महाराष्ट्र शासनानेही या क्षेत्रात पुढाकार घेत ‘महाराष्ट्र क्वांटम टेक्नॉलॉजी मिशन’ सुरू केले असून, उद्योग-सिद्ध मनुष्यबळ तयार करण्यावर भर दिला जात आहे.
16 Apr 2026 10:00 AM (IST)
भारतीय रेल्वे महाराष्ट्र आणि कर्नाटक दरम्यान प्रवास करणाऱ्या प्रवाशांसाठी, विशेषतः पुणेकरांसाठी (Pune News) एक मोठी भेट घेऊन येत आहे. बहुप्रतिक्षित वंदे भारत स्लीपर ट्रेनला मुंबई-बंगळूरू मार्गासाठी मंजुरी देण्यात आली आहे. ही ट्रेन केवळ प्रवाशांचा वेळच वाचवणार नाही, तर लांब पल्ल्याच्या प्रवासासाठी आंतरराष्ट्रीय दर्जाचा आरामदायी अनुभवही देईल.
16 Apr 2026 09:50 AM (IST)
गेल्या वर्षभरात जम्मू आणि काश्मीरमध्ये कुठलाही मोठा दहशतवादी हल्ला करण्यात दहशतवादी संघटना अयशस्वी ठरल्या. मात्र, आता याच दहशतवादी संघटना पहलगाम हल्ल्याच्या वर्षपूर्तीनिमित्त एक मोठी घटना घडवू आणू शकतात. त्यामुळे सुरक्षा यंत्रणांकडून जम्मू-काश्मीरमध्ये हाय अलर्ट जारी करण्यात आला आहे.
गेल्या आठवड्यात पाकिस्तानी लष्कर आणि त्यांची गुप्तचर संस्था, आयएसआय यांनी अत्याधुनिक शस्त्रांनी सज्ज असलेल्या दहशतवाद्यांना भारतीय हद्दीत सुरक्षितपणे घुसखोरी करण्याचा प्रयत्न केला होता. मात्र, सुरक्षा यंत्रणांना वेळीच समजल्याने हा नियोजित हल्ला सुरक्षा दलांनी हाणून पाडला. गुप्तचर यंत्रणांच्या इशाऱ्यानंतर राज्यभरातील सुरक्षा व्यवस्थेचा आढावा घेण्यात आला असून, कोणताही दहशतवादी कट उधळून लावण्यासाठी व्यापक व्यवस्था करण्यात आली आहे.
16 Apr 2026 09:40 AM (IST)
मिरा-भाईंदर परिसरात लग्नाच्या नावाखाली फसवणूक करणाऱ्या एका धक्कादायक टोळीचा पर्दाफाश झाला आहे. हनिमूनच्या रात्रीच नवरदेवाच्या घरातील पैसे, दागिने आणि मौल्यवान वस्तू घेऊन फरार होणारी ‘चोरटी नवरी’ आणि तिचा तथाकथित बाप अखेर काशिमीरा पोलिसांच्या जाळ्यात अडकले आहेत. या बाप-लेकीच्या जोडीनं आतापर्यंत अनेकांना लग्नाच्या आमिषाने फसवून लाखोंची लूट केल्याचं तपासात उघड झालं असून, या प्रकरणामुळे परिसरात खळबळ उडाली आहे.
16 Apr 2026 09:30 AM (IST)
जागतिक राजकारणात आज एका अत्यंत संतापजनक आणि युद्धाच्या छायेने भरलेल्या पर्वाची सुरुवात झाली आहे. अमेरिकेने इराणविरुद्धच्या (US-Israel Iran War) आपल्या लष्करी मोहिमेला धार चढवत चक्क ‘सागरी नाकेबंदी’ (Naval Blockade) जाहीर केली आहे. अरबी आखात आणि ओमानच्या आखातात अमेरिकेची नौदल शक्ती आता पूर्ण ताकदीनिशी तैनात झाली असून, इराणच्या बंदरांकडे जाणारा प्रत्येक रस्ता आता अमेरिकेच्या तोफांच्या निगराणीखाली आहे. विशेष म्हणजे, अमेरिकेने इराणसोबतची शस्त्रसंधी वाढवण्यास स्पष्ट नकार देऊन थेट संघर्षाचे संकेत दिले आहेत.
Marathi Breaking News Updates : माजी मुख्यमंत्री उद्धव ठाकरे यांच्या शिवसेनेचे आमदार आणि युवासेनाप्रमुख आदित्य ठाकरे यांच्यावर लवकरच पक्षाकडून मोठी जबाबदारी सोपवली जाण्याची शक्यता आहे. सूत्रांच्या माहितीनुसार, त्यांना पक्षाच्या कार्याध्यक्षपदाची धुरा दिली जाऊ शकते. येत्या 19 जून रोजी पक्षाच्या वर्धापनदिनी हा निर्णय जाहीर होण्याची शक्यता आहे. मात्र, या सर्व वृत्तावर आदित्य ठाकरेंनी स्पष्टीकरण देत मी कार्याध्यक्ष होणार असल्याच्या अफवा असल्याचे म्हटले आहे.
यापूर्वी २००३ मध्ये उद्धव ठाकरे यांना ज्या पद्धतीने कार्याध्यक्षपद देण्यात आले होते, त्याच धर्तीवर आदित्य यांची नियुक्ती होऊ शकते, अशी चर्चा पक्षांतर्गत सुरू आहे. यासाठी लवकरच कार्यकारिणीची बैठक बोलावून प्रस्ताव मंजूर करण्याची तयारी सुरू असल्याची माहिती समोर येत आहे. गेल्या काही वर्षांत आदित्य यांनी संघटनात्मक पातळीपासून ते निवडणूक व्यवस्थापनापर्यंत अनेक महत्त्वाच्या जबाबदाऱ्या यशस्वीरित्या पार पाडल्या आहेत. त्यामुळे त्यांना अधिक अधिकार देण्याची मागणी पक्षातील काही नेत्यांकडून होत आहे. त्यांच्या नेतृत्वाखाली पक्षाला नवी उभारी मिळेल आणि नव्या पिढीचे नेतृत्व पुढे येईल, असा विश्वास व्यक्त केला जात आहे.
.png "Videos"){kind=small}
