Pune Ganesh Festival: गौरी विसर्जनानंतर पुण्यनगरीत गर्दीला उधाण; सलग सातव्या दिवशीही…

पुणे: अंगावर रोमांच उभे करणारे देखावे, मोबाईलच्या कॅमेरात ‘आनंदचित्रे’ टिपण्यासाठी उंचावलेले हात अन् सलग सातव्या दिवशीही लाडक्या गणरायाच्या दर्शनासाठी लागलेल्या रांगा.. उत्सवनगरीत रूपांतरित झालेल्या शहराच्या मध्यवर्ती पेठा बुधवारी गर्दीने गजबजल्या. घरातला सात दिवसांचा गणपती आणि गौरी विसर्जनानंतर आजूबाजूच्या परिसरातील नागरिकांनी पुण्यातील सांस्कृतिक वैभवाची अनुभूती घेतली. सायंकाळी पावसाने घेतलेल्या विश्रांतीमुळे नोकरदारवर्ग कुटुंबीयांसह बाहेर पडला, तर रोजगार-शिक्षणाच्या निमित्ताने शहरात आलेले युवक-युवतींच्या उत्साहाला उधाण आले होते. मध्यवर्ती पेठातील रस्ते वाहतुकीसाठी बंद असल्याने पर्यायी मार्गांवर काही काळ वाहतूक कोंडीही झाली होती.

पुण्याचे ग्रामदैवत असलेला कसबा गणपती आणि तांबडी जोगेश्वरी, गुरुजी तालीम, तुळशीबाग आणि केसरीवाडा या मानाच्या गणपतींचे दर्शन घेण्यासाठी भाविकांनी रांगा लावल्या होत्या. गणेश भक्तांचे श्रद्धास्थान असलेल्या श्रीमंत दगडूशेठ हलवाई गणपतीचे दर्शन घेण्यासाठी आणि मंडळाने साकारलेला केरळच्या पद्मनाभन मंदिराचा भव्य देखावा मोबाईलचा कॅमेरा टिपण्यासाठी कित्येक हात उंचावले होते. गणरायाच्या चरणी श्रीफळांचे तोरण अर्पण करण्यासाठी मोठी रांग होती. श्रीमंत भाऊसाहेब रंगारी ट्रस्टने साकारलेला रत्नमहाल, अखिल मंडई मंडळाने साकारलेला कृष्णकुंज हा देखावा गणेशभक्तांच्या डोळ्यांचे पारणे फेडत होता.

हुतात्मा बागू गेनू मंडळाचा देखावा आणि त्यासमोर होत असलेल्या गर्दीला नादब्रह्म ढोलताशा पथकाच्या स्थिर वादनाने खेळवून ठेवले होते. शनिवार पेठेतील जयहिंद मित्र मंडळाने साकारलेला आदिमाया आदिशक्ती साडेतीन शक्तिपीठांचा देखावा पाहण्यासाठी महिला भाविकांची मोठी गर्दी झाली होती. ‘वंदे मातरम्’ राष्ट्रीय गीताला दीडशे वर्षे होत असल्याचे औचित्य साधून साईनाथ मंडळ ट्रस्टने यंदा ‘वंद्य वंदे मातरम्’ हा जिवंत देखावा साकारला. त्याबरोबरच छत्रपती शिवाजी महाराजांच्या शौर्याची कहाणी सांगणारे, धार्मिक पौराणिक कथा आणि सामाजिक-राजकीय पटलावर असलेले जिवंत प्रश्न मांडणारे देखावे पाहण्यासाठी विविध गणेश मंडळासमोर लोकांनी रंग लावल्याचे चित्र होते.

Ganeshotsav 2025 : मुंबईच्या धर्तीवर पुण्यातील गणेशोत्सव; डोळ्याचे पारणे फेडणारी 22 फूटी उंच गणपती मूर्ती

मंदिरांची भव्य प्रारूपे, पौराणिक ऐतिहासिक प्रसंग आणि सामाजिक संदेश देणारे देखावे शहरातील गणेश मंडळांनी उभारले होते. चक्रवर्ती अशोक मंडळाने ‘म.. मराठीचा, म… महाराष्ट्राचा’ या देखाव्यातून मराठी भाषा जोपासण्याची जबाबदारी मराठी भाषकांची असल्याचा संदेश दिला. रामेश्वर चौक मित्रमंडळाने ‘किंग-काँग’ या सिनेमावर आधारलेल्या पर्यावरण संवर्धनाचा संदेश देणारा देखावा लहान मोठ्यांना खेळून ठेवत होता.

टिळक रस्त्यावरील विविध मंडळांनी कल्पकतेचा वापर करत आकर्षक देखावे उभे केले होते. साहित्य परिषदे शेजारी असलेल्या हत्ती गणपती मित्र मंडळाने दहीहंडीचा साकारलेला देखावा आकर्षणाचा केंद्रबिंदू होता. उंबऱ्या गणपती मित्र मंडळाने ‘छत्रपती शिवाजी महाराजांची पन्हाळ्याहून सुटका’ हा जिवंत देखावा साखरला होता. मुंजाबाचा बोळ मित्र मंडळाने संतश्रेष्ठ ज्ञानेश्वर महाराज आणि चांगदेव भेट या देखाव्याला ही भाविकांनी उत्स्फूर्त प्रतिसाद दिला. वेगवेगळ्या गणेश मंडळांकडे पायपीट करून थकलेले नागरिक क्षणभर विश्रांतीसाठी रस्त्याच्या कडेला, कमी गर्दीच्या ठिकाणी विसावत होते. खाद्यपदार्थांचा आस्वाद घेऊन, आता कुठे जायचे हे ठरवत होते.

दरम्यान, गेल्या काही वर्षातील अनुभव पाहता गणेशोत्सवातील शेवटच्या दोन दिवसात या गर्दीमध्ये अधिक वाढ होण्याची शक्यता वर्तवण्यात येत आहे.

एरवी घरातल्या चीज वस्तू, किराणामाल, सुगंधी द्रव्ये ते सजावटीच्या साहित्याच्या खरेदीसाठी गर्दीने गजबजणाऱ्या पेठांना उत्सव नगरीचे स्वरूप आले होते. खरेदीच्या दुकानांजवळ थांबणारी पाऊले दर्शनाच्या ओढीने उत्सव मंडपांकडे वळत होती. स्त्रियांच्या आभूषणांची विक्री करणाऱ्या फेरेवाल्यांनी आणि साहसी खेळ करणाऱ्यांनी गर्दीची ठिकाणी बघून तळ ठोकला होता. नारळ, दूर्वा आणि फुलांच्या खरेदीसाठी तुफान गर्दी आणि खाद्यपदार्थांमध्ये मोदकाला मोठी मागणी होत असल्याचे चित्र होते. याउलट तुळशी बागेतील कपड्यांची दुकाने भर गर्दीतही ओस पडली होती. पारंपारिक व्यावसायिकांच्या दुकानांनाही थंड प्रतिसाद मिळत होता.