Pune Metro: पुण्याची वाहतूक कोंडी सुटणार! ‘या’ मेट्रोमार्गासाठी निविदा प्रक्रिया सुरू (शेड्यूल)

पुणे: शहराच्या पूर्व भागात वाढत्या लोकसंख्येमुळे आणि वाहतूक कोंडीच्या समस्येमुळे आता मेट्रोचा विस्तार हा काळाची गरज बनला आहे. याच पार्श्वभूमीवर, महाराष्ट्र मेट्रो रेल कॉर्पोरेशन लिमिटेड (महा मेट्रो) लवकरच रामवाडी ते वाघोळी या ११.६३ किलोमीटर लांबीच्या मेट्रो मार्गिकेसाठी निविदा प्रक्रिया सुरू करणार आहे.

हा प्रस्तावित विस्तार मेट्रो लाईन २ (वानवडी-रामवाडी) चा पुढील टप्पा आहे. रामवाडीहून वाघोलीमार्गे विठ्ठलवाडीपर्यंत हा मार्ग जाणार असून, एकूण ११ स्टेशन उभारली जाण्याची योजना आहे. पूर्व पुण्यातील वाघोली परिसरातील प्रवाशांना याचा मोठा फायदा होणार आहे.

दुहेरी संरचनेचा फ्लायओव्हर

या मार्गावर महा मेट्रोकडून एक अभिनव ‘डबल डेक्कर’ फ्लायओव्हर उभारण्यात येणार आहे. म्हणजे वरच्या स्तरावर मेट्रो मार्गिका आणि खालच्या स्तरावर वाहतुकीसाठी रस्ता असेल. यामुळे जागेचा उत्तम वापर होणार असून, पुणेकरांना अखंड आणि सुरक्षित प्रवासाचा अनुभव मिळेल. तो पुणे शिरूर उन्नत रस्त्याचा भाग असेल.

Pune News: पुणेकरांचा प्रवास सुखकर होणार! राज्य शासनाने ‘या’ 2 Metro मार्गांना दिली मंजूरी

वाघोली परिसरात दररोज प्रचंड वाहनांची गर्दी होत असल्याने नागरिक त्रस्त झाले आहेत. हा मेट्रो प्रकल्प कार्यान्वित झाल्यानंतर नगर रोडवरील वाहतुकीचा ताण मोठ्या प्रमाणात कमी होईल, अशी अपेक्षा व्यक्त केली जात आहे. त्याचबरोबर शहराच्या मध्यवर्ती भागाशी पूर्व पुण्याचा संपर्क अधिक वेगवान होईल.

 महा मेट्रोने प्राथमिक आराखडे आणि तांत्रिक मंजुरी पूर्ण केली असून, टेंडर प्रक्रिया येत्या काही आठवड्यांत सुरू होणार आहे. बांधकाम सुरू झाल्यानंतर दोन ते अडीच वर्षांत हा टप्पा पूर्ण करण्याचा मानस आहे, अशी माहिती वरिष्ठ अधिकाऱ्यांनी दिली.  रामवाडी-वाघोली मेट्रो लाईनमुळे या भागातील प्रवासाचा कालावधी निम्म्यावर येईल, रोजगारनिर्मिती होईल आणि रिअल इस्टेट क्षेत्रालाही चालना मिळेल, असा विश्वास स्थानिक नागरिक आणि व्यावसायिकांनी व्यक्त केला आहे. या विस्तारामुळे पुणे मेट्रोच्या लाईन २ ची एकूण लांबी २८.४५ किलोमीटरवर जाणार असून, एकूण २९ स्टेशन तयार होतील. यामुळे पूर्व-पश्चिम पुणे जोडणारा हा मेट्रो मार्ग शहराच्या वाहतुकीच्या नकाशावर एक महत्त्वाचा टप्पा ठरणार आहे.