KDMC हद्दीत आठ अनधिकृत प्राथमिक शाळा, टिटवाळ्यामध्ये सर्वाधिक अनधिकृत शाळांची संख्या; पालिकेच्या सर्वेक्षणात उघड (फोटो सौजन्य-X)
kalyan dombivli illegal schools : कल्याण डोंबिवली महापालिकेच्या शिक्षण विभागाने पालकांसाठी गंभीर इशारा दिला आहे. महापालिका हद्दीतील आठ प्राथमिक शाळा बेकायदेशीरपणे सुरू असल्याचे तपासणीत उघड झाले आहे. या शाळांमध्ये विद्यार्थ्यांचा प्रवेश घेऊ नये, असे आवाहन महापालिकेने केले असून, सर्वाधिक सात शाळा टिटवाळा परिसरातील आहेत.
मार्च महिन्यापासून शाळांमध्ये नव्या शैक्षणिक वर्षाची प्रवेश प्रक्रिया सुरू होत असते. याच पार्श्वभूमीवर कल्याण डोंबिवली महापालिकेच्या शिक्षण विभागाने तपासणी मोहीम राबवली. या मोहिमेत आठ प्राथमिक शाळा शासकीय परवानगीशिवाय सुरू असल्याचे स्पष्ट झाले आहे.या शाळांनी कोणतीही शासकीय मान्यता घेतलेली नसून, पालकांनी आपल्या मुलांचा प्रवेश या शाळांमध्ये घेऊ नये, असे आवाहन पालिकेचे उपआयुक्त संजय जाधव यांनी केले आहे. महत्त्वाचे म्हणजे या शाळांतील विद्यार्थ्यांचे जवळच्या मान्यताप्राप्त शाळांमध्ये समायोजन करण्यात येणार आहे. तसेच पालिकेची ही मोहीम अशीच सुरू राहणार असून यानंतर ही अशा शाळा निदर्शनास आल्या तर त्यांच्यावर देखील कारवाईचा इशार पालिकेने दिला आहे.
एल.बी.एस. इंग्लिश स्कुल, बल्याणी टिटवाळा
सनराईज स्कुल, बल्याणी टिटवाळा
संकल्प इंग्लिश स्कुल, बल्याणी टिटवाळा
पूर्ण प्रज्ञा इंग्लिश स्कुल, बल्याणी टिटवाळा
पोलारिस कॉन्व्हेन्ट स्कुल, बल्याणी टिटवाळा
डी.बी.एस. इंग्लिश स्कुल, आंबिवली पश्चिम
ऑक्सफर्ड इंग्लिश स्कुल, आंबिवली पश्चिम
बुद्धीस्ट इंटरनॅशनल स्कुल, महाराष्ट्र नगर, डोंबिवली पश्चिम
दरम्यान, सर्वाधिक अनधिकृत प्राथमिक शाळा टिटवाळा परिसरात असल्याचे पालिका शिक्षण विभागाच्या निदर्शनास आले आहे. शिक्षण विभागाचा अनुभव असलेले काही जाणकार मंडळी शासनस्तरावर शाळा सुरू करण्याची परवानगी मिळाली नाही की आपल्या भागात शासन मान्यतेविना शाळा सुरू करतात. त्यानंतर ते शाळा मान्यतेसाठी प्रयत्न करतात, असे शासनाच्या निदर्शनास आले आहे.
