सोमवार, 22 जून 2026
वर्धनगड : पुसेगाव ता.खटाव येथील प पू श्री सेवागिरी महाराजांच्या ७६ व्या पुण्यस्मरणानिमित्त आयोजित करण्यात आलेल्या वार्षिक यात्रेची सुरुवात पालखी व मानाचा झेंड्याच्या भव्य मिरवणूकीने, “श्री सेवागिरी महाराज की जय” च्या जयघोषात, ढोल-ताशा, लेझीम, बँडपथक, तुतारी व झांजपथक , यांच्या निनादात मोठ्या भक्तिमय व उत्साही वातावरणात झाली.
शनिवार दि ६ ते १६ जानेवारी या कालावधीत येथील शासकीय विद्यानिकेतनच्या परिसरात व सातारा पंढरपुर रस्त्याच्या दुतर्फा यात्रा भरण्यास सुरूवात झाली आहे. या यात्रेस महाराष्ट्र, उत्तर कर्नाटक, गुजरात व आंध‘ प्रदेशसह इतर राज्यांतून नऊ ते दहा लाख भाविक मोठ्या संख्येने येतात.
श्री सेवागिरी देवस्थानचे मठाधिपती परमपूज्य श्री सुंदरगिरी महाराज, आ महेश शिंदे, पुसेगावचे सहायक पोलीस निरीक्षक आशिष कांबळे, ट्रस्टचे चेअरमन रणधीर जाधव विश्वस्त डॉ सुरेश जाधव, संतोष उर्फ बाळासाहेब जाधव, संतोष वाघ, सचिन देशमुख, गौरव जाधव यांच्या हस्ते सकाळी ९ वाजता मानाचा झेंडा व श्री सेवागिरी महाराजांच्या पालखीचे विधिवत पूजन करण्यात आले. यावेळी ग्रामस्थ व भाविक मोठ्या संख्येने उपस्थितीत होते. पूजनानंतर झेंडा व पालखीच्या मिरवणूकीला मंदीरापासून सुरुवात झाली. भाविक-भक्त व ग्रामस्थांनी जागोजागी मानाचा झेंडा व पालखीचे मनोभावे दर्शन घेत श्री सेवागिरी महाराज की जय च्या घोषणा दिल्या.
मुख्य बाजारपेठेतून निघालेल्या परमपूज्य श्री सेवागिरी महाराजांच्या मानाचा झेंडा व पालखीच्या मिरवणूकीसमोर श्री हनुमानगिरी हायस्कूल व ज्युनिअर कॉलेज श्री सेवागिरी विद्यालय, कला वाणिज्य महाविद्यालय, इंदिरा गांधी कन्या प्रशाला, जिल्हा परिषद प्राथमिक शाळा, इंग्लिश मिडीयम स्कूल, या शाळांचे विद्यार्थी, झांजपथक व लेझीमपथके सहभागी झाले होते. विद्यार्थ्यांनी आकर्षक पोशाख परिधान करुन लेझीम, झांजपथक, सामाजिक देखावे लक्षवेधक ठरले.
मिरवणुकी नंतर मानाचा झेंडयाची यात्रा स्थळावर प्रतिष्ठापना करण्यात आली.
