(फोटो सौजन्य - इन्स्टाग्राम)
याआधी यशच्या ‘टॉक्सिक’ची टक्कर ‘धुरंधर 2’सोबत होणार होती, मात्र मेकर्सनी शेवटच्या क्षणी हा चित्रपट 4 जूनपर्यंत पुढे ढकलला. आता मोहनलाल यांचा ‘दृश्यम ३’ हाही पुढे ढकलला जाण्याची शक्यता वर्तवली जात आहे. 3 एप्रिल 2026 रोजी रिलीज होणारा हा क्राइम थ्रिलर चित्रपटही लांबणीवर जाणार असल्याचे समोर येत आहे. यामागील कारणही ‘टॉक्सिक’प्रमाणेच असल्याचे सांगितले जात आहे. खाडी देशांमधील वाढता संघर्ष आणि युद्धजन्य परिस्थितीमुळे ओव्हरसीज बिझनेसवर परिणाम होण्याची भीती व्यक्त केली जात आहे.
लेखक-दिग्दर्शक जीथू जोसेफ यांच्या ‘दृश्यम 3’ हा 2013 पासून सुरू झालेल्या ‘दृश्यम’ फ्रँचायझीचा तिसरा भाग आहे. याआधी 2021 मध्ये ‘दृश्यम 2’ प्रदर्शित झाला होता. विशेष म्हणजे, यावेळी मूळ मलयाळम चित्रपट हिंदीसह इतर भारतीय भाषांमध्येही प्रदर्शित होणार आहे. दरम्यान, अजय देवगण यांचाही ‘दृश्यम 3’ वेगळ्या कथेसह 2 ऑक्टोबर 2026 रोजी प्रदर्शित होणार असल्याची चर्चा आहे.
हिंदीत विजय साळगावकर, मल्याळममध्ये जॉर्जकुट्टी
एकूणच, यावेळी प्रेक्षकांना हिंदीत विजय सालगावकर आणि मलयाळममध्ये जॉर्जकुट्टी यांच्या दोन वेगळ्या कथा पाहायला मिळणार आहेत. सध्या उपलब्ध माहितीनुसार, इराणवर अमेरिका आणि इस्रायलच्या हल्ल्यांमुळे खाडी देशांमध्ये तणावाचे वातावरण निर्माण झाले आहे. भारतीय चित्रपटांसाठी UAE हा मोठा बाजार असल्यामुळे या परिस्थितीचा ओव्हरसीज कमाईवर परिणाम होण्याची शक्यता आहे. याच पार्श्वभूमीवर ‘टॉक्सिक’ प्रमाणेच ‘दृश्यम 3’ची रिलीज पुढे ढकलण्याचा विचार सुरू असून, याबाबत लवकरच अधिकृत घोषणा होण्याची शक्यता आहे.
सॅकनिल्कच्या अहवालानुसार, जीथू जोसेफ आणि त्यांची टीम ‘दृश्यम 3’चा मोठ्या स्तरावर जागतिक प्रदर्शन करण्याचा विचार करत आहेत. मध्यपूर्वेतील वाढत्या संघर्षाच्या पार्श्वभूमीवर त्याचा चित्रपटाच्या कमाईवर होणाऱ्या परिणामाची त्यांना जाणीव आहे. तणाव वाढत असल्यामुळे खाडी देशांमध्ये भारतीय चित्रपटांच्या व्यवसायावर नकारात्मक परिणाम दिसून येत आहे. अशा परिस्थितीत मोहनलाल यांनाही याबाबत चिंता वाटत आहे, कारण परदेशात त्यांची मोठी फॅन फॉलोइंग आहे. विशेषतः ‘दृश्यम’ फ्रँचायझीच्या या पुढील भागाबद्दल प्रेक्षकांमध्ये प्रचंड उत्सुकता पाहायला मिळत आहे.
“दृश्यम ३” मध्ये झळकणार हे कलाकार
“दृश्यम ३” साठी मोहनलाल यांच्यासोबत मीना, अंसिबा हसन, एस्थर अनिल आणि सिद्दीक परत येत आहेत. चित्रपटाची कथा जीतू जोसेफ यांनी लिहिली असून, आशिर्वाद सिनेमाजच्या बॅनरखाली अँटनी पेरुंबावूर यांनी निर्मिती केली आहे. कॅनडा आणि अमेरिकेत वितरणासाठी १० कोटी रुपयांचा करार आधीच झाला आहे, यावरून प्रेक्षकांचा चित्रपटाबद्दलचा उत्साह दिसून येतो आहे.
