MAGA Heir : जेडी व्हान्स लवकरच होणार अमेरिकेचे राष्ट्राध्यक्ष? ट्रम्पच्या प्रकृतीवरून चर्चांना उधाण; उपाध्यक्षांचे मोठे विधान ( फोटो सौजन्य : सोशल मीडिया)
Trump health concerns : अमेरिकन राजकारण सध्या एका मोठ्या चर्चेच्या भोवऱ्यात अडकले आहे. कारण, अमेरिकेचे उपाध्यक्ष जेडी व्हान्स यांनी एका महत्त्वाच्या मुलाखतीत असे संकेत दिले आहेत की, कोणत्याही “गंभीर परिस्थितीत” ते राष्ट्राध्यक्षपदाची सूत्रे स्वीकारण्यास पूर्णपणे तयार आहेत. हे विधान अशा वेळी आले आहे जेव्हा विद्यमान राष्ट्राध्यक्ष डोनाल्ड ट्रम्प यांच्या प्रकृतीबद्दल अटकळ अधिकच तीव्र झाल्या आहेत.
डोनाल्ड ट्रम्प सध्या टॅरिफ वॉरद्वारे जगभरातील देशांवर दबाव आणण्याचा प्रयत्न करत आहेत. पण त्याच वेळी त्यांच्या आरोग्याबद्दलचे प्रश्न अधिक चर्चेत आहेत. अलीकडेच दक्षिण कोरियाचे राष्ट्राध्यक्ष ली जे म्युंग यांच्याशी झालेल्या भेटीत ट्रम्प यांच्या हातावर दिसलेल्या जखमेच्या खुणांमुळे वेगवेगळ्या चर्चांना उधाण आले. सोशल मीडियावर तर या छायाचित्रांनी मोठा वाद निर्माण केला आहे. व्हाईट हाऊसने याबाबत स्पष्टीकरण देत म्हटले की, या खुणा वारंवार होणाऱ्या हस्तांदोलनामुळे आणि अ‍ॅस्पिरिनच्या वापरामुळे दिसून आल्या आहेत. मात्र, चर्चांचा वेग कमी होण्याऐवजी अधिकच वाढत आहे.
जागतिक घडामोडी संबंधित बातम्या वाचण्यासाठी येथे क्लिक करा : PM Modi In Japan : भारताला जपान प्रवासाचे मोठे फळ; 40 अब्ज डॉलर्सपेक्षा जास्त गुंतवणूक; AI, सेमीकंडक्टर आणि बुलेट ट्रेन चर्चेत
यूएसए टुडेला दिलेल्या खास मुलाखतीत उपाध्यक्ष जेडी व्हान्स म्हणाले,
“अध्यक्ष ट्रम्प पूर्णपणे तंदुरुस्त आहेत आणि त्यांचा कार्यकाळ ते नक्कीच यशस्वीरित्या पूर्ण करतील. पण जर परिस्थिती बदलली तर मी राष्ट्राध्यक्षपदाची जबाबदारी स्वीकारण्यास पूर्णपणे तयार आहे.”
व्हान्स यांनी पुढे सांगितले की, मागील २०० दिवसांत त्यांना “सर्वोत्तम प्रशिक्षण” मिळाले आहे आणि कोणतीही आकस्मिक परिस्थिती आली तरी ते अमेरिकन जनतेसाठी काम करण्यास तत्पर आहेत. ४१ वर्षीय व्हान्स यांचे हे विधान अमेरिकन राजकारणात एका नवीन वळणाचे संकेत देत आहे.
दरम्यान, राष्ट्राध्यक्षांचे वैद्यकीय तज्ज्ञ डॉ. शॉन बारबेला यांनी खुलासा केला की, ट्रम्प यांना क्रॉनिक व्हेनस इन्सफीशियन्सी नावाचा आजार आहे. हा आजार ७० वर्षांपेक्षा जास्त वयाच्या लोकांमध्ये सामान्यपणे आढळतो. जुलै महिन्यात समोर आलेल्या काही छायाचित्रांमध्ये त्यांच्या पायांच्या खालच्या भागात सूज दिसून आली होती. त्यानंतर तपासणीत हा आजार निश्चित झाल्याचे सांगण्यात आले.
व्हाईट हाऊसच्या प्रेस सेक्रेटरी कॅरोलिन लेविट यांनी या चर्चांवर प्रतिक्रिया देताना म्हटले,
“ट्रम्प हे इतर कोणत्याही राष्ट्राध्यक्षांपेक्षा दररोज जास्त लोकांशी हस्तांदोलन करतात. त्यांच्या भेटीत नेहमीच त्यांची ऊर्जा आणि समर्पण दिसून येते.”
पण तरीसुद्धा ट्रम्प यांच्या प्रकृतीबद्दलची चर्चा थांबलेली नाही. अमेरिकन माध्यमांपासून आंतरराष्ट्रीय राजकारणातील तज्ज्ञांपर्यंत सर्वजण यावर विश्लेषण करत आहेत.
जागतिक घडामोडी संबंधित बातम्या वाचण्यासाठी येथे क्लिक करा : US–Japan Trade Deal: जागतिक राजकारण ‘असे’ फिरले, पंतप्रधान मोदींच्या जपान दौऱ्यामुळे अमेरिकेने अब्जावधी रुपये झटक्यात गमावले
ट्रम्प यांच्यावरील वाढती वयोमानाशी संबंधित चिंता आणि टॅरिफ वॉरमुळे वाढलेला राजकीय ताण यामुळे उपाध्यक्ष जेडी व्हान्स यांचे महत्त्व झपाट्याने वाढत आहे. केवळ “बॅकअप” म्हणून नव्हे, तर भविष्यातील संभाव्य राष्ट्राध्यक्ष म्हणून त्यांची प्रतिमा अमेरिकन लोकांच्या नजरेत आकार घेत आहे. व्हान्स स्वतः म्हणतात की, “देव करो की मोठी दुर्घटना घडू नये. पण मी मिळवलेले प्रशिक्षण आणि अनुभव अमेरिकन लोकांसाठी काम करण्यास मला तयार ठेवतो.” सध्या तरी ट्रम्प आपल्या कार्यकाळाचा ताबा घट्ट धरून आहेत. पण त्यांच्या आरोग्यावरील प्रश्न आणि व्हान्स यांचे “मी तयार आहे” हे विधान अमेरिकन राजकारणात एक नवीनच वळण घेऊन आले आहे. पुढील काही महिने अमेरिकेच्या राजकारणासाठी निर्णायक ठरणार आहेत, यात शंका नाही.
