पुण्यात तरुणाला रस्त्यात अडवून बेदम मारहाण; धक्कादायक कारणही आलं समोर

व्यसनमुक्ती केंद्रात भावाला दाखल केल्यानंतर फीसाठीचे पैसे परत न केल्याने तरुणाला बेदम मारहाण करण्यात आल्याचा प्रकार समोर आला आहे.

पुण्यात तरुणाला रस्त्यात अडवून बेदम मारहाण; धक्कादायक कारणही आलं समोर

Follow Us:

Follow Us:

पुणे : पुण्यात गुन्हेगारी वाढली असून, यामुळे पोलिसही अॅक्शन मोडवर आले आहे. पोलिसांकडून दररोज वेगवेगळ्या प्रकरणातील गुन्हेगारांवर कारवाई करण्यात येत आहे. अशातचं आता पुण्यातून एक मोठी बातमी समोर आली आहे. व्यसनमुक्ती केंद्रात भावाला दाखल केल्यानंतर फीसाठीचे पैसे परत न केल्याने तरुणाला बेदम मारहाण करण्यात आल्याचा प्रकार समोर आला आहे.

सिंहगड रोडवरील धायरी परिसरात ही घटना घडली असून, याप्रकरणी तिघांवर गुन्हा नोंद केला आहे. याप्रकरणी सिद्धार्थ पवार (रा. गारमाळ, रायकरनगर, धायरी), कार्तिक उर्फ पप्पू बाळकृष्ण लोणारे (रा. लोणारे वस्ती, धायरी), बबलू कसाळे (रा. धायरी) यांच्यावर गु्न्हा दाखल करण्यात आला आहे. याबाबत सूरज अरुण गायकवाड (वय ३०, रा. लोणारे वस्ती, धायरी) याने नांदेड सिटी पोलीस ठाण्यात तक्रार दिली आहे.

पोलिसांच्या माहितीनुसार, सूरज गायकवाड याचा भाऊ आकाश याला दारू पिण्याचे व्यसन आहे. त्याला सिद्धार्थ पवार याचे सिंहगड रस्त्यावरील खानापूर परिसरात व्यसनमुक्ती केंद्र आहे. व्यसनमुक्ती केंद्रात आकाश याला १५ मार्च रोजी दाखल करण्यात आले होते. दहा दिवसांसाठी चार हजार रुपये आणि ने-आण करण्यासाठी एक हजार रुपये असे पाच हजार रुपये सिद्धार्थ पवार याला द्यायचे ठरले होते. ३१ मार्च रोजी सकाळी साडेअकराच्या सुमारास सूरज गायकवाड धायरीतील उंबऱ्या गणपती चौकातून निघाला होता. त्या वेळी तेथील एका दुकानासमोर सिद्धार्थ पवार, कार्तिक लोणारे, बबलू कसाळे थांबले होते. त्या वेळी त्यांनी सूरज याच्याकडे व्यसनमुक्ती केंद्राची फी मागितली. तेव्हा त्याने माझ्याकडे पैसे नसल्याचे त्यांना सांगितले. त्या वेळी तिघांनी त्याला रस्त्यात मारहाण करण्यास सुरुवात केली.

आरोपी लोणारे याने त्याला कोयत्याचा धाक दाखवून धमकावले. ‘मी या भागातील दादा आहे. माझ्या नादी लागायचे नाही. व्यसनमुक्ती केंद्रातील फी आता दिली नाही, तर जिवे मारण्याची धमकी देण्यात आली. मारहाणीचा प्रकार सुरू असताना नागरिक जमले. तेव्हा तिघांनी दहशत माजविली. सूरज आरोपींच्या तावडीतून पळाला. लोणारे हा सराइत आहे. त्याच्या दहशतीमुळे सूरजने तक्रार दिली नव्हती. आरोपी पुन्हा मारहाण करतील, अशी भीती वाटल्याने सूरजने पोलिसांकडे तक्रार दिली. पोलीस उपनिरीक्षक शिवाजी बुनगे तपास करत आहेत.

Web Title: There has been an incident of a young man being brutally beaten up in pune nrdm

Get Latest  Marathi News ,  Maharashtra News and  Marathi News from Politics,  Election News ,  Sports News ,  Entertainment News,  Business News and   Religion News only on Navarashtra.com