वाघोलीत चोरट्यांनी किराणा दुकान फोडले; तब्बल लाखोंचा ऐवज चोरला

वाघोली परिसरात किराणा माल विक्री करणाऱ्या दुकानाचा दरवाजा उचकटून दीड लाख रुपयांचा माल चोरुन नेल्याची घटना घडली आहे. वाघोली-बायफ रस्त्यावर ही घटना घडली असून, यामुळे नागरिकांमध्ये भितीचे वातावरण आहे.

संग्रहित फोटो

Follow Us:

Follow Us:

पुणे : राज्यात चोरट्यांनी धुमाकूळ घातला असून, राज्यातील वेगवेगळ्या भागातून चोरीच्या घटना उघडकीस येत असतात. अशातचं आता पुण्यातून एक मोठी बातमी समोर आली आहे. वाघोली परिसरात किराणा माल विक्री करणाऱ्या दुकानाचा दरवाजा उचकटून दीड लाख रुपयांचा माल चोरुन नेल्याची घटना घडली आहे. वाघोली-बायफ रस्त्यावर ही घटना घडली असून, यामुळे नागरिकांमध्ये भितीचे वातावरण आहे. याप्रकरणी ४० वर्षीय व्यक्तीने वाघोली पोलीस ठाण्यात तक्रार दिली आहे. त्यानुसार, चोरट्यांवर गुन्हा दाखल करण्यात आला आहे.

पोलिसांच्या माहितीनुसार, तक्रारदाराचे वाघोली-बायएफ रस्त्यावर किराणा माल विक्री दुकान आहे. मंगळवारी मध्यरात्री चोरट्यांनी दुकानाचा दरवाजा उचकटून आत प्रवेश केला. दुकानातील १ लाख ५३ हजार रुपयांचा माल चोरुन चोरटे पसार झाले. चोरट्यांनी बिस्किटचे पुडे, तेल, अन्न धान्य असा माल चोरुन नेल्याचे उघडकीस आले आहे. पोलीस उपनिरीक्षक वैजीनाथ केदार अधिक तपास करत आहेत.

रविवार पेठेतील वस्त्रदालनात चोरी

रविवार पेठेतील कापडगंज परिसरात मोठे कापड दुकान आहे. हे दुकान देखील गेल्या काही दिवसाखाली चोरट्यांनी फोडून १ लाख ६८ हजारांची रोकड आणि लॅपटॉप असा १ लाख ८३ हजार रुपयांचा मुद्देमाल चोरट्यांनी चोरुन नेला आहे. याबाबत गोविंद राजाराम मुंदडा (वय ६५, रा. गंगाधाम, मार्केट यार्ड) यांनी फरासखाना पोलीस ठाण्यात तक्रार दिली आहे. मुंदडा यांचे कापडगंज परिसरात साडी विक्रीचे दुकान आहे. दुकान बंद असताना चोरट्यांनी दरवाजा उचकटून आत प्रवेश केला. गल्यातील रोकड आणि लॅपटॉप चोरुन पोबारा केला आहे. अधिक तपास उपनिरीक्षक शिवराज हाळे करत आहेत.

पुण्यात पुन्हा तेच चोरटे ॲक्टीव्ह?

पुण्यातही सहा वर्षांपुर्वी सोनसाखळी चोरट्यांनी मोठ्या प्रमाणात धुमाकूळ घातला होता. दिवसाला तीन ते चार सोनसाखळी चोरीच्या घटना घडत असत. पादचारी महिला तसेच ज्येष्ठ महिला या चोरट्यांच्या टार्गेटवर असत. तीन राज्यात या टोळ्यांनी मोठा गोंधळ घातला होता. पुणे पोलिसांनी तीन राज्यातील माहिती एकत्रित करून या चोरट्यांचा माग सुरू केला होता. नंतर यातील काही टोळ्यांना पकडण्यात यश देखील आले होते. त्यांच्यावर मोक्कासारखी कारवाई देखील केली होती. नंतर या घटना थांबल्या होत्या. परंतु, आता पुन्हा सहा वर्षांनी सोन साखळी टोळ्या ॲक्टीव्ह झाल्याचे गेल्या काही महिन्यांपासून दिसत आहे. त्यामुळे पुन्हा तेच चोरटे ॲक्टीव्ह झाले आहेत का ? असा प्रश्न उपस्थित झाला आहे.

Web Title: Thieves have broken into a grocery store in wagholi nrdm

Get Latest  Marathi News ,  Maharashtra News and  Marathi News from Politics,  Election News ,  Sports News ,  Entertainment News,  Business News and   Religion News only on Navarashtra.com