Bihar Election Opinion Poll 2025: बिहार निवडणूकपूर्व सर्वेक्षण: बिहार विधानसभा निवडणुकीची मतदानाची तारीख जवळ अवघ्या काही तासांवर येऊन ठेपली आहे. राजकीय हालचालींनाही वेग आला आहे. दरम्यान, जेव्हीसी सर्वेक्षणामुळे राजकीय वातवारण तापू लागले आहे. अशातच बिहारमध्ये झालेल्या निवडणूक सर्वेक्षणातून आरजेडी नेते तेजस्वी यादव यांच्यासाठी आनंदाची बातमी समोर आली आहे. पण त्याचवेळी बिहारचे विद्यमान मुख्यमंत्री नितीश कुमार यांची मात्र झोप उडणार आहे.
बिहार विधानसभा निवडणुकीच्या पार्श्वभूमीवर नुकत्याच झालेल्या सर्वेक्षणानुसार, महाआघाडीचे मुख्यमंत्रीपदाचे उमेदवार असलेले तेजस्वी यादव हे सर्वात पसंतीचे मुख्यमंत्रीपदाचे उमेदवार म्हणून उदयास आले आहेत, तर विद्यमान मुख्यमंत्री नितीश कुमार लोकप्रियतेत त्यांच्यापेक्षा मागे आहेत. पहिल्यांदाच निवडणूक लढवणारे प्रशांत किशोर आणि चिराग पासवान हे देखील लोकांच्या आवडत्यांमध्ये आहेत.
जेव्हीसी पोलनुसार, तेजस्वी यादव यांना ३३ टक्के लोकांनी मुख्यमंत्री म्हणून पसंती दिली आहे. तर त्यांच्यापाठोपाठ नितीश कुमार यांना २९ टक्के लोकांनी मुख्यमंत्रीपदासाठी निवड केली आहे. तर १० टक्के लोकांनी मुख्यमंत्रीपदासाठी चिराग पासवान आणि प्रशांत किशोर यांना योग्य मानले आहे. उपमुख्यमंत्री सम्राट चौधरी यांना ९ टक्के लोकांनी कल दिला आहे.
सर्वेक्षणात, ५ टक्के मतदारांचा असा विश्वास आहे की महाआघाडीचा दुसरा चेहरा मुख्यमंत्री होऊ शकतो, तर ४ टक्के लोकांनी दुसऱ्या भाजप नेत्यावर विश्वास व्यक्त केला. टाईम्स नाऊच्या वृत्तानुसार, २३ ते ३० ऑक्टोबर दरम्यान हा सर्वेक्षण करण्यात आला. फोन कॉल आणि थेट मुलाखतींद्वारे ३२,६५७ लोकांकडून मते गोळा करण्यात आली.
तेजस्वी यादव यांच्या बाजूने जनतेने कल दिला असला तरी, अंदाजित जागांच्या संख्येच्या बाबतीत एनडीए पुढे असल्याचे दिसून येते. सर्वेक्षणांनुसार, एनडीए १२० ते १४० जागा जिंकू शकते. महाआघाडीला ९३ ते ११२ जागा मिळण्याचा अंदाज वर्तवण्यात येत आहे. बिहार विधानसभेत बहुमताचा आकडा १२२ जागा आहे.
पक्षनिहाय सर्वेक्षणानुसार, भाजपला एनडीएमध्ये ७० ते ८१, जेडीयूला ४२ ते ४८ आणि एलजेपी (रामविलास) ५ ते ७ जागा मिळण्याचा अंदाज आहे. एचएएम आणि आरएलएमला प्रत्येकी दोन जागा मिळण्याची शक्यता आहे. शिवाय, महाआघाडीमध्ये, आरजेडीला ६९ ते ७८ जागा मिळण्याचा अंदाज आहे, तर काँग्रेसला ९ ते १७ जागा मिळण्याचा अंदाज आहे. दरम्यान, सीपीआय (एमएल) १२ ते १४ जागा, सीपीआय १ आणि सीपीआय (एम) १ ते २ जागा मिळण्याची अपेक्षा आहे.
सर्वेक्षणानुसार, तेजस्वी यादव हे मुख्यमंत्रिपदासाठी प्राथमिक पसंती असले तरी, एनडीएला अधिक जागा मिळण्याचा अंदाज आहे. शिवाय, हे फक्त एक सर्वेक्षण आहे; खरे चित्र १४ नोव्हेंबर रोजी, निकालाच्या दिवशीच स्पष्ट होणार आहे.
