सातारा : महाराष्ट्राच्या राजकारणात (Maharashtra Politics) नुकतीच मोठी घटना घडली. शरद पवार (Sharad Pawar) यांनी राष्ट्रवादी काँग्रेसच्या अध्यक्षपदाचा राजीनामा देत असल्याचे जाहीर केले. त्यांच्या या निर्णयानंतर राजकीय स्तरावर प्रचंड खळबळ उडाली आहे. शरद पवार यांनी राजीनामा दिल्यानंतर राष्ट्रवादी काँग्रेसच्या अध्यक्षपदासाठी विरोधी पक्षनेते अजित पवार (Ajit Pawar) आणि सुप्रिया सुळे (Supriya Sule) यांची नावे चर्चेत आहेत. असे असताना अजित पवार यांना अध्यक्षपद देण्यावरून माजी मंत्री शालिनीताई पाटील (Shalini Patil) यांनी विरोध केला.
शरद पवारांच्या राजीनाम्यानंतरही राष्ट्रवादी काँग्रेसचे अनेक नेते, पदाधिकारी, कार्यकर्ते शरद पवार हेच अध्यक्षपदावर राहावेत म्हणून आग्रह करू लागले. पण शरद पवार सध्यातरी त्यांच्या निर्णयावर ठाम असल्याचे त्यांनी सांगितले. त्यात अजित पवार की सुप्रिया सुळे यावरून चर्चा सुरु असताना शालिनीताई पाटील यांनी अजित पवार यांच्याबाबत मोठं विधान केलं आहे. ‘अजित पवार हे घोटाळेबाज आहेत. वेगवेगळ्या गुन्ह्यांमध्ये अडकलेले नेते आहेत. त्यांना कधीही अटक होऊ शकते. त्यामुळे त्यांना राष्ट्रवादी काँग्रेसचे अध्यक्षपद देणे चुकीचे ठरेल. अजित पवार कसे अध्यक्ष होण्यास सक्षम नाहीत’.
अजित पवारांवर भाजपच्या बड्या नेत्याचा हात
अजित पवार यांना अध्यक्षपद देण्यात येऊ नये. जरंडेश्वर कारखान्यात अजित पवार यांनी 1400 कोटींचे मनी लॉड्रिंग केले आहे. हसन मुश्रीफ यांच्यावर 100 कोटींच्या भ्रष्टाचाराचा आरोप आहे. यांची ईडीने चौकशी केली. मात्र, अजूनपर्यंत अजित पवारांना का बोलावले नाही? अजित पवारांवर भाजपच्या बड्या नेत्याचा हात आहे. त्यामुळे अद्याप त्यांची चौकशी झालेली नाही. त्यामुळे अध्यक्षपद हे सुप्रिया सुळेंनाच द्यायला हवे, असेही त्यांनी म्हटले आहे.
शरद पवारांच्या कट्टर विरोधक म्हणून ओळख
शालिनीताई पाटील या महाराष्ट्राचे माजी मुख्यमंत्री दिवंगत वसंतदादा पाटील यांच्या पत्नी आणि महाराष्ट्राच्या माजी मंत्री आहेत. शालिनीताई या शरद पवार यांच्या कट्टर राजकीय विरोधक म्हणूनही ओळखल्या जातात.
