पुणे विमानतळाजवळ पुन्हा बिबट्याचे दर्शन (फोटो- istockphoto )
पुणे जिल्ह्यात वाढला बिबट्यांचा वावर
पुणे एअरपोर्टजवळ दुसऱ्यांदा झाले दर्शन
धावपट्टी रिकामी असल्याने मोठा अनर्थ टळला
Leopard Attack: पुणे विमानतळाच्या धावपट्टीलगत असलेल्या टॅक्सी वे के-४ परिसरात गुरुवारी रात्री सुमारे दीडच्या सुमारास पुन्हा बिबट्या आढळून आला. गेल्या दोन दिवसांत या भागात बिबट्याचे हे दुसरे दर्शन ठरले आहे. विशेष म्हणजे, रात्रीच्या वेळी विमानांची सर्वाधिक वाहतूक असतानाच बिबट्या पार्किंग बे क्रमांक ८, ९ आणि १० पासून काहीच अंतरावर दिसला. सुदैवाने तो थेट धावपट्टीवर पोहोचला नाही. या आठवड्यात मंगळवार आणि गुरुवारी मध्यरात्री बिबट्या धावपट्टीजवळील टॅक्सी वे-४ परिसरात दोनदा दिसल्याची नोंद आहे.
पहिल्यांदा त्याचे अस्तित्व हवाई वाहतूक नियंत्रण कक्षातील कर्मचाऱ्यांच्या लक्षात आले, तर गुरुवारी रात्री ग्राउंड स्टाफने बिबट्या पाहिल्याचे समजते. त्या वेळी धावपट्टी रिकामी असल्याने मोठा अनर्थ टळला. के-४ हा मार्ग टर्मिनलला जोडणाऱ्या समांतर टॅक्सीवेद्वारे महत्त्वाचा असल्याने ही घटना गंभीर मानली जात आहे.
आता बिबट्यांची खैर नाही! Forest Department ॲक्शन मोडमध्ये; ३० ट्रॅप अन्…
वन विभागाच्या सूचनांकडे विमानतळ प्रशासनाचे दुर्लक्ष
यापूर्वीच्या घटनेनंतर वन विभागाने विमानतळ प्रशासनाला लोहगावच्या दिशेने असलेल्या संरक्षणभिंतीची डागडुजी तातडीने करण्याचे पत्र दिले होते. मात्र, अद्यापही भिंत दुरुस्तीअभावी तशीच असून, या भिंतीतूनच बिबट्या विमानतळ परिसरात येत असल्याचे वन विभागाने स्पष्ट केले आहे. के-४ परिसरातील भुयारी ड्रेनेज पाइपला जाळ्या बसवून मार्ग बंद करण्यात आला आहे. दरम्यान, बिबट्याला पकडण्यासाठी लोहगाव परिसरात पिंजरे लावण्यात आले असून, कॅमेऱ्यांच्या माध्यमातून त्याच्या हालचालींवर सतत नजर ठेवली जात आहे. धावपट्टीखालील गटारांनाही जाळ्या लावून बंद करण्यात आले आहे. बिबट्याच्या वारंवार होत असलेल्या हालचालींमुळे सुरक्षा यंत्रणांची चिंता वाढली असून, विमान प्रवास सुरळीत ठेवण्यासाठी तातडीची पावले उचलण्याची गरज अधोरेखित होत आहे.
संयुक्त मोहिमेची गरज
धावपट्टीजवळ बिबट्याचा वावर असणे हे विमान व प्रवाशांच्या सुरक्षेसाठी गंभीर आहे. हवाई दल, विमानतळ प्रशासन आणि वन विभाग यांनी संयुक्तपणे मोहीम राबवून बिबट्याला पकडावे.
– धैर्यशील वंडेकर, हवाई वाहतूक तज्ज्ञ
आला रे आला बिबट्या आला! ‘या’ जिल्ह्यात मानवी वस्तीत वावर वाढला; तब्बल 46 जणांवर…
विमानतळाच्या आत व लोहगाव परिसरात दिसणारा बिबट्या हा एकच असून, दहा दिवसांनी तो पुन्हा विमानतळावर आला आहे. त्यावरून त्याचे क्षेत्र वाढत असल्याचा अंदाज आहे.
– मंगेश ताटे, सहाय्यक वनसंरक्षक, पुणे वन विभाग
