मुंबई : महाराष्ट्राच्या राजकारणात (Maharashtra Politics) मंगळवारी (दि.2) मोठी घटना घडली. शरद पवार (Sharad Pawar) यांनी राष्ट्रवादी काँग्रेसच्या अध्यक्षपदाचा राजीनामा देत असल्याचे जाहीर केले. त्यांच्या या निर्णयानंतर राजकीय स्तरावर प्रचंड खळबळ उडाली. राष्ट्रवादी काँग्रेसचे अनेक नेते, पदाधिकारी, कार्यकर्ते शरद पवार हेच अध्यक्षपदावर राहावेत म्हणून आग्रह करू लागले. पण शरद पवार सध्यातरी त्यांच्या निर्णयावर ठाम असल्याचे त्यांनी सांगितले. पण त्यांनी अचानक राजीनामा का दिला, याची चर्चा सुरु असताना खुद्द शरद पवार यांनी यावर भाष्य केले.
पवारांनी बैठकीत कार्यकर्त्यांना 1 मे या दिवसाची असलेले विशेष संबंध सांगितले. पवार म्हणाले, ‘मी 1 मे 1960 रोजी युवा संघटनेच्या अध्यक्षपदाची सूत्रे स्वीकारली होती. त्यामुळे मला 1 मे या दिवसाशी विशेष स्नेह आहे. गेल्या आठवड्यात झालेल्या युवक पदाधिकाऱ्यांच्या बैठकीत मी भाकरी फिरवणारे विधान केले होते. त्यामुळे आता आम्ही तरुणांचे विचार लक्षात घेता ग्रामीण भागातील तरुणांना मुख्य प्रवाहात आणू इच्छितो’.
शरद पवार निर्णयावर ठाम
‘जोपर्यंत शरद पवार राजीनामा देण्याच्या निर्णयावर फेरविचार करत नाहीत, तोपर्यंत ते पक्षाच्या प्रमुखपदी कायम राहतील आणि त्यांचा उत्तराधिकारी निवडण्याबाबत कोणतीही चर्चा होणार नाही’, असे माजी केंद्रीयमंत्री आणि राष्ट्रवादी काँग्रेसचे राष्ट्रीय उपाध्यक्ष प्रफुल्ल पटेल यांनी सांगितले.
5 मे ला होणार बैठक
राष्ट्रवादी काँग्रेस पक्षाचा नवा अध्यक्ष असणार याबाबत 5 मे ला बैठक होणार आहे. शरद पवार यांनी जाहीर केलेल्या निवड समितीची 5 मे ला बैठक होईल. या बैठकीत याबाबत निर्णय होणार आहे. विशेष म्हणजे निवड समितीची 6 मे ला बैठक होणार होती. पण ही बैठक शरद पवार यांनी 5 मे ला घेतली आहे. निवड समितीची बैठक जो निर्णय घेईल तो आपल्याला मान्य असेल, असं शरद पवार यांनी सांगितल्याची माहिती सूत्रांकडून मिळाली.
अजित पवारांना पसंती?
शरद पवार यांनी त्यांच्या निवृत्तीची घोषणा केली. त्यानंतर राष्ट्रवादी काँग्रेसचे अनेक नेते, पदाधिकारी भावनिक झाले. शरद पवारांनी मोठी घोषणा केल्यानंतर पक्षाचा पुढील अध्यक्ष कोण? यावर राजकीय वर्तुळात चर्चा रंगत आहे. त्यामध्ये खासदार सुप्रिया सुळे आणि विरोधी पक्षनेते अजित पवार यांचे नाव चर्चेत आहे. मात्र, शरद पवारांच्या काटेवाडीतील ग्रामस्थांची आगामी नेतृत्वासाठी अजित पवार यांच्या नावाला पसंती असल्याचे सांगितले जात आहे.
