बुधवार, 21 ऑक्टोबर 2026
एलपीजी गॅस शॉर्टजमुळे घरगुती व औद्योगिक वापरासाठी पीएनजी गॅसचे कनेक्शन आहे (फोटो - सोशल मीडिया)
Pune News Update : पुणे : आकाश ढुमेपाटील : आखाती युद्धकाळात निर्माण झालेल्या गॅस टंचाईच्या (Gas Shortage) पार्श्वभूमीवर राज्य सरकारने पाइप्ड नॅचरल गॅस (पीएनजी) संदर्भात धोरणात्मक निर्णय घेतले असून, त्याअंतर्गत पुणे जिल्ह्यातील ग्रामीण भाग व औद्योगिक वसाहतींमध्ये पीएनजी गॅस जाळ्याचा मोठ्या प्रमाणावर विस्तार करण्यावर भर देण्यात आला आहे. घरगुती तसेच औद्योगिक वापरासाठी पीएनजीचा वापर वाढविणे हा यामागील प्रमुख उद्देश आहे.
पुणे शहर व पिंपरी-चिंचवड परिसरात Maharashtra Natural Gas Limited मार्फत सेवा दिली जात असताना, ग्रामीण भागातील विस्तारीकरणाचे काम Torrent Gas या कंपनीकडे सोपविण्यात आले आहे. राज्य शासनाने घरगुती वापरासाठी आवश्यक असणाऱ्या पीएनजी लाईन्स ३० जूनपर्यंत पूर्ण करण्याचे निर्देश दिले आहेत.
हे देखील वाचा : काळजी घ्या ! उन्हाचा कडाका आणखी वाढणार; 16-17 एप्रिलला उष्णतेची लाट येण्याचा अंदाज
ग्रामीण भागात औद्योगिक वापरासाठी स्टील पाइपलाइन टाकण्याचे कामही वेगाने सुरू आहे. खेडगाव ते शेवाळवाडी दरम्यान २५ किलोमीटर लांबीची औद्योगिक लाईन प्रस्तावित असून, त्यापैकी चार किलोमीटरचे काम पूर्ण झाले आहे. राजगुरुनगर ते मंचर दरम्यान २० किलोमीटरची लाईन लवकरच सुरू होणार आहे. याशिवाय सारोळा ते खेड शिवापूर (२० किमी), रांजणगाव एमआयडीसी (४५ किमी), बारामती एमआयडीसी (४० किमी), तळेगाव एमआयडीसी (१५ किमी) आणि सणसवाडी एमआयडीसी (१० किमी) या भागांत पाइपलाइन टाकण्यात आल्या आहेत. यामुळे औद्योगिक क्षेत्रातील गॅस उपलब्धता सुलभ होऊन उद्योजकांना मोठा दिलासा मिळणार आहे.
हे देखील वाचा : उपमुख्यमंत्री एकनाथ शिंदे ॲक्शन मोडमध्ये; कोयना जलाशयावरील पुलांची केली पाहणी
घरगुती वापरासाठीही विविध भागांत कामे सुरू आहेत. वाघोली येथे १५ किमीचे काम सुरू असून, बारामतीमध्ये आधीच्या १५ किमी व्यतिरिक्त आणखी ३० किमी लाईन टाकली जाणार आहे. फुरसुंगी येथे ५ किमी, शिरूर येथे विद्यमान ५ किमीवरून १० किमीपर्यंत वाढ, राजगुरुनगर येथे ४ किमीवरून १० किमीपर्यंत विस्तार, बावधन येथे २ किमीवरून ७ किमीपर्यंत वाढ, तर सासवडमध्ये ३० किमीवरून आणखी १० किमी वाढविण्याचे काम सुरू आहे. तसेच केडगाव ते जेजुरी दरम्यान ३७ किमीची पाइपलाइन टाकण्याचे काम सुरू असून, ते पुढील एका वर्षात पूर्ण होण्याची अपेक्षा व्यक्त करण्यात आली आहे.
दरम्यान, रस्त्यालगत पाइपलाइन टाकताना स्थानिकांकडून अनेकदा अडथळे निर्माण होत असल्याचे चित्र होते. मात्र, केंद्र सरकारच्या परिपत्रकानंतर या कामांना मिळणारा विरोध कमी झाला असून, राज्य शासनाकडूनही सहकार्य वाढल्याने प्रकल्पांना गती मिळत आहे.
एकूणच, पीएनजी जाळ्याच्या या व्यापक विस्तारामुळे ग्रामीण भागातील घरगुती ग्राहकांसह औद्योगिक क्षेत्रालाही स्वस्त, सुरक्षित आणि सातत्यपूर्ण गॅसपुरवठा उपलब्ध होणार असल्याचे स्पष्ट होत आहे.
