Pune News: पुण्यातील भाटघर धरणाचं पाणी अचानक झालं हिरवं! स्थानिकांमध्ये भीतीचे वातावरण

भोर: भोर तालुक्यातील भाटघर(येसाजी कंक जलाशय) धरणाच्या परिसरातील पाण्याला अचानक हिरवा रंग चढल्यामुळे तसेच बॅक वॉटर क्षेत्रातील संगमनेर, माळवाडी व नऱ्हे गावांच्या लगतच्या जलसाठ्यात हा बदल स्पष्टपणे दिसून येत असल्याने स्थानिक नागरिक आणि शेतकरी वर्गामध्ये भीतीचे वातावरण निर्माण झाले असुन संबंधित प्रकारामुळे पिण्याच्या पाण्याच्या सुरक्षिततेवर, शेतीसाठी वापरल्या जाणाऱ्या पाण्याच्या परिणामकारकतेवर आणि नागरिकांच्या आरोग्यावर संभाव्य धोका निर्माण होऊ शकतो अशी चिंता स्थानिकांनी व्यक्त केली आहे.

 याबाबत स्थानिकांकडून मिळालेल्या माहितीवरून काल रविवार (दि.२०) रोजी पाण्याला अचानक हिरवा रंग चढत असल्याचे निदर्शनास आले परंतु सोमवार (दि.२१) रोजी मात्र बॅक वॉटर क्षेत्रातील संगमनेर, माळवाडी व नऱ्हे गावांच्या लगतच्या जलसाठ्यात हा बदल स्पष्टपणे दिसून आल्याने स्थानिक नागरिकात भीतीचे वातावरण निर्माण झाले. परिणामी धरणाच्या पाण्यातील हा रंग बदल जैविक की रासायनिक प्रक्रिया आहे, याबाबत वैज्ञानिक आणि निष्पक्ष स्पष्टीकरण मिळावे, अशी मागणी नागरिकांकडून जोर धरू लागली आहे. प्रशासनाने तातडीने आणि पारदर्शक पद्धतीने यावर कार्यवाही करावी, अशी आग्रही भूमिका स्थानिक नागरिकांनी घेतली आहे.

घटनेची गंभीर दखल घेत उपविभागीय अधिकारी डॉ. विकास खरात यांनी जलाशयातील पाण्याच्या गुणवत्तेबाबत स्थानिकांनी व्यक्त केलेल्या शंकेनंतर त्वरित नमुने प्रयोगशाळेत तपासणीसाठी पाठवण्याचे आदेश दिले आहेत. तसेच पाण्यातील तवंग हटवण्यासाठी आवश्यक उपाययोजना तत्काळ राबवण्याच्या सूचनाही संबंधित विभागास दिल्या आहेत.

“मत्स्य विभागाने धरणात काही ठिकाणी पिंजरे लावले आहेत. त्यात टाकल्या जाणाऱ्या खाद्यपदार्थां मध्ये नायट्रोजनचे प्रमाण जास्त असते. त्यामुळे जलाशयात शेवाळ वाढण्याची प्रक्रिया वेगाने होते आणि परिणामी पाण्याला हिरवा रंग दिसून येतो. तो काही कालावधीत पूर्ववत होतो.”

– गणेश टेंगळे

सहाय्यक अभियंता श्रेणी २.

Maharashtra Weather Update : वादळी वाऱ्याचा इशारा, राज्यात कुठे ऑरेंज तर कुठे यलो अलर्ट, तुमच्या जिल्ह्यातील पावसाची स्थिती काय?

तुमच्या जिल्ह्यातील पावसाची स्थिती काय?

राज्यात पुन्हा एकदा मुसळधार पाऊस पडणार आहे. हवामान खात्याने कोकण, उत्तर कोकण आणि घाटमाथ्यामध्ये मुसळधार पाऊस पडण्याची शक्यता वर्तवली आहे आणि जोरदार वादळासह वादळ येण्याची शक्यता आहे. हवामान विभागाने दिलेल्या माहितीनुसार पुणे, मराठवाडा, विदर्भात हलका पाऊस पडण्याची शक्यता आहे. तसेच राज्यात काही अंशी पावसाचा जोर ओसरल्याचे चित्र असले तरी कोकण, उत्तर कोकण, मध्य महाराष्ट्र आणि घाटमाथ्याच्या काही भागात मुसळधार पाऊस पडण्याची शक्यता आहे. तसेच, मराठवाडा आणि विदर्भात हलका पाऊस पडण्याची शक्यता आहे.