शनिवार, 17 ऑक्टोबर 2026
"शिंदेंनीं मालवणला दोन बॅग मधून काय आणले? पैसे होते?" अंजली दमानियांचा सवाल
एकनाथ शिंदेंचा मालवण दौऱ्यावरचा व्हिडीओ व्हायरल
पैशांनी भरलेल्या बॅग घेऊन जात असल्याचा व्हिडिओ
राजकीय वातावरण तापले
Anjali Damania On Eknath Shinde News Marathi : राज्यातील 264 नगरपालिका आणि नगरपंचायतीच्या निवडणुकीसाठी आज (2 डिसेंबर) मतदान होत असून, त्यासाठी संपूर्ण मतदान यंत्रणा सज्ज झाली आहे. सकाळी 7.30 वाजता मतदानास सुरुवात झाली असून सायंकाळी 5.30 पर्यंत मतदानाची वेळ असताना, याचदरम्यान महाराष्ट्रातील महापालिका निवडणुकीदरम्यान एक नवीन वाद समोर आला आहे. मालवण दौऱ्यादरम्यान उपमुख्यमंत्री एकनाथ शिंदे यांनी पैशांनी भरलेल्या बॅग घेऊन जात असल्याचा व्हिडिओ व्हायरल झाला आहे. हा व्हिडिओ त्यांच्या मालवण भेटीशी संबंधित असल्याचे सांगण्यात येत आहे आणि त्यामुळे राजकीय वातावरण तापले आहे. शिंदे, शिवसेना आणि नीलेश राणे यांच्यावर मतदारांना प्रभावित करण्यासाठी पैसे वाटल्याचा आरोप आहे.
व्हिडिओमध्ये एकनाथ शिंदे यांचे अंगरक्षक कॅमेऱ्याला टाळून पैशांनी भरलेल्या पिशव्या घेऊन त्यांच्या मागे धावताना दिसत आहेत. माजी आमदार वैभव नाईक यांचा आरोप आहे की, हेच पैसे नंतर मतदारांना वाटण्यात आले. सत्तेत असताना भ्रष्टाचारातून सार्वजनिक पैसे गोळा केले गेले होते आणि आता निवडणुकीदरम्यान मते मिळविण्यासाठी त्याचा वापर केला जात आहे, असा दावा नाईक यांनी केला आहे. तर दुसरीकडे या व्हिडीओवर सामाजिक कार्यकर्त्या अंजली दमानिया यांनी देखील टिका केली आहे.
मालवण दौऱ्यादरम्यान उपमुख्यमंत्री एकनाथ शिंदे यांनी पैशांनी भरलेल्या बॅग घेऊन जात असल्याचा व्हिडिओवर अंजल दमानिया यांनी टिका केली असून त्यांनी म्हटलं आहे की, “ही निवडणूक आहे की पैशाची खैरात? अफाट पैसा वाटला जातोय. आज जे चालू आहे त्याला लोकशाहीतील निवडणूक म्हणता येईल का? सगळे कायदे धाब्यावर. शिंदे गटाच्या बांगरांची इतकी हिंमत की ते मतदान कक्षातूनच नारे देतात ? शिंदेंनीं मालवण ला दोन बॅग मधून काय आणले? पैसे होते ? भाजप तर असंख्य ठिकाणी पैसे वाटत आहेत असे रिपोर्ट येत आहेत.” असा सवाल अंजली दमानिया यांनी उपस्थित केला आहे.
दरम्यान, वैभव नाईक यांचा दावा आहे की कथित पिशव्यांमधील पैसे काल नीलेश राणे यांनी परिसरातील मतदारांना वाटले होते. त्यांच्या मते, शिंदे-शिवसेना प्रत्येक निवडणुकीत “पैशाच्या माध्यमातून सत्ता आणि सत्तेद्वारे पैसा” हे धोरण स्वीकारतात. ते म्हणाले की, विरोधकांवर आरोप करणारे स्वतः पूर्णपणे निष्पक्ष नाहीत आणि निवडणुकीच्या वातावरणात दोन्ही बाजूंकडून पैशाचा वापर केला जात आहे. वैभव नाईक यांनी मालवणच्या लोकांना अशा कथित घोडेबाजार आणि भ्रष्टाचाराला आळा घालण्यासाठी सुज्ञपणे मतदान करण्याचे आवाहन केले. ते म्हणाले की, निवडणुका ही एक लोकशाही प्रक्रिया आहे आणि पैशाच्या प्रभावाने तिची प्रतिष्ठा धोक्यात येऊ नये. सध्या, व्हिडिओ आणि आरोपांवर दोन्ही पक्षांकडून कोणतीही अधिकृत प्रतिक्रिया आलेली नाही आणि हे प्रकरण राजकीय चर्चेत वेगाने पसरत आहे.
