फोटो सौजन्य – X
भारत आणि इंग्लंड यांच्यातील चौथी कसोटी सामना मँचेस्टर येथे खेळला जात आहे. सामन्यातील ४ दिवसांचा खेळ पूर्ण झाला आहे, तर हा सामन्याचा शेवटचा आणि निर्णायक दिवस आहे. टीम इंडियाला पराभवाचा धोका आहे, परंतु भारतीय संघ पाचव्या दिवशी तिन्ही सत्रे खेळून सामना अनिर्णित करण्याचा प्रयत्न करेल, कारण आता टीम इंडियाला सामना जिंकणे अशक्य आहे. चौथ्या दिवशी कर्णधार शुभमन गिल आणि केएल राहुल यांनी शानदार फलंदाजी केली आणि १७२ धावांची भागीदारी केली. लवकर २ बळी घेतल्यानंतर इंग्लंडचे गोलंदाज विकेटसाठी तत्पर असल्याचे दिसून आले. आता सोशल मिडीयावर मोठ्या प्रमाणात एक व्हिडीयो व्हायरल होत आहे.
चौथ्या दिवशी वेगवान गोलंदाज ब्रायडन कार्सेचे एक कृत्य कॅमेऱ्यात कैद झाले, त्यानंतर बॉल टॅम्परिंगचे प्रकरण सोशल मीडियावर जोर पकडताना दिसत आहे. ही संपूर्ण घटना ब्रायडन कार्सने टाकलेल्या १२ व्या षटकातील आहे. या षटकात शुभमन गिलने कार्सच्या चेंडूवर सलग २ चौकार मारले. त्यानंतर कार्सने फॉलो-थ्रूमध्ये पाय ठेवून चेंडू थांबवला. त्यानंतर ब्रायडन कार्स त्याच्या बुटाने चेंडू दाबताना दिसला. त्याची ही कृती ऑस्ट्रेलियन दिग्गज रिकी पॉन्टिंगनेही पाहिली.
English team is Ball Tampering?#INDvsENG #BallTampering pic.twitter.com/Pb020N6AWe — Forever_Kafir (@Ravi_s33) July 26, 2025
स्काय स्पोर्ट्सवर कॉमेंट्री करताना रिकी पॉन्टिंग म्हणाला, “ते ब्रायडन कार्सचे शेवटचे षटक होते, या दरम्यान तो फॉलो-थ्रूमध्ये असे करतो, चेंडू थांबवतो… अरेरे. तो बुटाच्या काट्यांनी चेंडूवर काही मोठे ठसे करतो.” मँचेस्टर कसोटीच्या चौथ्या दिवशी इंग्लंडचा पहिला डाव ६६९ धावांवर संपला. इंग्लंडकडून जो रूटने १५० आणि कर्णधार बेन स्टोक्सने १४१ धावा केल्या. टीम इंडियाकडून गोलंदाजी करताना रवींद्र जडेजाने ४ विकेट्स घेतल्या. त्यानंतर चौथ्या दिवसाच्या खेळाच्या अखेरीस २ विकेट्स गमावल्यानंतर टीम इंडियाने १७२ धावा केल्या. यशस्वी जयस्वाल आणि साई सुदर्शनच्या रूपात टीम इंडियाला दोन झटके सहन करावे लागले. हे दोन्ही फलंदाज खाते न उघडताच बाद झाले.
यानंतर, शुभमन गिल आणि केएल राहुल यांनी डावाची धुरा सांभाळली आणि शानदार फलंदाजी करताना अर्धशतके झळकावली. आता पाचव्या दिवशी, हे दोन्ही खेळाडू लांब डाव खेळून सामना अनिर्णित करू इच्छितात. चौथ्या दिवसाच्या खेळाच्या अखेरीस केएल राहुलने ८७ आणि गिलने ७८ धावा केल्या होत्या.
