ऑस्ट्रेलियात सर्वात भीषण चक्रीवादळ ‘अल्फ्रेड’चा कहर; 40 लाख लोक धोक्यात, लॉकडाउन सारखी स्थिती

ऑस्ट्रेलियाच्या पूर्व किनाऱ्यावर ‘अल्फ्रेड’ या उष्णकटिबंधीय चक्रीवादळाने तडाखा दिल्यानंतर देशात भीतीचे वातावरण निर्माण झाले आहे. गेल्या 51 वर्षांतील हे सर्वात भीषण चक्रीवादळ असल्याचे हवामान तज्ज्ञांनी सांगितले आहे.

ऑस्ट्रेलियात सर्वात भीषण चक्रीवादळ ‘अल्फ्रेड’चा कहर; ४० लाख लोक धोक्यात, लॉकडाउन सारखी स्थिती ( फोटो सौजन्य : सोशल मीडिया)

Follow Us:

Follow Us:

ब्रिस्बेन – ऑस्ट्रेलियाच्या पूर्व किनाऱ्यावर ‘अल्फ्रेड’ या उष्णकटिबंधीय चक्रीवादळाने तडाखा दिल्यानंतर देशात भीतीचे वातावरण निर्माण झाले आहे. गेल्या ५१ वर्षांतील हे सर्वात भीषण चक्रीवादळ असल्याचे हवामान तज्ज्ञांनी सांगितले आहे. मुसळधार पाऊस आणि प्रचंड वाऱ्यामुळे जनजीवन विस्कळीत झाले असून, शाळा आणि कार्यालये बंद ठेवण्यात आली आहेत. वाहतूक व्यवस्थाही ठप्प झाली आहे.

शनिवारी क्वीन्सलँडमध्ये धडकण्याची शक्यता

हवामानशास्त्र विभागाचे व्यवस्थापक मॅट कोलोपी यांच्या म्हणण्यानुसार, ‘अल्फ्रेड’ चक्रीवादळ शनिवारी सकाळी क्वीन्सलँड राज्याच्या किनारपट्टीवर धडकण्याची शक्यता आहे. हे चक्रीवादळ सनशाइन कोस्ट आणि गोल्ड कोस्ट शहरादरम्यान कुठेतरी किनाऱ्यावर पोहोचू शकते. या दोन्ही शहरांच्या दरम्यान राज्याची राजधानी ब्रिस्बेन स्थित आहे, जिथे २०३२ ऑलिम्पिक खेळांचे आयोजन होणार आहे.

कोलोपी यांनी पत्रकारांना सांगितले की, ब्रिस्बेनच्या किनारी भागात वाऱ्याचा वेग ताशी ८० ते ९० किलोमीटरपर्यंत पोहोचला असून, पुढील काही तासांत तो अधिक तीव्र होण्याची शक्यता आहे. वाऱ्याच्या सोबतच मुसळधार पाऊस पडत असून, यामुळे पूरस्थिती निर्माण होण्याची भीती व्यक्त केली जात आहे.

जागतिक घडामोडी संबंधित बातम्या वाचण्यासाठी येथे क्लिक करा : अमेरिकेसोबत वाढत्या तणावादरम्यान चीनचा मोठा निर्णय! ‘ड्रॅगन’च्या नव्या योजनेमुळे भारतासमोरही मोठे आव्हान

चक्रीवादळामुळे मोठ्या प्रमाणात नुकसान होण्याची शक्यता

‘अल्फ्रेड’ चक्रीवादळाचा प्रभाव ४० लाखांहून अधिक लोकसंख्येच्या भागावर होऊ शकतो. विशेषतः ब्रिस्बेन आणि त्याच्या आसपासच्या किनारी भागांवर मोठा परिणाम होण्याची शक्यता आहे. १९७४ मध्ये आलेल्या एका चक्रीवादळाने गोल्ड कोस्टमध्ये प्रचंड विध्वंस घडवून आणला होता. त्याचप्रमाणे, ‘अल्फ्रेड’ चक्रीवादळामुळेही पूर आणि वादळाची तीव्रता वाढू शकते. हवामान तज्ज्ञांच्या मते, क्वीन्सलँडच्या उत्तरेकडील भागात चक्रीवादळे सर्रास येतात, मात्र न्यू साउथ वेल्सच्या सीमेजवळ असलेल्या दक्षिण-पूर्व भागात अशी परिस्थिती दुर्मिळ आहे.

विशेष म्हणजे, या चक्रीवादळाचा धोका २०,००० हून अधिक घरांना आहे. पूर आणि वादळामुळे अनेक घरे उद्ध्वस्त होण्याची शक्यता असून, प्रशासनाने नागरिकांना सुरक्षित स्थळी हलवण्याच्या सूचना दिल्या आहेत.

सरकारच्या मदतीसाठी तातडीची पावले

चक्रीवादळामुळे क्वीन्सलँड आणि न्यू साउथ वेल्स या राज्यांमध्ये ९४० शाळा तात्पुरत्या बंद करण्यात आल्या आहेत. यामध्ये दक्षिण क्वीन्सलँडमधील ६६० आणि उत्तर न्यू साउथ वेल्समधील २८० शाळांचा समावेश आहे. फेडरल सरकारने बचाव आणि पुनर्वसनासाठी तातडीने उपाययोजना हाती घेतल्या आहेत. ब्रिस्बेनसाठी ३,१०,००० वाळूच्या पिशव्या पाठवण्यात आल्या असून, आणखी वाळूच्या पिशव्यांची व्यवस्था केली जात आहे.

पंतप्रधान अँथनी अल्बानीज यांची नागरिकांना दिलासादायक ग्वाही

ऑस्ट्रेलियाचे पंतप्रधान अँथनी अल्बानीज यांनी कॅनबेरा येथे पत्रकारांशी संवाद साधताना प्रभावित नागरिकांना दिलासा दिला. त्यांनी सांगितले, “आम्ही तुमच्यासोबत आहोत आणि शक्य त्या सर्व प्रकारे मदत करण्यास तयार आहोत.” सरकार आणि स्थानिक प्रशासन नागरिकांच्या सुरक्षेसाठी सर्वतोपरी प्रयत्न करत आहे. नागरिकांना प्रशासनाने दिलेल्या सूचनांचे पालन करण्याचे आवाहन करण्यात आले आहे. पूर आणि चक्रीवादळाचा सामना करण्यासाठी आपत्ती व्यवस्थापन यंत्रणा सतर्क आहे.

अशा आपत्ती रोखण्यासाठी दीर्घकालीन उपाय आवश्यक

चक्रीवादळामुळे होणाऱ्या नुकसानीवर नियंत्रण मिळवण्यासाठी सरकारला दीर्घकालीन उपाययोजना राबवण्याची गरज आहे. हवामान बदलामुळे अशा प्रकारच्या नैसर्गिक आपत्तींची तीव्रता वाढत असल्याचे अभ्यासकांचे म्हणणे आहे. तज्ज्ञांच्या मते, समुद्राच्या तापमानातील वाढ ही अशा विध्वंसक चक्रीवादळांसाठी मुख्य कारण आहे.

जागतिक घडामोडी संबंधित बातम्या वाचण्यासाठी येथे क्लिक करा : दक्षिण कोरियात फायटर प्लेनने आपल्याच लोकांवर टाकले 8 बॉम्ब; जाणून घ्या काय आहे यामागचे कारण

नागरिकांनी काय खबरदारी घ्यावी?

• सुरक्षित ठिकाणी स्थलांतर करावे.
• प्रशासनाने दिलेल्या सूचनांचे पालन करावे.
• गरजेचे सामान आणि अन्नधान्य साठवून ठेवावे.
• विजेचे कनेक्शन आवश्यकतेशिवाय वापरू नये.
• पूरग्रस्त भागात जाण्याचे टाळावे.

निसर्गाच्या कोपापासून सावध राहण्याची गरज

‘अल्फ्रेड’ चक्रीवादळामुळे ऑस्ट्रेलियावर मोठे संकट कोसळले आहे. प्रशासन, हवामानशास्त्रज्ञ आणि आपत्ती व्यवस्थापन यंत्रणा सतर्क असली तरी, नागरिकांनीही सावधानता बाळगणे गरजेचे आहे. तुर्तास, संपूर्ण ऑस्ट्रेलियाचे लक्ष या चक्रीवादळाच्या पुढील हालचालींकडे लागले आहे.

Web Title: Cyclone alfred devastates australia putting 4 million at risk in a lockdown like crisis nrhp

Get Latest  Marathi News ,  Maharashtra News and  Marathi News from Politics,  Election News ,  Sports News ,  Entertainment News,  Business News and   Religion News only on Navarashtra.com