जगावर युद्धाची टांगती तलवार! रशियाचा गंभीर इशारा, होऊ शकते 'अणुशक्ती असलेल्या देशांमध्ये युद्ध' ( फोटो सौजन्य : सोशल मीडिया)
मॉस्को : रशियाचे उप परराष्ट्र मंत्री सर्गेई व्हर्शिनिन यांनी जागतिक तणाव वाढत असल्याचा गंभीर इशारा दिला आहे. त्यांनी युक्रेन युद्धासाठी पश्चिमी देशांना जबाबदार धरत, जागतिक पातळीवरील संघर्ष आणखी तीव्र होऊ शकतो, असे म्हटले आहे. विशेषतः, आण्विक शक्ती असलेल्या देशांमध्ये थेट संघर्षाची शक्यता निर्माण होत आहे, यामुळे संपूर्ण जगासाठी धोका वाढत आहे.
पश्चिमी देशांवर रशियाचा आरोप
रशियन प्रसारमाध्यमांच्या वृत्तानुसार, सर्गेई व्हर्शिनिन यांनी स्पष्ट केले की, काही पाश्चात्य देश आपले वर्चस्व प्रस्थापित करण्यासाठी कृती करत आहेत, त्यामुळे जागतिक स्तरावर संघर्षाची परिस्थिती निर्माण होत आहे. रशियाने अनेकदा शांततेसाठी संवादाचा आग्रह धरला असला, तरी पाश्चात्य राष्ट्रांनी त्याकडे दुर्लक्ष करून परिस्थिती अधिक चिघळवली आहे. रशियन अधिकाऱ्यांच्या मते, काही देश आपल्या राजकीय आणि लष्करी हितसंबंधांसाठी आधीच्या करारांना दुर्लक्षित करत आहेत. त्यामुळे इतर देशही समान प्रकारची पावले उचलण्यास प्रवृत्त होऊ शकतात, ज्याचा परिणाम जागतिक स्थैर्यावर होऊ शकतो.
जागतिक घडामोडी संबंधित बातम्या वाचण्यासाठी येथे क्लिक करा : Trump and Israel : अमेरिकेचा इस्रायलशी मोठा करार, लष्करी ताकद वाढणार; मोठ्या प्रमाणावर शस्त्रे विकण्यास मान्यता
रशिया आणि अमेरिका संघर्षाच्या उंबरठ्यावर?
तज्ज्ञांच्या मतानुसार, सध्याच्या परिस्थितीत जगातील सर्वात मोठ्या आण्विक शक्तींपैकी दोन – रशिया आणि अमेरिका – यांच्यात थेट संघर्ष होण्याची शक्यता वाढत आहे. हे दोन्ही देश अण्वस्त्रांच्या मोठ्या साठ्याचे मालक आहेत, आणि जर परिस्थिती नियंत्रणाबाहेर गेली, तर जग आण्विक युद्धाच्या उंबरठ्यावर पोहोचू शकते. रशियाने नेहमीच शांततेसाठी परस्पर संवादावर भर दिला आहे. मात्र, अमेरिकेसह पाश्चात्य देशांनी घेतलेल्या भूमिकेमुळे परिस्थिती आणखी बिघडत आहे. युक्रेन युद्धात अमेरिका आणि युरोपियन देशांनी थेट हस्तक्षेप करत, रशियाविरोधात शस्त्रसज्जता वाढवली आहे. त्यामुळे, जागतिक संघर्षाचा धोका दिवसेंदिवस वाढत आहे.
आण्विक युद्धाचा धोका वाढतोय?
रशियन अधिकाऱ्यांनी सूचित केले की, जागतिक स्तरावर तणाव वाढत राहिला, तर आण्विक शक्ती असलेल्या देशांमध्ये थेट युद्ध होऊ शकते. आण्विक युद्धाची भीती निर्माण झाल्यास, संपूर्ण मानवजातीसाठी हे विनाशकारी ठरू शकते. अलिकडच्या काळात, अमेरिका, युरोपियन युनियन आणि नाटो देशांनी रशियावर विविध निर्बंध लादले आणि युक्रेनला मोठ्या प्रमाणावर शस्त्रास्त्रे पुरवली. परिणामी, रशिया आणि पश्चिमी देशांमधील संघर्ष आणखी गंभीर झाला आहे. जर ही परिस्थिती पुढे गेली, तर संपूर्ण जगाला या संघर्षाचा फटका बसू शकतो.
जागतिक घडामोडी संबंधित बातम्या वाचण्यासाठी येथे क्लिक करा : रशियाचा युक्रेनवर मोठा हल्ला, 48 ड्रोन रशियन सैन्याने पाडले; अमेरिकेत ट्रम्प-झेलेन्स्की भेटीत वादंग
युद्ध रोखण्यासाठी उपाय आवश्यक
युद्धाच्या सावटाखाली असलेल्या जगाला सावरण्यासाठी परस्पर संवाद आणि शांततापूर्ण वाटाघाटी हाच सर्वोत्तम मार्ग आहे, असे तज्ज्ञांचे मत आहे. रशियाने याआधीही अनेकदा शांततेसाठी चर्चा करण्याचे आवाहन केले आहे, मात्र पाश्चात्य देशांचा आक्रमक पवित्रा हा आणखी गंभीर संकट ओढवू शकतो. आंतरराष्ट्रीय स्तरावर तणाव कमी करण्यासाठी तटस्थ देशांनी पुढाकार घेऊन संघर्ष टाळण्यासाठी प्रयत्न करणे आवश्यक आहे. अन्यथा, आण्विक युद्धाचा धोका प्रत्यक्षात येऊ शकतो, आणि त्याचे परिणाम संपूर्ण मानवजातीसाठी विनाशकारी ठरू शकतात.
