Donald Trump-Georgia Meloni Meeting : युरोप-अमेरिका व्यापार संबंधात मृदूवारा, ट्रम्पकडून ‘100% हमी’

Donald Trump-Georgia Meloni Meeting: अमेरिकेचे राष्ट्राध्यक्ष डोनाल्ड ट्रम्प आणि इटलीच्या पंतप्रधान जॉर्जिया मेलोनी यांची नुकतीच व्हाइट हाऊस येथे महत्वाची बैठक पार पडली.

जॉर्जिया मेलोनी ट्रम्प यांना भेटायला आल्यावर त्यांनी EU बद्दलची भूमिका मऊ केली आणि १००% व्यापार हमी दिली ( फोटो सौजन्य : सोशल मीडिया)

Follow Us:

Follow Us:

वॉशिंग्टन : अमेरिकेचे राष्ट्राध्यक्ष डोनाल्ड ट्रम्प आणि इटलीच्या पंतप्रधान जॉर्जिया मेलोनी यांची नुकतीच व्हाइट हाऊस येथे महत्वाची बैठक पार पडली. युरोपियन युनियनसोबत वाढत्या व्यापार संघर्षाच्या पार्श्वभूमीवर झालेल्या या भेटीत ट्रम्प यांनी “ईयूसोबत १०० टक्के व्यापार करार शक्य आहे” असा विश्वास व्यक्त केला. विशेष म्हणजे, ही बैठक युरोपियन युनियनच्या आयातीवर अमेरिकेकडून लादण्यात आलेल्या २० टक्के टॅरिफनंतर झाली असून, मेलोनी या पहिल्या युरोपियन नेत्या आहेत ज्यांनी या टॅरिफ वॉरदरम्यान ट्रम्प यांची भेट घेतली आहे.

व्यापार करारावर ट्रम्पचा विश्वास, पण “घाई नाही”

डोनाल्ड ट्रम्प यांनी जॉर्जिया मेलोनी यांच्याशी संवाद साधताना स्पष्ट केले की, ईयूसोबत व्यापार करार निश्चितच शक्य आहे, पण तो न्याय्य आणि अमेरिकेच्या हिताचा असावा लागेल. त्यांनी म्हटले की, “मला शुल्क हटविण्याची घाई नाही. सर्वांना करार हवा आहे आणि जर युरोपला तो नको असेल, तरी आम्ही आमच्या बाजूने योग्य करार करू.” ही भूमिका ट्रम्प यांच्या नेहमीच्या कठोर टॅरिफ धोरणाच्या तुलनेत थोडी मवाळ भासते. गेल्या काही वर्षांत ट्रम्प यांनी युरोपियन युनियनवर वारंवार आरोप केले होते की ईयू अमेरिकेच्या बाजारपेठेचा गैरफायदा घेत आहे.

जागतिक घडामोडी संबंधित बातम्या वाचण्यासाठी येथे क्लिक करा : रशियाचा युक्रेनमधील भारतीय कंपनीवर हल्ला; पाहा ‘त्या’ व्हायरल पोस्टमागचं सत्य काय

मेलोनी यांचे संयमित नेतृत्व आणि शांततेचा संदेश

मेलोनी यांनीही या बैठकीदरम्यान अत्यंत संयमित आणि सामंजस्यपूर्ण भूमिका घेतली. त्यांनी ट्रम्प यांना रोमला भेट देण्याचे औपचारिक निमंत्रण दिले आणि स्पष्ट केले की, “अटलांटिकच्या दोन्ही किनाऱ्यांवर काही समस्यांचा सामना करावा लागत असला, तरी आता तोडगा काढण्याची वेळ आली आहे. मेलोनी यांनी युरोप-अमेरिका संबंधांचा इतिहास अधोरेखित करत म्हटले की, “पश्चिमेला पुन्हा महान बनवण्यासाठी आम्हाला एकत्र काम करावे लागेल.” त्यांच्या या विधानाने ट्रम्प यांच्याशी संभाव्य भविष्यकालीन सहकार्याची पायाभरणी केल्याचे दिसून येते.

ईयूमधील अस्वस्थता आणि इटलीची भूमिका

या भेटीनंतर युरोपियन युनियनमधील काही नेत्यांमध्ये अस्वस्थता निर्माण झाली आहे. अनेकांनी मेलोनी यांच्या या भेटीला ईयूच्या एकात्मतेसाठी संभाव्य धोका मानले आहे. इटली हा जगातील चौथ्या क्रमांकाचा निर्यातदार देश आहे आणि अमेरिकेच्या बाजारात त्याचा मोठा हिस्सा आहे – सुमारे १०% निर्यात केवळ अमेरिकेकडे जाते. ट्रंप प्रशासनाकडून ईयूवर लादण्यात आलेला २० टक्के आयात कर सध्या ९० दिवसांसाठी स्थगित करण्यात आला आहे. या टॅरिफ निर्णयानंतर कोणताही युरोपियन नेता ट्रम्पला भेटला नव्हता. त्यामुळे मेलोनी यांची ही भेट विशेष महत्वाची ठरते.

मेलोनीच्या भेटीचा व्यापक परिणाम

विश्लेषकांच्या मते, मेलोनी यांच्या या दौऱ्यामुळे ईयू आणि अमेरिकेतील संबंधांमध्ये मोकळेपणा निर्माण होण्यास मदत होईल. युरोपियन कमिशनच्या अध्यक्ष उर्सुला वॉन डेर लेयेन यांच्यासह ट्रम्प यांच्यातील भविष्यातील संवादासाठीही ही भेट पायाभूत ठरू शकते. या बैठकीमुळे ट्रम्प यांनी ईयूसोबत व्यापार कराराबाबत काहीसे सकारात्मक संकेत दिले असले तरी, त्यांच्या प्रत्यक्ष धोरणात काय बदल होतो हे पाहणे महत्त्वाचे ठरणार आहे.

जागतिक घडामोडी संबंधित बातम्या वाचण्यासाठी येथे क्लिक करा : K2-18b ग्रहावर जीवनाचे संकेत; पृथ्वीपासून 700 ट्रिलियन मैल दूर ‘हेशियन वर्ल्ड’वर एलियन अस्तित्वाची शक्यता!

मवाळ सूरात व्यापार चर्चेची नवी शक्यता

जॉर्जिया मेलोनी आणि डोनाल्ड ट्रम्प यांची भेट ही केवळ इटली-अमेरिका संबंधांसाठीच नाही, तर संपूर्ण युरोप-अमेरिका व्यापार धोरणासाठी एक निर्णायक क्षण ठरू शकते. ट्रम्प यांच्या “१००% व्यापार करार शक्य आहे” या वक्तव्यानंतर आता ईयूकडून सकारात्मक प्रतिसाद येतो का, हे पाहणे औत्सुक्याचे ठरेल. मेलोनी यांची ही मुत्सद्दी भूमिका आणि सामंजस्याची भूमिका, युरो-अटलांटिक भागात नवा संवाद सुरू होण्यासाठी एक नवा मार्ग खुला करत आहे.

Web Title: Trump and meloni recently met at the white house nrhp

Get Latest  Marathi News ,  Maharashtra News and  Marathi News from Politics,  Election News ,  Sports News ,  Entertainment News,  Business News and   Religion News only on Navarashtra.com