Crime News: जप्त केलेले वाहन सोडवण्यासाठी PSI ने थेट…; एसीबीने रंगेहाथ पकडले

पिंपरी: दाखल गुन्ह्यात मदत करण्यासाठी तसेच गुन्ह्यात जप्त केलेले वाहन सोडविण्यासाठी ३० हजारांची लाच स्वीकारताना पोलिस उपनिरीक्षकाला रंगेहाथ पकडण्यात आले. पुणे लाचलुचपत प्रतिबंधक विभागाने पिंपरी पोलिस ठाण्यांतर्गत असलेल्या मोहननगर पोलिस चौकी येथे मंगळवारी (दि. १५ एप्रिल) ही कारवाई केली.

नीलेश रमेश बोकेफोडे (वय ३८) असे रंगेहाथ पकडलेल्या पोलिस उपनिरीक्षकाचे नाव आहे. याप्रकरणी २४ वर्षीय व्यक्तीने लाचलुचपत प्रतिबंधक विभागाकडे ११ एप्रिल रोजी तक्रार केली होती. लाचलुचपत प्रतिबंधक विभागाने दिलेल्या माहितीनुसार, २४ वर्षीय तक्रारदाराचे वाहन एका गुन्ह्यात पोलिसांनी जप्त केले. ते वाहन सोडविण्यासाठी पोलिस उपनिरीक्षक नीलेश बोकेफोडे यांनी तक्रारदाराकडे ४० हजार रुपयांच्या लाचेची मागणी केली.

लाचलुचपत प्रतिबंधक विभागाने ११ आणि १२ एप्रिल रोजी तक्रारीची पडताळणी केली. पोलिस उपनिरीक्षक नीलेश बोकेफोडे यांनी तक्रारदाराला दाखल गुन्ह्यात मदत करण्यासाठी तसेच गुन्ह्यात जप्त केलेले वाहन सोडविण्यासाठी ४० हजारांच्या लाचेची मागणी केली. तडजोडीअंती ३० हजारांची लाच मागितल्याचे निष्पन्न झाले. त्यानुसार लाचलुचपत प्रतिबंधक विभागाने मंगळवारी सापळा रचला. त्यावेळी उपनिरीक्षक बोकेफोडे यांना ३० हजारांची लाच स्वीकारताना रंगेहाथ पकडण्यात आले. याप्रकरणी पिंपरी पोलिस ठाण्यात गुन्हा दाखल करण्यात आला.