‘मंत्र्याच्या कार्यालयात मी नोकरीला…’; महसूल मंत्र्यांच्या नावाने काळाबाजार, युवकाची 40 लाखांची फसवणूक

जत: महसूल मंत्र्याच्या कार्यालयात मी नोकरीला असून मी तुम्हाला मंत्रालयात क्लार्क या पदावर शासकीय नोकरी लावून देतो, अशी बतावणी करून तब्बल ४० लाख रुपयेची फसवणूक (Crime News) केल्याप्रकरणी रणजित तुकाराम कुंभार (वय ४० रा. भोसे, ता. पंढरपूर) याच्याविरोधात जत पोलीस (Jat) ठाण्यात फसवणुकीचा गुन्हा दाखल करण्यात आला आहे.

याबाबत संबंधित खिलारे कुटुंबीयांच्या वतीने दिलेल्या फिर्यादीवरून कुंभार यांच्या विरोधात फसवणूक करण्याच्या दृष्टिकोनातून आमिष दाखवून फसवणूक, विश्वासघात करणे, बनावट कागदपत्रांची निर्मिती या कलमान्वये गुन्हा दाखल करण्यात आला आहे. सदरची फसवणूक ऑगस्ट २०२३ ते ऑगस्ट २०२५ या दोन वर्षाच्या कालावधीत झाली आहे. या फसवणुकीच्या प्रकरणांनी जत तालुक्यात मोठी खळबळ उडाली असून अनेक युवकांनी जत पोलीस ठाण्याकडे धाव घेतली आहे, अजून ६ जणांचे पैसे घेतलेची प्राथमिक माहिती मिळत आहे.

याबाबत अधिक माहिती अशी, संशयीत आरोपी रणजित कुंभार यांनी सागर मच्छिंद्र खिलारे, व चुलत भाऊ व नातलग मधील एकास असे तिघांना चुलत भावाला क्लार्क तसेच मंत्रालयात शिपाई पदावर नोकरी मिळवून देतो असे सांगून मोठी रक्कम स्वीकारली. पैशांचे व्यवहार टप्याटप्याने रोख व बँकेमार्फत झाले. त्यानंतर संशयित रणजीत कुंभार याने जिल्हाधिकारी कार्यालय नाशिक यांच्या नावाने बनावट निवड आदेश देखील पाठवले. आदेश लवकर मिळतील असे सांगूनही प्रत्यक्षात कोणतीही निवड न झाल्याने ही बाब तक्रारदारांच्या लक्षात येताच आमची फसवणूक झाली असल्याचे तक्रारीत म्हटले आहे. याच आरोपीने इतर व्यक्तीकडूनही परवाना मिळवून देतो असे सांगून मोठी आर्थिक फसवणूक केली असल्याचे चर्चा आहे. यामुळे फसवणुकीचे रॉकेट मोठं असल्याची शक्यता आहे.

तक्रारदार खिलारे यांनी दिलेल्या माहितीनुसार ऑगस्ट २०२३ पासून आरोपी रणजित कुंभार याने तक्रारदार यांचे भाऊ व अन्य दोन नातलग यांना क्लार्क व मंत्रालयातील शिपाई म्हणून नोकरी लावून देण्याचे खोटे आश्वासन दिले. या बदल्यात त्याने टप्प्याटप्याने रोख व बँक खात्यातून एकूण ४० लाख रुपये घेतले. या सर्व व्यवहारासंबंधी तक्रारदार व त्यांच्या कुटुंबीयांची बैंक स्टेटमेंटसुद्धा पोलिसांकडे सादर करण्यात आली आहेत. बहुतांशी रक्कम तीन बँकेत जमा केले आहे उर्वरित रोखीने घेतली आहे. याप्रकरणी आणखी गुन्हे दाखल होण्याची शक्यता आहे.

बनावट निवड आदेश पाठवून केली दिशाभूल

डिसेंबर २०२४ रोजी आरोपी रणजीत कुंभार याने खिलारे यांना जिल्हाधिकारी कार्यालय, नाशिक यांच्या नावाने बनावट निवडसूची व्हॉट्सअॅपवर पाठवली. यात खिलारे यांच्यातील दोघांची निवड झाल्याचे दाखवण्यात आले होते. हे आदेश ३० एप्रिल २०१५ रोजी मिळतील असे सांगण्यात आले. मात्र तसे न झाल्याने खिलारे यांनी वारंवार संपर्क साधला असता आरोपीने टाळाटाळ केलीः या घटनेचा अधिक तपास सहाय्यक पोलीस निरीक्षक बिरप्पा लातूरे करत आहेत.

20 हजाराची लाच घेणं भोवलं; पंढरपुरात मंडळ अधिकाऱ्याला रंगेहात पकडले

संशयित भामटा रणजीत कुंभार याने चक्क महसूल मंत्री चंद्रशेखर बावनकुळे यांचं नाव वापरल्याचे पुढे आले आहे. तसे फिर्यादीमध्ये नमूद करण्यात आले आहे. परिणामी, फसवणुकीचा व्याप्ती मोठी असून तालुक्यातील युवकांना नोकरी लावतो, मद्य विक्री परवाना काढून देतो, असे कोट्यवधीचा गंडा घातल्याचे चर्चा सुरू आहे. याबाबत हिवाळी अधिवेशनात या फसवणुकीची व्याप्ती मोठी असल्याने चर्चा होण्याची शक्यता वर्तवली जात आहे.