Pune Crime : दारूच्या बिलावरून वाद; ग्राहकाच्या डोक्यात बिअरची बाटली फोडली

पुण्यातून एक मोठी बातमी समोर आली आहे. दारूच्या बिलाच्या एकूण रकमेपेक्षा दहा रुपये कमी दिल्याच्या कारणावरून ग्राहकाला शिवीगाळ करून बेदम मारहाण केल्याचा प्रकार उघडकीस आला आहे.

संग्रहित फोटो

Follow Us:

Follow Us:

पुणे : राज्यात गुन्हेगारीच्या घटाना थांबत नसल्याचे दिसून येत आहे. दररोज वेगवेगळ्या भागातून खून, मारामाऱ्या, दरोडे यासारख्या घटना घडत असतात. यामुळे नागरिक हैराण झाले आहेत. अशातच आता पुण्यातून एक मोठी बातमी समोर आली आहे. दारूच्या बिलाच्या एकूण रकमेपेक्षा दहा रुपये कमी दिल्याच्या कारणावरून ग्राहकाला शिवीगाळ करून बेदम मारहाण केल्याचा प्रकार उघडकीस आला आहे. तसेच ग्राहकाच्या डोक्यात बिअरच्या बाटलीही फोडली आहे. ही घटना नवले पुलाजवळील चैतन्य बारमध्ये घडली आहे. याप्रकरणी तीन बार कर्मचाऱ्यांवर सिंहगड रोड पोलिसांनी गुन्हा दाखल केला आहे.

याप्रकरणी नऱ्हे येथील मानाजीनगर येथे राहणाऱ्या तरुणाने सिंहगड रोड पोलिसांत तक्रार दिली आहे. पोलिसांच्या माहितीनुसार, तक्रारदार हा त्याच्या मित्रांसह बारमध्ये गेला होता. दारूचे बिल देताना त्याने १० रुपये कमी दिल्याचे कारण सांगत बारमधील काउंटरवरील तीन कर्मचाऱ्यांनी त्यांच्याशी वाद घातला. त्यानंतर त्यांना शिवीगाळ करत हाताने मारहाण करण्यात आली. वादात बारमधील कर्मचाऱ्याने तक्रारदाराच्या डोक्यात बिअरची बाटली फोडली. या हल्ल्यात तक्रारदार जखमी झाला आहे.

हे सुद्धा वाचा : गणपती मंडळाच्या वादातून तरुणावर हल्ला; लाकडी दांडके अन् फरशीच्या तुकड्याने मारहाण

लोखंडी हत्याराने वार करून तरुणाला संपवल

कानाखाली मारल्याच्या रागातून १९ वर्षीय तरुणाचा लोखंडी धारदार हत्याराने वार करून खून करण्यात आल्याचा धक्कादायक प्रकार समोर आला आहे. ही धक्कादायक घटना आंबेगाव पठार भागात घडली आहे. खून करून पसार झालेल्या आरोपीला भारती विद्यापीठ पोलिसांनी अवघ्या काही तासांत अटक केली आहे. धैर्यशील उर्फ सचिन बळीराम मोरे (२३, रा. तीन हत्ती चौक, आंबेगाव पठार) असे अटक केलेल्या आरोपीचे नाव आहे. तर, खून झालेल्या तरुणाचे नाव आर्यन उर्फ निखील अशोक सावळे (१९) आहे. खून झाल्यानंतर आरोपी घटनास्थळावरून फरार झाला. पोलिसांनी तातडीने तपासाची चक्रे फिरवत आरोपी धैर्यशील मोरे याचा शोध घेतला. त्यानुसार, आंबेगाव पठार येथील चिंतामणी शाळेसमोरून आरोपीचा पाठलाग करून त्याला अटक करण्यात आली. चौकशीत आरोपीने गुन्ह्याची कबुली दिली असून, ‘कानशिलात मारल्याचा राग मनात धरला होता,’ असे त्याने सांगितले.

पुण्यात दाबेली विक्रेत्या तरुणावर चाकूने हल्ला

पर्वती दर्शन परिसरातून एक धक्कादायक बातमी समोर आली आहे. पर्वती दर्शन भागात कच्छी दाबेली विक्रेत्या तरुणावर हल्ला केला आहे. तरुणाच्या गळ्यावर चाकूने वार करुन खून केला आहे. ही घटना सोमवारी सकाळी घडली आहे. याप्रकरणी पोलिसांनी पसार झालेल्या आरोपीला अटक केली. दानिश नजरहसन सिद्धिकी (वय २५, रा. पर्वती दर्शन) असे खून झालेल्या तरुणाचे नाव आहे. याप्रकरणी दिनेश प्रभाकर क्षिरसागर (वय ४०, रा. तळेगाव दाभाडे) याच्यावर पर्वती पोलिसांत गुन्हा दाखल केला आहे. याबाबत दानिश याची वहिनी मोनी सिद्धीकी यांनी तक्रार दिली आहे.

Web Title: There has been an incident where a customer was brutally beaten by bar employees

Get Latest  Marathi News ,  Maharashtra News and  Marathi News from Politics,  Election News ,  Sports News ,  Entertainment News,  Business News and   Religion News only on Navarashtra.com