उल्हासनगर शहरात CBI अधिकारी बनून सुशिक्षित तरुणांना नोकरीचे आमिष दाखवून लाखो रुपये ठकवणाऱ्या एका भामट्याला विठ्ठलवाडी पोलिसांनी ताब्यात घेतले आहे. हा भामटा कमरेला नकली पिस्तूल लटकवून आणि CBI चा बॅच दाखवत फिरायचा. या बनावट अधिकाऱ्याचा वंचित बहुजन आघाडीच्या पदाधिकाऱ्यांना संशय आणि त्यांच्या सतर्कतेमुळे या आरोपीला पकडण्यात यश आले. हा संशयित उल्हासनगरमध्ये CBI अधिकारी बनून फिरत होता. तो स्वतःला उच्च पदावर असल्याचे सांगून लोकांना CBI मध्ये नोकरी लावून देण्याचे आमिष दाखवत होता. अनेक लोक त्याच्या बोलण्याला भुलले आणि त्याला लाखो रुपये दिले.
आपले बनावट रूप खरे वाटावे यासाठी तो नेहमी CBI अधिकाऱ्यासारखे कपडे घालत असे आणि सोबत नकली पिस्तूल ठेवत असे. परिसरात चर्चा होती की हा बनावट अधिकारी एका राजकीय पदाधिकाऱ्याच्या संपर्कात होता. फसवणूक झालेल्या काही लोकांनी वंचित बहुजन आघाडीचे पदाधिकारी सोनू आणि मोनू पवार यांच्याकडे जाऊन आपली तक्रार मांडली. फसवणूक झालेल्या महिलांनी त्याला चांगलाच चोपही दिला. पवार यांनी या प्रकरणाची चौकशी केली असता समोर आलेली व्यक्ती बनावट असल्याचे उघड झाले. त्यानंतर वंचित बहुजन आघाडीच्या पदाधिकाऱ्यांनी बुधवारी रात्री या बनावट अधिकाऱ्याला पोलिसांच्या ताब्यात दिले.
विठ्ठलवाडी पोलीस ठाण्याचे वरिष्ठ पोलीस निरीक्षक अशोक कोळी यांनी संशयिताला ताब्यात घेतले आहे. त्याने लोकांकडून पैसे घेतल्याची कबुली दिली असून लेखी स्वरूपात पैसे परत करण्याचे आश्वासन दिले आहे. मात्र, अद्याप फसवणूक झालेल्या एकाही व्यक्तीने अधिकृत तक्रार दाखल केलेली नाही.
