रविवार, 15 नोव्हेंबर 2026
Independence Day Modi Speech : 'संशोधन, पेटंट्स आणि मेड इन इंडिया फायटर जेट...' देशासाठी PM मोदींची तरुणांना प्रेरणादायी हाक ( फोटो सौजन्य : सोशल मीडिया)
Independence Day Modi Speech : स्वातंत्र्याच्या ७९ व्या वर्धापनदिनी लाल किल्ल्याच्या तटबंदीवरून पंतप्रधान नरेंद्र मोदी यांनी देशभरातील तरुणांना आत्मनिर्भर भारताच्या दिशेने कार्य करण्याचे जोरदार आवाहन केले. स्वातंत्र्यदिनाच्या या ऐतिहासिक क्षणी त्यांनी देशातील तरुण शास्त्रज्ञ, अभियंते आणि नवप्रवर्तकांना थेट संबोधित करत “भारताचे स्वतःचे मेड इन इंडिया लढाऊ विमान असावे की नाही?” असा प्रेरणादायी प्रश्न उपस्थित केला. पंतप्रधान मोदी यांनी सकाळी ७:३० वाजता राष्ट्रध्वज फडकावून आणि राष्ट्रगीतानंतर देशाला आपले १२वे स्वातंत्र्यदिन भाषण दिले. सुरुवातीला त्यांनी स्वातंत्र्य संग्रामातील बलिदानांची आठवण करून दिली आणि आजचा भारत नव्या संकल्पांनी पुढे जावा, असा संदेश दिला.
मोदी म्हणाले, “देशाचे भविष्य घडवण्याची खरी ताकद आपल्या तरुणांच्या हातात आहे. संशोधन व विकासावर भर दिला पाहिजे. आपली स्वतःची तंत्रज्ञान प्रणाली, पेटंट्स आणि संरक्षण क्षमता निर्माण केली पाहिजे. संकटाच्या काळात उपयुक्त ठरणारी औषधे व तंत्रज्ञान आपणच तयार केले, तरच भारत खऱ्या अर्थाने आत्मनिर्भर बनेल.” त्यांनी हेही सांगितले की, भारताला केवळ संरक्षण साहित्य आयात करणारा देश न राहता, जगाला निर्यात करणारा राष्ट्र बनवायचे आहे. यासाठी विज्ञान, तंत्रज्ञान आणि संरक्षण क्षेत्रातील नवनिर्मिती ही अत्यावश्यक आहे.
हे देखील वाचा : 79वा स्वातंत्र्यदिन आणि इतिहासातील सुवर्णक्षण…वाचा स्वतंत्र भारताच्या पहिल्या टपाल तिकिटाची ‘ही’ अनोखी कहाणी
लाल किल्ल्याच्या तटबंदीवरून पंतप्रधानांनी तरुणांना थेट उद्देशून म्हटले, “तुमच्याकडे कल्पकता आहे, ऊर्जा आहे आणि देश बदलण्याची क्षमता आहे. तुमच्या कल्पनांना संशोधनाची साथ मिळाली तर आपण जगात सर्वोच्च होऊ. तुम्ही बनवलेले ‘मेड इन इंडिया’ लढाऊ विमान भारताच्या आकाशात झेपावेल, तो दिवस दूर नाही.” त्यांनी संशोधन क्षेत्रातील अडथळे दूर करण्यासाठी सरकार सतत प्रयत्नशील असल्याचे सांगितले. तसेच, स्टार्टअप्स, डिफेन्स इनोव्हेशन आणि मेक इन इंडिया उपक्रमांतून तरुणांना मोठ्या संधी मिळत असल्याचे त्यांनी अधोरेखित केले.
पंतप्रधान मोदी यांनी आत्मनिर्भर भारताच्या संकल्पनेचा पुनरुच्चार करत सांगितले की, भारताची प्रगती केवळ आर्थिक नव्हे, तर तंत्रज्ञान, सुरक्षा, आरोग्य, शिक्षण आणि पर्यावरण या सर्व क्षेत्रांतील नवकल्पनांवर आधारित असावी. “आजची पिढी केवळ नोकरी शोधणारी नसून नोकरी निर्माण करणारी बनली पाहिजे. आपण जगाला नवे उपाय, नवे शोध आणि नवे तंत्रज्ञान देणारे राष्ट्र व्हावे,” असे ते म्हणाले.
हे देखील वाचा : 15 August ही तारीख ठरली जागतिक इतिहासाचा प्रवाह बदलणारा दिवस; वाचा ‘या’ 5 ऐतिहासिक घटनांची रंजक कथा
स्वातंत्र्यदिनाच्या या पवित्र दिवशी त्यांनी भूतकाळातील वीरांच्या बलिदानातून प्रेरणा घेऊन भविष्य घडवण्याचे आवाहन केले. लाल किल्ल्याच्या भव्य तटबंदीवरून दिलेला हा संदेश केवळ एक भाषण नव्हे, तर देशाच्या नव्या युगाचा मार्गदर्शक ठरला.
credit : You Tube
