रायगड : रायगड जिल्ह्यातील माणगाव येथे अत्यंत दुर्मिळ असे मूषक हरीण आढळले आहे. येथील व्यापारी कृष्णाभाई गांधी यांच्या दगडी बिल्डिंग मागील गजबजलेल्या परिसरात छोट्या हरीणासारखा (Deer Found in Raigad) प्राणी दिसत असल्याचे त्यांनी माणगांवचे वन्यजीव अभ्यासक शंतनू कुवेसकर यांना फोनवरून सांगितले. त्यानंतर कुवेसकर आणि त्यांच्या सहकाऱ्यांनी तातडीने धाव घेत या हरणाला ताब्यात घेतले.
मूषक हरीण हे अत्यंत दुर्मिळ असे हरीण आहे. नेहमीच मनुष्यवस्तीपासून दूर जंगलात राहणारा वन्यजीव आहे. वेळप्रसंगी खूप चपळतेने हे हरीण पळते. हे हरीण जेव्हा गांधी यांना दिसले तेव्हा त्यांनी कुवेसकर यांना सांगितले तेव्हा त्यांचे सहकारी मित्र शुभांकर वनारसे यांनी प्रत्यक्ष ठिकाणी दाखल होत पाहणी केली. वन विभागाला देखील माहिती दिली. वनविभागाची टीम देखील बोलावण्यात आली. पण हे हरीण दिसले नाही. मात्र, बुधवारी (दि.26) पुन्हा हा प्राणी या ठिकाणी आला असल्याची माहिती गांधी यांनी दिली. त्यानंतर त्याला पकडण्यात आले.
अत्यंत दुर्मिळ हरीण आले कसे?
चारही दिशेने लोकवस्तीने गजबजलेल्या बाजारपेठ परिसरात हे अत्यंत लाजरे हरीण पुराच्या पाण्यामुळे चुकून अडकून राहिले असल्याचे निदर्शनास आले. परिसरात आजूबाजूला भटक्या कुत्र्यांचा मोठा वावर आणि समोरील मुंबई-गोवा महामार्ग त्यामुळे त्याचा तातडीने बचाव करण्यात आला.
