मुंबई : महाराष्ट्राच्या राजकारणातील नाट्यमय घडामोडींनतर एकनाथ शिंदे यांनी गुरुवारी राज्याचे मुख्यमंत्री म्हणून शपथ घेतली. तर देवेंद्र फडणवीस यांनी यावेळी उपमुख्यमंत्रिपदाची शपथ घेतली. राज्यपाल भगतसिंह कोश्यारी यांनी मुख्यमंत्री व उपमुख्यमंत्री पदाची शपथ दिली. महाराष्ट्राचा हा राजकीय खेळ मुख्यमंत्री एकनाथ शिंदे यांनी जिंकल्याचे मानले जात आहे. दरम्यान अशातच मुख्यमंत्री शिंदे यांनी महत्वाचं विधान केलं आहे.
एकनाथ शिंदे नेमकं काय म्हणाले?
शिवसेनेचे बंडखोर नेते एकनाथ शिंदे यांनी काल मुख्यमंत्रिपदाची शपथ घेतली. हा बाळासाहेब ठाकरेंच्या हिंदुत्त्वाचा विजय असल्याचं एकनाथ शिंदे म्हणाले. आज केवळ माझ्याच सहकाऱ्यांना आनंद झालेला नाही, तर संपूर्ण महाराष्ट्राला आनंद झाला आहे. कारण बाळासाहेब ठाकरेंचा शिवसैनिक मुख्यमंत्री झाला आहे, असं शिंदेंनी म्हटलं.
पुढे बोलताना शिंदे म्हणाले की, आमच्या आमदारांनी इतिहास रचला. माझ्यासोबत असलेल्या सर्व ५० आमदारांचं मी अभिनंदन करतो. भाजपचेही आभार मानतो. त्यांच्यासोबत ११५ आमदार असतानाही त्यांनी शिवसैनिकाला पाठिंबा देण्याचा निर्णय घेतला, असं शिंदे म्हणाले. तुम्ही मातोश्रीवर केव्हा जाणार असा प्रश्न यावेळी शिंदेंना विचारण्यात आला. त्यावर जेव्हा वेळ येईल, तेव्हा मातोश्रीवर जाईन. तुम्हाला कळेलच, असं उत्तर शिंदेंनी दिलं.
[read_also content=”फडणवीसांनी उपमुख्यमंत्री पदाची शपथ घेतल्यानंतर अमृता फडणवीसांचं पहिलं ट्विट, नेमकं काय म्हणाल्या? https://www.navarashtra.com/maharashtra/amrita-fadnaviss-first-tweet-after-fadnavis-was-sworn-in-as-deputy-chief-minister-what-exactly-did-she-say-nrdm-299400.html”]
मी गेल्या अडीच वर्षांत आमदारांना कसा निधी मिळतो ते पाहिलं आहे. आता या ५० आमदारांच्या मतदारसंघांना पुरेसा निधी मिळेल याची काळजी मी घेईन. माझ्यासोबत असलेल्या ५० आमदारांनी माझ्यावर विश्वास दाखवला. आम्ही बाळासाहेबांच्या विचारधारेनं मार्गक्रमण करू. अन्याय न करण्याची शिकवण बाळासाहेब आणि आनंद दिघेंनी मला दिली आहे, असं शिंदे म्हणाले. तसेचं आम्ही विधानसभेत शिवसेना म्हणून काम करू. आम्ही महाराष्ट्राच्या विकासासाठी काम करू. बहुमत चाचणी आता केवळ औपचारिकता आहे. आमच्यासोबत १७५ आमदार आहेत. एकाचवेळी ५० आमदारांनी सत्तेतून बाहेर पडणं ऐतिहासिक आहे, असं शिंदेंनी म्हटलं.
