Vishwambhara Teaser (Photo Credit- X)
Chiranjeevi Birthday: मेगास्टार चिरंजीवी (Chiranjeevi) २२ ऑगस्ट रोजी आपला ७०वा वाढदिवस साजरा करणार आहेत. वाढदिवसाच्या एक दिवस आधीच त्यांनी चाहत्यांना एक खास भेट देण्याचे वचन दिले होते, आणि आता त्यांनी ते पूर्णही केले आहे. चिरंजीवींच्या बहुप्रतिक्षित ‘विश्वंभरा’ चित्रपटाचा टीझर (Vishwambhara Teaser) रिलीज करण्यात आला आहे. हा टीझर रिलीज होताच तो यूट्यूबवर ट्रेंड करत आहे.
१ मिनिट १४ सेकंदांच्या या टीझरमध्ये चिरंजीवी एका वेगळ्या आणि दमदार भूमिकेत दिसत आहेत. टीझरवरून असे दिसते की, चित्रपटाची कथा भगवान महादेव आणि त्यांच्या शक्तींभोवती फिरते. टीझरमधील भव्य सेट आणि जबरदस्त ॲक्शन सीक्वेंस पाहता, हा चित्रपट खूपच मोठ्या बजेटचा असल्याचे स्पष्ट होते.
‘विश्वंभरा’ च्या टीझरची सुरुवात एका लहान मुलाच्या आणि एका वृद्ध व्यक्तीच्या संवादाने होते. ते दोघे ‘विश्वंभरा’च्या जगात घडलेल्या भयानक घटनांविषयी बोलत आहेत. वृद्ध व्यक्ती एका अशा माणसाचा उल्लेख करते, ज्याच्या लोभामुळे या जगात महाविनाश होतो. त्याच वेळी, एका रक्षकाची एंट्री होते, आणि हा रक्षक म्हणजे दुसरे कोणी नसून, मेगास्टार चिरंजीवी आहेत. टीझरमध्ये चिरंजीवींचा हा ‘रक्षक’ खलनायकांशी लढताना दिसत आहे.
‘विश्वंभरा’ हा एक आगामी तेलुगू चित्रपट आहे. यात चिरंजीवींसोबत तृषा कृष्णन, कुणाल कपूर, आशिका रंगनाथ आणि इतर कलाकार आहेत. चित्रपटाचे दिग्दर्शन वशिष्ठ करत असून, संगीत प्रसिद्ध संगीतकार एम.एम. कीरवाणी यांनी दिले आहे. या चित्रपटाची निर्मिती यूवी क्रिएशन्स (UV Creations) बॅनरखाली झाली आहे. विशेष म्हणजे, बॉलिवूड अभिनेता कुणाल कपूर या चित्रपटात नकारात्मक भूमिकेत दिसणार आहे.
या चित्रपटाचा टीझर रिलीज करण्यापूर्वी चिरंजीवींनी इन्स्टाग्रामवर एक पोस्ट शेअर केली होती. त्यांनी म्हटले होते की, काही वैयक्तिक कारणांमुळे चित्रपटाच्या दुसऱ्या भागाच्या शूटिंगला विलंब झाला, पण आता सर्व काही व्यवस्थित आहे. चिरंजीवींच्या वाढदिवसाच्या निमित्ताने हा टीझर रिलीज झाल्यामुळे चाहत्यांमध्ये उत्साहाचे वातावरण आहे. या चित्रपटाद्वारे चिरंजीवी प्रेक्षकांना एका नव्या सिनेमॅटिक जगात घेऊन जाण्याचे आश्वासन देत आहेत.
