भारताचे आंतरराष्ट्रीय उड्डाण! कुवेतच्या मागणीला सकारात्मक प्रतिसाद, विमानांमध्ये वाढवल्या ५० टक्के जागा ( फोटो सौजन्य : सोशल मीडिया)
India Kuwait flight Agreement : भारत आणि कुवेत यांच्यातील द्विपक्षीय हवाई सेवा करारात मोठी वाढ करण्यात आली असून, आता दर आठवड्याला ५० टक्क्यांनी जास्त जागा उपलब्ध करून देण्यात आल्या आहेत. या निर्णयामुळे भारत आणि कुवेतमधील हवाई वाहतुकीला प्रचंड गती मिळणार आहे आणि प्रवाशांसाठी अधिक सोयीच्या उड्डाणांची सुविधा निर्माण होणार आहे.
२००७ नंतर प्रथमच कुवेतला मोठ्या प्रमाणात उड्डाण जागा मिळाल्या आहेत. यापूर्वी आठवड्याला दोन्ही देशांना एकूण १२,००० प्रवासी जागांचा वापर करता येत होता. आता या संख्येत ५०% वाढ होऊन ती १८,००० वर पोहोचली आहे. या ऐतिहासिक करारावर भारताचे नागरी विमान वाहतूक सचिव समीर कुमार सिन्हा आणि कुवेतच्या DGCA चे अध्यक्ष शेख हमुद अल-मुबारक यांनी स्वाक्षऱ्या केल्या.
सध्या भारत आणि कुवेतमधील विमान कंपन्या मिळून सुमारे दररोज ४० उड्डाणे करत आहेत. यामध्ये कुवेत एअरवेज सर्वाधिक ५४ साप्ताहिक उड्डाणांसह आघाडीवर आहे, तर त्यानंतर इंडिगो ३६ उड्डाणांसह दुसऱ्या क्रमांकावर आहे. याशिवाय एअर इंडिया एक्सप्रेस, अकासा आणि जझीरा एअरवेजही या मार्गावर नियमित सेवा देत आहेत. कुवेतने भारताकडे मागणी केली होती की, दोन्ही देशांतील वाढती प्रवासी मागणी लक्षात घेऊन हवाई सेवा कराराचे प्रमाण वाढवावे. ही मागणी भारताने मान्य केली आणि नव्याने ६,००० जागा वाढवल्या.
जागतिक घडामोडी संबंधित बातम्या वाचण्यासाठी येथे क्लिक करा : ना मुस्लिम ना ख्रिश्चन, मग कोण आहेत ड्रुझ? 8 लाख लोकसंख्या असलेला ‘गुप्त’ धर्म, ज्यासाठी इस्रायलने चढवला सीरियावर हल्ला
२०१४ पासून मोदी सरकारने भारतीय विमान कंपन्यांच्या हितासाठी एक धोरणात्मक दृष्टीकोन स्वीकारला आहे. सरकारचा उद्देश म्हणजे भारतीय कंपन्यांचा आंतरराष्ट्रीय हवाई वाहतुकीतील वाटा वाढवणे. हे करण्यासाठी सरकारने मोठ्या प्रमाणात भांडवली गुंतवणूक करत देशातील विमानतळांचे आधुनिकीकरण केले आहे.
या धोरणाच्या महत्त्वाच्या टप्प्यांमध्ये खालील गोष्टींचा समावेश आहे:
एअर इंडिया आणि एअर इंडिया एक्सप्रेसचे निर्गुंतवणूक
नव्या विमान कंपन्यांना संधी देणे – जसे की अकासा
इंडिगोला जगभर विस्तार करण्यास मदत
नव्या द्विपक्षीय करारांसाठी पुढाकार: व्हिएतनाम, थायलंड, इंडोनेशिया, उझबेकिस्तान
हे सर्व पावले भारताला एक जागतिक विमान वाहतूक केंद्र बनवण्यासाठी उचलले जात आहेत.
कुवेतसारख्या देशातून भारतात कामासाठी आणि पर्यटनासाठी मोठ्या प्रमाणात प्रवासी येतात. त्यामुळे अधिक जागा मिळाल्यामुळे नवे मार्ग उघडतील, अधिक फेऱ्या वाढतील आणि तिकीटांचे दरही नियंत्रणात राहतील, असा अंदाज आहे. या करारामुळे भारतात खासकरून केरळ, महाराष्ट्र, उत्तर प्रदेश, बिहार आणि तामिळनाडूतून कुवेतमध्ये कामासाठी जाणाऱ्या लोकांना मोठा फायदा होणार आहे. आता उड्डाणांच्या संख्येत वाढ झाल्याने प्रवाशांना वेळेनुसार आणि कमी खर्चात विमानसेवा मिळू शकणार आहे.
जागतिक घडामोडी संबंधित बातम्या वाचण्यासाठी येथे क्लिक करा : एका भाजी विक्रेत्याच्या मारहाणीने पेटले Israel-Syria War! 300 मृत्यूंच्या घटनेमागे लपलेली खरी कहाणी
या नवीन करारामुळे भारताच्या नागरी विमान वाहतूक क्षेत्राला एक नवे उभारी मिळेल. केवळ कुवेतच नव्हे तर इतर मध्यपूर्व देशांशीही असेच करार होत आहेत. यामुळे भारताचे जागतिक स्तरावरचे विमान वाहतुकीतले स्थान अधिक बळकट होणार आहे. शेवटी एकच सांगता येईल – भारत आता फक्त ‘लँड ऑफ टॅलेंट’ नाही, तर ‘लँड ऑफ ट्रॅव्हल हब’ होण्याच्या दिशेने भक्कम पाऊल टाकत आहे.
