मॉस्को विमानतळावर युक्रेनी ड्रोन हल्ला; भारतीय खासदारांचे विमान हवेतच अडकले

Ukrainian drone attack Moscow : रशियाच्या राजधानीत भारतीय खासदारांचे शिष्टमंडळ दाखल होण्याआधीच युक्रेनने मॉस्कोवर जोरदार ड्रोन हल्ला केला, ज्यामुळे एकच खळबळ उडाली. भारतीय शिष्टमंडळाचे विमान मॉस्को विमानतळावर उतरण्याच्या तयारीत असतानाच हल्ला झाला आणि सर्व लँडिंग थांबवण्यात आली, त्यामुळे हे विमान काही मिनिटे हवेतच प्रदक्षिणा घालत राहिले.

या प्रतिनिधी मंडळाचं नेतृत्व द्रमुक खासदार कनिमोई करत आहेत. हे खासदार पाकिस्तानमधील दहशतवादाचा पर्दाफाश करण्यासाठी रशियाच्या दौऱ्यावर गेले आहेत. त्यांचा उद्देश रशियन सरकार, वरिष्ठ खासदार, अधिकारी आणि तज्ज्ञांना पाकिस्तानमधून वाढणाऱ्या दहशतवादी कारवायांविषयी माहिती देणे हा आहे.

युक्रेनकडून साखळी ड्रोन हल्ले, विमानतळ तातडीने बंद

घटनाक्रमानुसार, भारतीय खासदारांचे विमान मॉस्कोमध्ये उतरण्याच्या क्षणाला, युक्रेनने रशियावर मोठ्या प्रमाणात ड्रोन हल्ले सुरु केले. हल्ल्याच्या तीव्रतेमुळे रशियन सुरक्षा यंत्रणांनी तत्काळ सर्व विमानतळांवरील उड्डाण आणि लँडिंग थांबवण्याचा निर्णय घेतला. रशियन संरक्षण मंत्रालयाने नंतर म्हटले की, फक्त २२ मे रोजी त्यांनी २५० हून अधिक युक्रेनियन ड्रोन पाडले. ही आकडेवारी पाहता, युक्रेनकडून चालवली जाणारी ही हल्ल्यांची रणनीतिक मालिका असल्याचे स्पष्ट होते.

जागतिक घडामोडी संबंधित बातम्या वाचण्यासाठी येथे क्लिक करा : जर हार्वर्डमधील राहायचे असेल तर! भारतीयांसह परदेशी विद्यार्थ्यांना 72 तासांच्या आत पूर्ण कराव्या लागणार ‘या’ 6 अटी

भारतीय विमानाची हवेत प्रदक्षिणा, अखेर सुखरूप लँडिंग

भारतीय खासदारांचे विमान हल्ला सुरू असताना मॉस्कोच्या हवाई क्षेत्रातच अडकले होते. लँडिंगसाठी हिरवा सिग्नल मिळेपर्यंत, विमानाला हवेतच फिरत राहावे लागले. ही वेळ विशेषतः चिंतेची होती, कारण शिष्टमंडळात अनेक वरिष्ठ नेते होते. हल्ल्याच्या काही वेळानंतर परिस्थिती नियंत्रणात आल्यानंतर, विमान सुखरूपपणे मॉस्को विमानतळावर उतरले.

भारतीय राजदूतांचे स्वागत, महत्त्वपूर्ण संवाद सुरू

विमान उतरल्यावर मॉस्कोमधील भारतीय राजदूत विनय कुमार यांनी शिष्टमंडळाचे मनापासून स्वागत केले. त्यानंतर शिष्टमंडळाने आपल्या दौऱ्याला सुरुवात केली. कनिमोई यांनी माध्यमांशी बोलताना सांगितले की, “भारत आणि रशियाचे संबंध ऐतिहासिक आणि मजबूत आहेत. पाकिस्तानमधील दहशतवाद आता जागतिक धोका बनत आहे. आम्ही रशियन नेत्यांना याची सविस्तर माहिती देणार आहोत.”

पुतिन यांची चिंता व्यक्त, युक्रेनचे उद्दिष्ट रशियाला अलग करणे

रशियाचे अध्यक्ष व्लादिमीर पुतिन यांनी अलीकडेच डोनाल्ड ट्रम्प यांच्याशी झालेल्या चर्चेत चिंता व्यक्त केली होती की, जेव्हा जेव्हा एखादे विदेशी शिष्टमंडळ रशियात येते, तेव्हा युक्रेन ड्रोन हल्ला करतो. पुतिन यांच्या म्हणण्यानुसार, युक्रेनचे उद्दिष्ट रशियाला आंतरराष्ट्रीय स्तरावर अलग ठेवणे आणि लोकांमध्ये भीती पसरवणे हे आहे.

युक्रेनकडून कोणतीही प्रतिक्रिया नाही

या घटनेवर युक्रेन सरकारकडून अजून कोणतीही अधिकृत प्रतिक्रिया आलेली नाही. मात्र, ‘द कीव इंडिपेंडेंट’ या माध्यमाने दावा केला आहे की, रशियाने ड्रोन हल्ल्यांच्या भीतीमुळे तीन प्रमुख विमानतळ बंद केले आहेत. ही कृती नागरिक आणि आंतरराष्ट्रीय प्रतिनिधींना धोका पोहोचवण्याच्या दिशेने असल्याचे रशियन अधिकाऱ्यांचे म्हणणे आहे.

जागतिक घडामोडी संबंधित बातम्या वाचण्यासाठी येथे क्लिक करा : ‘जग सध्या अशांततेच्या गर्तेत…’ परराष्ट्रमंत्री जयशंकर यांचा अमेरिकेवर, पाकिस्तानवर आणि जागतिक अस्थिरतेवर तीव्र हल्लाबोल

 रशिया दौऱ्याची सुरुवात थरारक, पण उद्दिष्ट ठाम

भारतीय खासदारांचे मॉस्को दौऱ्याच्या सुरुवातीलाच धक्कादायक अनुभव आला असला, तरी त्यांनी आपले उद्दिष्ट ठाम ठेवले आहे. पाकिस्तानच्या दहशतवादी नेटवर्कविरुद्ध भारताची आंतरराष्ट्रीय जनजागृती मोहीम सुरूच असून, रशियातील चर्चा या लढ्याचा महत्त्वाचा टप्पा ठरणार आहे. या घटनेमुळे रशिया-युक्रेन संघर्षाचे परिमाण किती दूर जाऊ शकते, हेही जगासमोर अधोरेखित झाले आहे.