शुक्रवार, 23 ऑक्टोबर 2026
फोटो सौजन्य - Social Media
न्यायालयीन सेवेत करिअर करण्याची इच्छा असणाऱ्या उमेदवारांसाठी ही सुवर्णसंधी आहे. मुंबई उच्च न्यायालयात स्टेनोग्राफर पदासाठी एकूण 12 जागांवर भरती जाहीर करण्यात आली आहे. या भरतीसाठी अर्ज प्रक्रिया 27 ऑक्टोबर 2025 पासून सुरू झाली असून अर्ज करण्याची अंतिम तारीख 10 नोव्हेंबर 2025 आहे. उमेदवारांनी अधिकृत वेबसाइट bombayhighcourt.nic.in वर जाऊन ऑनलाइन अर्ज करावा. पात्रतेनुसार उमेदवारांकडे मान्यताप्राप्त विद्यापीठाची पदवी असणे आवश्यक आहे.
तसेच, उच्च न्यायालय किंवा इतर कोणत्याही न्यायालयात किमान 5 वर्षांचा कनिष्ठ स्टेनोग्राफर म्हणून अनुभव असल्यास काही अटींमध्ये सूट मिळू शकते. कायद्याची पदवी असणाऱ्या उमेदवारांना प्राधान्य दिले जाणार आहे. आवश्यक कौशल्यांमध्ये इंग्रजी लघुलेखनात प्रति मिनिट 100 शब्द आणि इंग्रजी टायपिंगमध्ये 40 शब्द गती असणे गरजेचे आहे. उमेदवाराने महाराष्ट्र राज्य परीक्षा परिषद (MSCE) ची GCC-TBC परीक्षा उत्तीर्ण केलेली असावी. वयोमर्यादा 21 ते 43 वर्षांदरम्यान निश्चित करण्यात आली असून, राखीव प्रवर्गातील उमेदवारांना शासनाच्या नियमानुसार वयोसवलत मिळेल.
निवड प्रक्रियेत इंग्रजी लघुलेखन चाचणी, टायपिंग चाचणी आणि मुलाखत अशा तीन टप्प्यांचा समावेश आहे. लघुलेखन चाचणीत इंग्रजीतील दोन परिच्छेदांचे श्रुतलेखन व ट्रान्सक्रिप्शन घ्यावे लागेल, तर टायपिंग चाचणीत 10 मिनिटांत 400 शब्द टाईप करणे आवश्यक असेल. अंतिम टप्प्यातील मुलाखतीत उमेदवाराचे संवादकौशल्य, आत्मविश्वास आणि व्यक्तिमत्त्व तपासले जाईल. निवड झालेल्या उमेदवारांना ₹56,100 ते ₹1,77,500 या पगारश्रेणीनुसार वेतन आणि शासकीय भत्ते मिळतील.
अर्ज शुल्क ₹1,000 ठेवण्यात आले आहे. अर्ज करण्यापूर्वी सर्व आवश्यक कागदपत्रे नीट तपासून अर्ज सादर करावा. ही भरती न्यायालयीन क्षेत्रात स्थिर, प्रतिष्ठित आणि दीर्घकालीन करिअर मिळवण्याची एक उत्तम संधी ठरणार आहे.
