Maharashtra Breaking News Updates Today:मनोज जरांगे पाटील आजपासून पुन्हा आमरण उपोषणावर 

30 May 2026 10:57 AM (IST)

तुला जिवंत राहू देणार नाही’; सततच्या धमक्या, बेदम मारहाण

सोलापूर येथून एक संतापजनक आणि हृदयद्रावक घटना समोर आली आहे. एका महिलेसोबत असलेल्या प्रेमसंबंधाच्या संशयावरून एका २१ वर्षीय तरुणाला वारंवार बेदम मारहाण आणि सततच्या धमक्या देत मानसिक त्रास देण्यात आल्याचे समोर आले आहे. या छळाला कंटाळून अखेर या तरुणाने लिंबाच्या झाडाला गळफास घेत आत्महत्या केली. त्याने आत्महत्या करण्यापूर्वी सुसाईड नोट आणि हातावर आरोपींची नावे लिहून ठेवली.

30 May 2026 10:47 AM (IST)

मुंबईत CNG च्या दरात पुन्हा वाढ; तब्बल ‘इतक्या’ रुपयांनी महागला गॅस

इराण-अमेरिका संघर्षामुळे सध्या तणावाचे वातावरण आहे. या तणावामुळे इंधनाचे दरही चांगलेच वाढले आहेत. पेट्रोल-डिझेल, खाद्यतेलच्या दरात वाढ झाली आहे. असे असताना आता मुंबईत सीएनजीच्या दरातही दोन रुपयांची वाढ झाली आहे. याचा फटका वाहनधारकांना होणार आहे

30 May 2026 10:37 AM (IST)

खेळात रस आहे? १० वी-१२ वीनंतर स्पोर्ट्स आणि फिटनेस इंडस्ट्रीत करिअर करुन बक्कळ पैसा

स्पोर्ट आणि फिटनेस या क्षेत्राकडे पाहण्याचा तरुणाईचा दृष्टीकोण बदलला आहे. आज एखादा खेळाडू घडण्यामागे एक मोठी टीम असते. कोच जो रणनीती शिकवतो. फिजिओथेरपिस्ट जो खेळाडूला दुखापतीतून रिकव्हर व्हायला मदत करतो. स्पोर्ट सायकोलॉजिस्ट जो मानसिक ताकद वाढवतो तसेच कमेंटेटर जो खेळ लोकांपर्यंत पोहचवतो. स्पोर्टमध्ये खेळाडूशिवाय असिस्टंट कोच, स्पोर्ट्स फिजिओथेरपिस्ट, स्पोर्ट्स सायकोलॉजिस्ट, रेफरी किंवा अंपायर स्पोर्ट्स अ‍ॅनालिस्ट, कमेटेंटर, स्पोर्ट जर्नालिस्ट होऊ शकता. याशिवाय स्पोर्ट्स मॅनेजमेंटमध्ये इव्हेंट मॅनेजर, टीम मॅनेजर, टॅलेंट स्काऊट किंवा स्पोर्ट्स अ‍ॅडमिनिस्ट्रेटर अशा भूमिका उपलब्ध असतात.

30 May 2026 10:27 AM (IST)

सावध रहा! १५ राज्ये, ताशी ९० किमी वेगाने वाहणार वादळी वारे

राज्यासह देशातील हवामानात मोठा बदल होण्याची शक्यता वर्तवण्यात आली आहे. उत्तर भारतासह १५ राज्याना चक्रीवादळासह अतिमुसळधार पावसाचा इशारा देण्यात आला आहे. 30 मे पासून उत्तर प्रदेश, बिहार, मध्य प्रदेशसह 15 राज्यांना हा इशारा देण्यात आला आहे. इतकेच नव्हे तर पावसासह ताशी ९० किलोमीटर वेगाने वाऱ्यासह वादळी वारे वाहतील. त्यामुळे हवामान विभागाने या काळात नागरिकांना सतर्कतेचा इशारा दिला आहे.

30 May 2026 10:17 AM (IST)

शेवटपर्यंत लढला अन्…डोळ्यात आले पाणी; फायनलचे स्वप्नं भंंगले, Vaibhav Sooryavanshi

IPL 2026 च्या क्वालिफायर २ मध्ये, गुजरात टायटन्सने राजस्थान रॉयल्सला ७ गडी राखून पराभूत करून अंतिम फेरीत आपले स्थान निश्चित केले. ३१ मे रोजी होणाऱ्या विजेतेपदाच्या सामन्यात गुजरातचा सामना गतविजेत्या रॉयल चॅलेंजर्स बंगळूरशी होईल. राहुल तेवतियाने ब्रिजेश शर्माच्या गोलंदाजीवर षटकार मारताच, मैदानावर असे दृश्य घडले, ज्याने लाखो क्रिकेट चाहत्यांची मने हेलावून टाकली. राजस्थान रॉयल्सचे अंतिम फेरीत पोहोचण्याचे स्वप्न भंगल्याने, संघाचा १५ वर्षीय सलामीवीर फलंदाज, वैभव सूर्यवंशी, अश्रू ढाळत होता. संपूर्ण हंगामात राजस्थानच्या फलंदाजीचा कणा राहिलेल्या या स्टार खेळाडूचा खिन्न चेहरा आणि डोळ्यांतील अश्रू या पराभवाची तीव्र वेदना स्पष्टपणे दर्शवत होते. आपल्या जादुई फलंदाजीने अत्यंत अनुभवी गोलंदाजांनाही झोडपून काढणारा हा स्फोटक फलंदाज, निराश होऊन डगआऊटमध्ये एकटाच बसला होता.

30 May 2026 10:07 AM (IST)

लांब केस, दाट दाढी अन्…, विनोदी भूमिकांनंतर आता साधूच्या भूमिकेत

मराठी चित्रपटसृष्टीत सध्या तुंबाडची मंजुळा या आगामी चित्रपटाची जोरदार सुरू आहे.खर तर ही मंजुळा दक्षिणात्या चित्रपटसृष्टीतून मराठीत आली आहे.कन्नडमधील गाजलेल्या सू फ्रॉम सो’ या चित्रपटाचा हा मराठी रिमेक असल्याची ही चर्चा सुरू आहे

चित्रपटासह या चित्रपटातील अजून एका गोष्टीची चर्चा रंगली आहे. ती म्हणजे मराठी चित्रपटसृष्टीतील आपल्या खास विनोदी शैलीने प्रेक्षकांच्या मनात घर करणारे मकरंद अनासपुरे यांच्या भूमिकेची. लोकप्रिय अभिनेता मकरंद अनासपुरे पुन्हा एकदा नव्या आणि लक्षवेधी अवतारात प्रेक्षकांसमोर येणार आहेत. या चित्रपटात ते एका साधूच्या भूमिकेत झळकणार असून, त्यांच्या या लूकची सध्या जोरदार चर्चा रंगताना दिसत आहे.

30 May 2026 09:57 AM (IST)

TATA चा मोठा धमाका! अवघ्या 4.69 लाखांत नवी Tiago Facelift लाँच

भारतात अखेर 2026 TATA Tiago Facelift लाँच करण्यात आली आहे. वाहन निर्माता कंपनीने 4.69 लाख रुपयांच्या सुरुवातीच्या एक्स शोरुम किंमतीत ही गाडी लाँच केली आहे. कंपनीने या गाडीमध्ये अनेक बदल केले आहेत. मात्र त्याच्या पावरट्रेनमध्ये कोणताही बदल करण्यात आला नाही.

30 May 2026 09:55 AM (IST)

Russia Afghanistan Military Pact: रशिया आणि अफगाणिस्तानच्या तालिबान सरकारमध्ये लष्करी करार 

Russia Afghanistan Military Pact:  मॉस्को: आंतरराष्ट्रीय राजकारणात रशिया हा भारताचा अत्यंत विश्वासू, जवळचा आणि जुना मित्र मानला जातो. प्रत्येक कठीण प्रसंगात रशियाने नेहमीच भारताला सुरक्षेच्या दृष्टीने आवश्यक असलेले आधुनिक संरक्षण तंत्रज्ञान (Defense Technology) पुरवून ही मैत्री अधिक दृढ केली आहे. मात्र, आता रशियाने आशिया खंडातील आणखी एका देशासोबत असाच एक मोठा करार करून जागतिक राजकारणात खळबळ उडवून दिली आहे. रशियाने आता थेट अफगाणिस्तानच्या तालिबान सरकारसोबत लष्करी सहकार्य करार (Military Cooperation Pact) केला आहे.

30 May 2026 09:47 AM (IST)

Todays Gold-Silver Price: सोने आणि चांदी दोन्ही तेजीत

Gold Rate Today: भारतात 30 मे रोजी 24 कॅरेट सोन्याच्या प्रति ग्रॅमचा दर 15,765 रुपये, 22 कॅरेट सोन्याच्या प्रति ग्रॅमचा दर 14,451 रुपये आणि 18 कॅरेट सोन्याच्या प्रति ग्रॅमचा दर 11,824 रुपये आहे. भारतात 30 मे रोजी 22 कॅरेट सोन्याच्या प्रति 10 ग्रॅमचा दर 1,44,510 रुपये, 24 कॅरेट सोन्याच्या प्रति 10 ग्रॅमचा दर 1,57,650 रुपये आणि 18 कॅरेट सोन्याच्या प्रति 10 ग्रॅमचा दर 1,18,240 रुपये आहे. भारतात 30 मे रोजी चांदीचा भाव प्रति ग्रॅम 280.10 रुपये आणि प्रति किलोग्रॅम 2,80,100 रुपये आहे.

30 May 2026 09:15 AM (IST)

US-Iran Deal: ‘तुमच्या कुटुंबाला माझा…’ डोनाल्ड ट्रम्प यांनी घेतली सिच्युएशन रूममध्ये तातडीची बैठक

US Iran Situation Room Meeting Update : जागतिक राजकारणातून आणि विशेषतः मध्यपूर्वेतून (Middle East) या घडीची सर्वात मोठी आणि जगाचे लक्ष वेधून घेणारी बातमी समोर आली आहे. अमेरिकेचे राष्ट्राध्यक्ष डोनाल्ड ट्रम्प यांनी इराण आणि आंतरराष्ट्रीय सुरक्षेच्या दृष्टीने अत्यंत संवेदनशील मानल्या जाणाऱ्या ‘होर्मुझच्या सामुद्रधुनी’बाबत (Strait of Hormuz) एक ऐतिहासिक आणि धक्कादायक विधान केले आहे. ट्रम्प यांनी जाहीर केले आहे की, अमेरिका इराणवरील आपली अभूतपूर्व नौदल नाकेबंदी आता उठवणार आहे. परंतु, यासाठी अमेरिकेने इराणसमोर अण्वस्त्रांचा कायमचा त्याग करण्याची अत्यंत कडक अट ठेवली होती, ज्यावर आता सकारात्मक घडामोडी घडताना दिसत आहेत. ट्रम्प यांच्या या भूमिकेनंतर जागतिक बाजारातील खनिज तेलाच्या किमती आणि आंतरराष्ट्रीय व्यापाराला मोठा दिलासा मिळण्याची शक्यता आहे.

30 May 2026 09:10 AM (IST)

LIC Share Bonus: शेअर बाजारात LIC चा शेअर ५० टक्के घसरल्याचे दिसल्याने खळबळ 

LIC Share Bonus:  शेअर बाजारात आज (२९ मे) भारतीय आयुर्विमा महामंडळाचा (LIC) शेअर पहिल्या नजरेत तब्बल ५० टक्क्यांनी घसरलेला दिसल्याने गुंतवणूकदारांमध्ये काही काळ चिंतेचे आणि आश्चर्याचे वातावरण निर्माण झाले होते. मात्र, प्रत्यक्षात हा शेअर इतका मोठा घसरलेला नाही. हा बदल कंपनीने जाहीर केलेल्या १:१ (1:1) गुणोत्तरातील बोनस शेअर (Bonus Share) आणि त्यानंतर शेअरच्या किंमतीत झालेल्या समायोजनामुळे (Price Adjustment) झाला आहे.

30 May 2026 09:05 AM (IST)

IPL 2026: राजस्थान रॉयल्सचा प्रवास संपला,फायनल गाठल्यानंतर वैभव सूर्यवंशी भावूक

चंदीगड: आयपीएल २०२६ (IPL 2026) चा हा संपूर्ण सीजन ज्या एका खेळाडूने आपल्या अद्भूत फलंदाजीने गाजवला, तो म्हणजे राजस्थान रॉयल्सचा युवा फलंदाज वैभव सूर्यवंशी. मागच्या सीजनमध्ये पदार्पण (Debut) करणाऱ्या या खेळाडूने यंदाच्या हंगामात अशी काही खणखणीत फलंदाजी केली की, त्याला रोखणे जगातील कोणत्याही गोलंदाजाला जमले नाही. मात्र, काल चंदीगडच्या स्टेडियमवर राजस्थान रॉयल्सचे (Rajasthan Royals) यंदाच्या आयपीएलमधील आव्हान संपुष्टात आले, ज्यामुळे दमदार कामगिरी करूनही वैभव सूर्यवंशी कमालीचा भावूक झाल्याचे पाहायला मिळाले.

30 May 2026 09:00 AM (IST)

Cyclone and Heavy Rain Alert: १५ राज्यांत चक्रीवादळासह अतिमुसळधार पावसाचा इशारा 

Cyclone and Heavy Rain Alert:  देशासह राज्याच्या हवामानात सध्या अत्यंत मोठा आणि वेगवान बदल होत असल्याचे पाहायला मिळत आहे. मान्सून देशात लवकरच दाखल होण्याचे संकेत मिळत असतानाच, दुसरीकडे अवकाळी पावसाने (Unseasonal Rain) आणि चक्रीवादळाच्या (Cyclone) संकटाने देशातील अनेक भागांत मोठा धुमाकूळ घातला आहे. भारतीय हवामान विभागाने अनेक राज्यांमध्ये अतिमुसळधार पावसाचा इशारा जारी केला आहे.

 हवामान विभागाने दिलेल्या माहितीनुसार, ३० मे २०२६ रोजी उत्तर प्रदेश, बिहार, मध्य प्रदेश या प्रमुख राज्यांसह देशातील एकूण १५ राज्यांमध्ये वादळी वाऱ्यासह मुसळधार पावसाचा इशारा देण्यात आला आहे.

30 May 2026 08:55 AM (IST)

TET Exam Deadline Extended: सर्वोच्च न्यायालयाचा मोठा निर्णय; शिक्षकांना 'टीईटी'साठी मुदतवाढ 

TET Exam Deadline Extended: देशातील शिक्षक आणि शिक्षण वर्तुळातून एक अत्यंत महत्त्वाची बातमी समोर आली आहे. शिक्षकांसाठी अनिवार्य असलेली टीईटी (Teacher Eligibility Test - शिक्षक पात्रता परीक्षा) उत्तीर्ण करण्यासाठी सर्वोच्च न्यायालयाने (Supreme Court) अखेर एक वर्षाची मुदतवाढ दिली आहे. न्यायालयाच्या या निर्णयामुळे शिक्षकांना ही परीक्षा उत्तीर्ण करण्यासाठी आता नवीन वाढीव मुदत मिळाली आहे.

आता ३१ ऑगस्ट २०२८ पर्यंत मुदत सर्वोच्च न्यायालयाने दिलेल्या नवीन आदेशानुसार, शिक्षकांना आता ३१ ऑगस्ट २०२८ पर्यंत ही पात्रता परीक्षा उत्तीर्ण करता येणार आहे. ही मुदतवाढ मिळाल्यामुळे हजारो शिक्षकांना तूर्तास मोठा दिलासा मिळाला असून, परीक्षेच्या तयारीसाठी आता अतिरिक्त वेळ मिळणार आहे.

30 May 2026 08:50 AM (IST)

Parbhani Pathri Road Accident: परभणी-पाथरी मार्गावर भीषण अपघात 

परभणी: परभणी-पाथरी रस्त्यावर रात्रीच्या सुमारास एक अत्यंत भीषण आणि काळजाचा थरकाप उडवणारा अपघात घडला आहे. एका खासगी ट्रॅव्हल्सने दुचाकीला समोरून जोरदार धडक दिल्यामुळे झालेल्या या अपघातात मानवत येथील चार तरुणांचा जागीच दुर्दैवी मृत्यू झाला. या घटनेमुळे मानवत शहरासह संपूर्ण परभणी जिल्ह्यात मोठी हळहळ व्यक्त केली जात आहे.

राहुल जिनिंगसमोर घडला अपघात मिळालेल्या माहितीनुसार, 'NL 01 B 1374' या क्रमांकाची एक खासगी ट्रॅव्हल्स परभणीहून पुण्याच्या दिशेने प्रवाशांना घेऊन जात होती. ही ट्रॅव्हल्स परभणी-पाथरी मार्गावरील राहुल जिनिंग परिसरात आली असता, समोरून येणाऱ्या 'MH 22 BB 4724' क्रमांकाच्या दुचाकीला (बाईक) या ट्रॅव्हल्सची अत्यंत भीषण समोरासमोर धडक बसली.

30 May 2026 08:45 AM (IST)

Vidhan Parishad Election: मविआमध्ये साताऱ्याची जागा शरद पवार गटाकडे 

सातारा: महाराष्ट्राच्या विधान परिषदेच्या (Legislative Council) स्थानिक स्वराज्य संस्था मतदारसंघांतील १७ जागांसाठी निवडणूक जाहीर झाली असून, राजकीय हालचालींना वेग आला आहे. उमेदवारी अर्ज दाखल करण्यासाठी आता शेवटचे अवघे तीन दिवस शिल्लक राहिल्याने सर्वच पक्षांमध्ये उमेदवारांच्या नावांची निश्चिती आणि मोर्चेबांधणी अंतिम टप्प्यात पोहोचली आहे.

महाविकास आघाडीचे जागावाटप स्पष्ट; मविआ सर्व जागा लढवणार एकीकडे सत्ताधारी महायुतीमध्ये (Mahayuti) जागावाटपासंदर्भात अद्यापही खलबते आणि चर्चा सुरू असताना, दुसरीकडे विरोधी पक्षांच्या महाविकास आघाडीने (MVA) सर्वच्या सर्व १७ जागा लढवण्याचा मोठा निर्णय घेतला आहे. महाविकास आघाडीच्या जागावाटपाचा फॉर्म्युला पुढीलप्रमाणे ठरला आहे:

30 May 2026 08:40 AM (IST)

Mumbai CNG PNG Price Hike: पेट्रोल-डिझेलपाठोपाठ मुंबईकरांना महागाईचा मोठा झटका 

मुंबई: पेट्रोल आणि डिझेलच्या वाढत्या किमतींनी (Petrol Diesel Prices Hike) आधीच हैराण झालेल्या मुंबईकरांना आता महागाईचा आणखी एक मोठा फटका बसला आहे. मुंबई आणि मुंबई महानगर क्षेत्रात (MMR) सीएनजी (CNG) आणि घरगुती पीएनजीच्या (PNG) दरात लक्षणीय वाढ करण्यात आली आहे. या नवीन दरवाढीमुळे सर्वसामान्य नागरिक, रिक्षा-टॅक्सी चालक आणि खासगी वाहनधारकांचे आर्थिक बजेट पूर्णपणे कोलमडणार आहे. महानगर गॅस लिमिटेडकडून (MGL) करण्यात आलेल्या या दरवाढीनुसार,  मुंबई आणि परिसरात सीएनजीच्या दरात २ रुपयांची वाढ करण्यात आली आहे. या वाढीनंतर आता सीएनजीचा दर ८६ रुपये प्रतिकिलोवर पोहोचला आहे.

30 May 2026 08:35 AM (IST)

Pune Spurious Liquor Case: पुणे-पिंपरी चिंचवडमध्ये विषारी दारूमुळे १८ जणांचा मृत्यू

Pune Spurious Liquor Case: पुणे आणि पिंपरी-चिंचवड शहरात विषारी दारूमुळे (Spurious Liquor) मृत्यूचे मोठे तांडव पाहायला मिळाले असून, अवघ्या दोन दिवसांत तब्बल १८ जणांचा दुर्दैवी मृत्यू झाला आहे. या धक्कादायक घटनेमुळे संपूर्ण पुणे जिल्ह्यात प्रचंड खळबळ उडाली आहे. दरम्यान, पोलीस तपासात या संपूर्ण प्रकरणामागील एक अत्यंत धक्कादायक माहिती समोर आली आहे. या भागात विषारी दारूमुळे सर्वाधिक म्हणजेच १२ जणांचा मृत्यू झाला आहे. तसेच, फुगेवाडीतील आणखी ६ जणांची प्रकृती अत्यंत गंभीर असून त्यांच्यावर रुग्णालयात उपचार सुरू आहेत.पुण्यातील हडपसर परिसरात ६ जणांना या विषारी दारूमुळे आपले प्राण गमवावे लागले आहेत.