पुण्यातील Pune Jain House Land प्रकरणात धर्मादाय आयुक्तांचा मोठा निर्णय; 30 ऑक्टोबर पर्यंत…

जैन बोर्डिंग हाऊस जमीन प्रकरणात नवीन ट्विस्ट
या प्रकरणात धंगेकरांचे मंत्री मोहोळांवर गंभीर आरोप
गोखले बिल्डर्सकडून व्यवहार रद्द करण्याची मागणी 

पुणे: मॉडेल कॉलनीतील सेठ हिराचंद नेमचंद स्मारक ट्रस्ट व जैन मंदीर गहाण प्रकरणी सुरू असलेल्या वादग्रस्त प्रकरणात, महाराष्ट्र राज्याचे धर्मादाय आयुक्त अमोघ कलोती यांनी दिलेला “स्टेटस को ” (सध्यस्थिती कायम ठेवण्याचा) आदेश ३०  ऑक्टोबर पर्यंत वाढविण्यात आला आहे.

यापुर्वी, २० ऑक्टोबरला दिलेल्या प्राथमिक आदेशानुसार, ट्रस्टच्या मालमत्तेबाबत कोणतीही नवीन कारवाई किंवा बदल होऊ नये, असे निर्देश देण्यात आले होते. या आदेशाची मुदत आज संपत आल्याने, अर्जदारांच्या विनंतीनुसार धर्मादाय आयुक्तांनी तो पुढे वाढवण्याचा निर्णय घेतला.

या सुनावणीदरम्यान अर्जदारांच्या वतीने ॲड. योगेश पांडे यांनी बाजू मांडली. तर प्रतिवादी ट्रस्ट आणि गोखले लँडमार्क एलएलपी यांच्या वतीने अनुक्रमे ॲड. इशान कोल्हटकर आणि ॲड. एन. एस. आनंद उपस्थित होते. दोन्ही प्रतिवादींनी “स्टेटस को” आदेश वाढविण्याला कोणतीही हरकत घेतली नाही, याची नोंदही करण्यात आली.

धर्मादाय आयुक्तांनी दोन्ही प्रतिवादी पक्षांना त्यांचे उत्तर  सादर करण्यासाठी ३० ऑक्टोबर पर्यंतची मुदत दिली आहे. सेठ हिराचंद नेमचंद (एचएनडी) स्मारक ट्रस्ट हा जुना आणि प्रतिष्ठित ट्रस्ट असून, त्याच्या मालमत्तेच्या वापर व व्यवस्थापनाबाबत अलीकडच्या काळात वाद उद्भवला आहे. अर्जदारांनी काही व्यवहार आणि निर्णयांवर आक्षेप घेतला असल्याने धर्मादाय आयुक्तांकडे तक्रार दाखल करण्यात आली आहे.

गोखले बिल्डर्सचे Jain Boarding House Land प्रकरणातील 230 कोटी बुडणार; धर्मादाय आयुक्तांचा निर्णय काय?

या पार्श्वभूमीवर आजच्या आदेशामुळे ट्रस्टच्या संपत्तीबाबत कोणतेही बदल, हस्तांतरण किंवा नवे करार होणार नाहीत, अशी खात्री राहील. धर्मादाय आयुक्तांनी पुढील सुनावणीची तारीख ३० ऑक्टोबर निश्चित केली असून, त्यादिवशी दोन्ही बाजूंची मते आणि सादर केलेली कागदपत्रे विचारात घेतली जातील. या निर्णयामुळे सध्या ट्रस्टची स्थिती यथास्थित राहणार असून, पुढील सुनावणीत या प्रकरणाच्या पुढील दिशेबाबत अधिक स्पष्टता मिळण्याची शक्यता आहे.

या भूखंडावरील भगवान जैन मंदीर पतसंस्थांकडे गहाण ठेवल्याने देशभरातील जैन बांधवांमध्ये संतापाची लाट उसळली होती. इतकेच नव्हे तर सत्ताधारी महायुतीतील नेते, मंत्री मुरलीधर मोहोळ आणि माजी आमदार रविंद्र धंगेकर यांच्यात जोरदार वाद निर्माण झाला होता. जैन समाजाच्यावतीने माजी खासदार राजू शेट्टी यांच्या नेतृत्वाखाली समाजबांधवांनी विश्वस्तांच्या निर्णयाला प्रखर विरोध केला होता.