Vaishnavi Hagwane: “जे कठोरात कठोर…”; CM देवेंद्र फडणवीसांचा वैष्णवीच्या कुटुंबियांना शब्द

आम्ही सगळे आपल्या पाठीशी आहोत, काळजी करू नका. आपल्यावर कठीण परिस्थिती आली आहे. पण सरकार पोलीस प्रशासन सर्व पाठीशी आहे. अशा लोकांना धडा शिकवल्याशिवाय आपण शांत बसणार नाही. जे कठोरात कठोर करता येईल ते करू, असा शब्द देवेंद्र फडणवीस यांनी वैष्णवीच्या वडिलांना दिला आहे. पुण्यामध्ये अनिल कस्पटे यांच्या कुटुंबियांची भाजप नेते आणि मंत्री गिरीश महाजन यांनी भेट घेतली होती. त्यावेळी त्यांनी दिल्लीमध्ये असलेल्या फडणवीसांशी व्हिडीओ कॉल करत कस्पटे यांचे बोलणे करून दिले आहे.

वैष्णवीच्या १० महिन्यांच्या मुलाला तिच्या माहेरच्या कुटुंबीयांकडे सोपवले आहे. या घटनेमुळे महाराष्ट्रात हुंडाबळी, घरगुती हिंसाचार आणि महिलांवरील अत्याचाराचा मुद्दा पुन्हा ऐरणीवर आला आहे. राज्य महिला आयोगानेही या प्रकरणाची स्वतःहून दखल घेतली आहे आणि योग्य कारवाईसाठी पाठपुरावा करत आहे. पुणे बार असोसिएशनला वैष्णवीच्या वडिलांनी आरोपींचे वकीलपत्र न घेण्याबाबत पत्र दिले आहे.

Vaishnavi Hagavane Case: वैष्णवीच्या मृत्यूनंतर तिच्या बाळाचीही हेळसांड…; निलेश चव्हाणवर गुन्हा दाखल

दरम्यान, या प्रकरणामध्ये वैष्णवीचा पती शशांक हगवणे, नणंद करिश्मा हगवणे, सासू लता हगवणे यांना अटक केली होती. मात्र फरार असलेला सासरा राजेंद्र हगवणे आणि दीर सुशील हगवणे यांनी नुकतीच पोलिसांनी अटक केली आहे. सोशल मीडियावर वैष्णवीला न्याय मिळावा आणि आरोपींना कडक शिक्षा व्हावी अशी मागणी केली जात आहे.

करुणा मुंडेंची चाकणकरांवर सडकून टीका

वैष्णवी हगवणे प्रकरणात राज्य महिला आयोग आणि अध्यक्षा रुपाली चाकणकर यांच्यावर टीका होत आहे. महिला आयोगाचा अध्यक्ष बदलावा अशी मागणी केली जात आहे. आता यावर करुणा मुंडे यांनी देखील भाष्य केले आहे.

महिला आयोगाकडे शेकडो तक्रारी आल्या आहेत. त्या तक्रारीमधील किती महिलांना आतापर्यंत न्याय देण्यात आला? असा प्रश्न करुणा मुंडे शर्मा यांनी उपस्थित केला. रुपाली चाकणकर यांचे काम पक्षासाठी फिरणे नसून, महिला आयोगाकडे ज्या तक्रारी येतेय त्याचे निवारण करणे हे आहे, असा सणसणीत टोला करुणा मुंडे शर्मा यांनी रुपाली चाकणकर यांना लगावला आहे.

Vaishnavi Hagwane: “त्या सुंदर दिसतात म्हणून…; वैष्णवी मृत्यू प्रकरणात करुणा मुंडेंची चाकणकरांवर सडकून टीका

महाराष्ट्रात पूजा चव्हाण, वैष्णवी प्रत्येक घरी आहेत. महिला आयोगाकडे तक्रारी करून देखील न्याय मिळालेल्या दोन महिला करुणा मुंडे यांच्यासोबत उपस्थित असल्याचे समोर आले आहे. रुपाली चाकणकर यांनी महिलांना न्याय दिला नाही तर ३५ हजार महिलांसोबत महिला आयोगाबाहेर आंदोलन करण्याचा इशारा करुणा मुंडे यांनी दिला आहे.