Karad Accident: पुणे-बेंगलोर हायवेवर भीषण अपघात; कंटेनरच्या धडकेत चाकाखाली सापडून दुचाकीस्वार ठार

कराड: पुणे-बंगळुरू आशियाई महामार्गावर येथील कोल्हापूर नाक्यावर कंटेनरने दिलेल्या धडकेत दुचाकीवरील एकजण कंटेनरच्या चाकाखाली सापडून जागीच ठार झाला. गुरुवारी दुपारी २.३० वाजण्याच्या सुमारास हा अपघात झाला. अपघातानंतर महामार्गावरील वाहतूक काहीकाळ ठप्प झाली होती.  अशोक शिवराम जमाले (वय ६५) रा. मुंढे, ता. कराड असे अपघातात ठार झालेल्याचे नावे आहे.

याबाबत पोलिसांकडून, तसेच घटनास्थळावरून मिळालेली माहिती अशी की, अशोक जमाले हे दुचाकीवरून (क्र. एम एच ११ एवाय २३९६) कराड येथे घरचा बाजार करण्यासाठी गेले होते. बाजार घेऊन ते मुंढे येथे घरी जात असताना दुपारी २.३९ वाजण्याच्या सुमारास जुन्या पुलावर वाहतूक कोंडी झाल्यामुळे ते कोल्हापूर नाका मार्गे घरी जात होते. गुरुवारी दुपारी अडीच वाजण्याच्या सुमारास ते कोल्हापूर नाका येथे आले असता कंटेनरची (क्र. आर. डी.०६ जी.डी. ८३५१) दुचाकीला धडक झाली. या अपघातात दुचाकीस्वार कंटेनरच्या मागील चाकाखाली चिरडल्याने जागीच ठार झाला.

अपघाताची माहिती मिळतातच दस्तगीर आगा, प्रफुल्ल बाबर, शेखर बर्गे हे तातडीने घटनास्थळी दाखल झाले. त्यांनी अपघाताची माहिती महामार्ग पोलीस व शहर पोलीस ठाण्याला दिली. वाहतूक पोलीस तात्काळ घटनास्थळी दाखल झाले. पोलिसांनी अपघातात पंचनामा करून मृतदेह शवविच्छेदनासाठी कराड येथील उपजिल्हा रुग्णालयात पाठवण्यात आला.

खडकवासला धरणाजवळ अपघात

खडकवासला धरण परिसरात भरधाव रिक्षाने दिलेल्या धडकेत पादचाऱ्याचा मृत्यू झाल्याची घटना घडली आहे. याप्रकरणी रिक्षाचालकावर गुन्हा दाखल करण्यात आला आहे. संतोष माधव मते (वय ४७, रा. खडकवासला) असे मृत्यू झालेल्या पादचाऱ्याचे नाव आहे. याप्रकरणी रिक्षाचालक रोहित दत्तात्रय चव्हाण (रा. खडकवासला) याच्यावर गुन्हा दाखल करण्यात आला आहे. याबाबत अविनाश माधव मते (वय ४५, रा. खडकवासला) यांनी नांदेड सिटी पोलीस ठाण्यात तक्रार दिली आहे.

पोलिसांच्या माहितीनुसार, संतोष मते हे १० मे रोजी खडकवासला धरण परिसरातून निघाले होते. त्या वेळी भरधाव रिक्षाने त्यांना धडक दिली. अपघातात गंभीर जखमी झालेल्या मते यांचा उपचारांदरम्यान मृत्यू झाला. मते यांचे भाऊ अविनाश यांनी नुकतीच पोलिसांकडे तक्रार दिली. त्यानंतर याप्रकरणी गुन्हा दाखल करण्यात आला असून, रिक्षाचालक रोहित चव्हाण याने मद्यप्राशन करुन अपघात केल्याचे मते यांनी तक्रारी म्हंटले आहे. सहायक निरीक्षक यादव तपास करत आहेत.

खडकवासला धरणाजवळ अपघात; रिक्षाने दिलेल्या धडकेत पादचाऱ्याचा मृत्यू

टेम्पोच्या धडकेत दुचाकीस्वाराचा मृत्यू

भरधाव टेम्पोने दिलेल्या धडकेत दुचाकीस्वाराचा मृत्यू झाल्याची घटना रविवारी दुपारी एअरपोर्ट-लोहगाव रस्त्यावर घडली आहे. रोशनकुमार सिंह (वय २९, रा. वाघोली) असे या अपघातात मृत्यू झालेल्याचे नाव आहे. याबाबत रोशनचा भाऊ पवनकुमार याने तक्रार दिली आहे. याप्रकरणी विजय कैलास भगत (वय २५) याच्यावर विमानतळ पोलिसांत गुन्हा नोंद केला आहे.