अफगाणिस्तानात भूकंपाचे मोठे धक्के, 20 जणांचा मृत्यू तर शेकडो जखमी, शेजारी देशांनाही हादरे (फोटो सौजन्य-X)
Afganistan Earthquake News In Marathi : अफगाणिस्तानच्या दक्षिण- पूर्व भागात भूकंपाने नंगरहार प्रांतात हाहाकार माजवला आहे. रविवारी (31 ऑगस्ट) रात्री उशिरा झालेल्या भूकंपामुळे अफगाणिस्तानमध्ये बरेच नुकसान झाले. अमेरिकन भूगर्भीय सर्वेक्षणानुसार, रविवारी रात्री उशिरा पाकिस्तान सीमेजवळ आग्नेय अफगाणिस्तानात ६.० रिश्टर स्केलचा भूकंप झाला. नांगरहार सार्वजनिक आरोग्य विभागाचे प्रवक्ते नकीबुल्लाह रहीमी यांनी रॉयटर्सला सांगितले की भूकंपात 20 जणांचा मृत्यू झाला आणि शेकडो नागरिक जखमी झाल्याची माहिती मिळत आहे.
रविवारी रात्री १२:४७ वाजता भूकंप झाला. सुरुवातीला ६.० रिश्टर स्केलचा भूकंप जाणवला आणि त्यानंतर काही वेळातच ६.३ रिश्टर स्केलचा दुसरा भूकंप झाला. या भूकंपामुळे अफगाणिस्तानातील नांगरहार प्रांतात मोठे नुकसान झाले आहे. नांगरहार सार्वजनिक आरोग्य विभागाचे प्रवक्ते नकीबुल्लाह रहीमी यांनी सांगितले की, भूकंपामुळे 20 जणांचा मृत्यू झाला आहे आणि २५ जण जखमी झाले आहेत. जखमींना जवळच्या रुग्णालयात दाखल करण्यात आले आहे, जिथे त्यांच्यावर उपचार सुरू आहेत.
भूकंपाचे धक्के इतके तीव्र होते की दिल्ली, नोएडा, गाझियाबाद आणि भारतातील आसपासच्या भागातही जमीन हादरली. भूकंपाचे धक्के जाणवताच लोक घराबाहेर पडले. दरम्यान इतर राज्यांमध्ये कोणत्याही प्रकारची जीवितहानी किंवा मालमत्तेचे नुकसान झाल्याचे वृत्त नाही. मात्र अफगाणिस्तान तसेच पाकिस्तानच्या अनेक भागात जोरदार भूकंपाचे धक्के जाणवले आहेत.
यूएसजीएसनुसार, भूकंपाचा केंद्रबिंदू अफगाणिस्तानमधील बसावुलपासून ३६ किलोमीटर (२२ मैल) उत्तरेस होता आणि त्याची खोली १० किलोमीटर (६.२ मैल) होती. रविवारी स्थानिक वेळेनुसार रात्री ११:४७ वाजता हा धक्का बसला. एएफपी वृत्तसंस्थेच्या मते, भूकंपाचा केंद्रबिंदू जलालाबादपासून ४२ किलोमीटर पूर्व-ईशान्येस होता. हा भूकंप देशाच्या पाकिस्तानशी असलेल्या पूर्व सीमेजवळ आला.
अफगाणिस्तान हा भूकंपाच्या दृष्टीने संवेदनशील प्रदेश आहे, जिथे भूकंप होणे सामान्य आहे. या घटनेपूर्वीही अफगाणिस्तानात अनेक वेळा भूकंपाचे धक्के जाणवले आहेत. यावर्षी २८ मे रोजी ४.७ रिश्टर स्केलचा भूकंप झाला होता, या भूकंपात कोणतेही मोठे नुकसान झाले नाही. त्याच वेळी, १६ एप्रिल रोजी ५.९ रिश्टर स्केलचा आणखी एक भूकंप झाला, ज्यामुळे काही प्रभावित भागात किरकोळ नुकसान झाले. याशिवाय, यावर्षी भारत, नेपाळ आणि चीनसारख्या देशांमध्येही भूकंप झाले आहेत. या देशांमध्ये भूकंपांमुळे जीवित आणि वित्तहानी झाली आहे आणि मदतकार्य सुरू आहे.
