(फोटो सौजन्य इन्स्टाग्राम)
कलर्स मराठीवरील इंद्रायणी मालिकेत तणाव आणि रहस्याची झळाळती लाट सुरु झाली आहे. श्रिकलाचा गुप्त हेतू हळूहळू प्रकट होत असताना, रायाचा संशय वाढत चालला आहे. इंद्रायणीच्या सत्यशोधाचा प्रवास मालिकेत प्रमुख ठरतोय, जिथे प्रत्येक नात्याची खरी कसोटी लागणार आहे. श्रीकला, राया आणि इंद्रायणी यांच्या आयुष्यातील घडामोडींनी कथानक अधिक गुंतागुंतीचं आणि उत्कंठावर्धक बनवलं आहे. इंद्रायणीची जिद्द: लग्नाआधीच श्रीकलाचं सत्य उघड शकेल का.
श्रीकलाच्या वागण्यात झालेला सूक्ष्म बदल आता सर्वांच्या लक्षात येऊ लागला आहे. तिच्या कृतींमागे दडलेला गुप्त हेतू हळूहळू कथानकाचं केंद्र बनतोय. तिच्या वागण्यातली स्थिरता, तिच्या नजरेतला आत्मविश्वास आणि संवादांमधले संकेत हे सगळं काहीतरी मोठं दडलं असल्याचं सूचित करतंय. याच दरम्यान पोपटराव या नव्या नावाचा उल्लेख कथेला वेगळी दिशा देतो. या व्यक्तीचं श्रीकलाशी असलेलं गूढ नातं प्रेक्षकांच्या कुतूहलाचा विषय ठरतंय. दुसरीकडे, राया श्रिकला च्या घरात पाहिलेल्या काही विचित्र आणि संशयास्पद गोष्टींनी अस्वस्थ होतो. त्या बाबी तो इंद्रायणीला सांगतो, आणि या माहितीमुळे इंद्रायणीच्या मनात शंकेची ठिणगी पेटते. राया तिच्या पाठीशी उभा असला तरी, या रहस्याच्या जाळ्यात अडकलेल्या सत्याचा मागोवा घेणं इंद्रायणीसाठी सोपं नसतं. प्रत्येक पाऊल उचलताना ती अधिक गोंधळात आणि भावनिक संघर्षात अडकत जाते.
या सगळ्या घटनांमुळे ‘इंद्रायणी’मालिकेची कथा एका निर्णायक वळणावर आली आहे. इंद्रायणीच्या धैर्याची, नात्यांवरील तिच्या विश्वासाची आणि तिच्या श्रद्धेची खरी कसोटी आता लागणार आहे. श्रीकलाचं वर्तन आणि पोपटराव हे सर्व मिळून पुढील भागांना अधिक रोचक बनवणार आहेत. श्रीकला खरंच काय लपवत आहे? रायाच्या मनातले प्रश्न योग्य दिशेने जात आहेत का? आणि इंद्रायणी सत्याजवळ पोहोचू शकेल का? हे जाणून घेण्यासाठी प्रेक्षकांची उत्कंठा दिवसेंदिवस वाढते आहे.
