दुसऱ्यांदा व्हाईटवॉश झाल्यावर दिनेश कार्तिक संतापला (Photo Credit - X)
‘व्हाईटवॉश’ का होतोय?
दिनेश कार्तिक यांनी बुधवारी (२६ नोव्हेंबर २०२५) माध्यमांशी बोलताना भारतीय संघातील समस्या स्पष्ट करण्याचा प्रयत्न केला. “पूर्वी कसोटी क्रिकेट खेळायला भारतात येताना प्रतिस्पर्धी संघ घाबरायचे. आता मात्र, त्यांना संधी दिसत आहे, त्यांच्या तोंडाला पाणी सुटले असेल. १२ महिन्यांत हा दुसरा व्हाईटवॉश आहे! आम्ही येथे खेळलेल्या शेवटच्या ३ कसोटी मालिकांपैकी २ मालिकांमध्ये व्हाईटवॉश मिळाला आहे. कसोटी क्रिकेटमध्ये भारतासाठी हा कठीण काळ आहे आणि कदाचित कठोर निर्णय घेण्याची वेळ आली आहे.”
View this post on Instagram
संघातील कमतरतांवर थेट बोट
“नेमकं काय कमी पडतंय? खेळाडूंची गुणवत्ता की फिरकी खेळण्याची क्षमता? भारतात आपले वेगवान गोलंदाज आणि फिरकीपटू प्रतिस्पर्धकांपेक्षा कमी पडत आहेत.” “एकापेक्षा जास्त अष्टपैलू खेळवले जात आहेत. नितीश रेड्डी, जो वेगवान अष्टपैलू म्हणून ओळखला जातो, त्याने संपूर्ण देशांतर्गत कसोटी हंगामात फक्त १४ षटके गोलंदाजी केली आहे.” “या कसोटी मालिकेत भारताकडून केवळ २ खेळाडूंनी शतके केली, तर दक्षिण आफ्रिकेकडून ७ खेळाडूंनी शतके झळकावली आहेत. अहो, आम्ही यापेक्षा खूप चांगले आहोत! कसोटी क्रिकेटमध्ये अचानक अशी घसरण कशी झाली?”
तिसऱ्या क्रमांकावर अस्थिरता
कार्तिक यांनी भारताच्या तिसऱ्या क्रमांकाच्या फलंदाजीतील सातत्याचा अभाव आणि वारंवार होणाऱ्या बदलांवरही प्रश्न उपस्थित केला. “WTC सायकलमध्ये खेळल्या गेलेल्या ६५ कसोटी सामन्यांमध्ये, पहिल्या डावात भारताच्या तिसऱ्या क्रमांकाच्या फलंदाजाची सरासरी २६ आहे, जी दुसरी सर्वात खराब आहे. यावर विचार करणे गरजेचे आहे.” “कोलकाता कसोटीत वॉशिंग्टन सुंदर तिसऱ्या क्रमांकावर खेळला, तर गुवाहाटीत साई सुदर्शनने ही भूमिका पार पाडली. हे वारंवार होणारे बदल संघाला मदत करत आहेत की आम्हाला अधिक स्थिरता देण्याची गरज आहे?”
७ महिन्यांनी पुढील कसोटी
भारतीय संघाचा पुढील कसोटी सामना ऑगस्ट २०२६ मध्ये आहे. “पुढील कसोटी सामना ७ महिन्यांनंतर आहे. आपण हे सर्व विसरून जाणार आहोत का? आपण ‘ठीक आहे, हा एक नवीन हंगाम आहे’ असे म्हणून पुढे जाणार आहोत का? तोपर्यंत इतके व्हाईट-बॉल क्रिकेट झालेले असेल, ज्यात आपण नक्कीच चांगले खेळू, की त्यामुळे कसोटी क्रिकेटमध्ये आता काय घडले आहे, याकडे आपण दुर्लक्ष करू. हा विचार करण्याचा सर्वात मोठा प्रश्न आहे. या कसोटी संघाला त्यांची पूर्वीची गुणवत्ता पुन्हा मिळवण्यासाठी काय करावे लागेल?”
