धुळे : भारतीय स्वातंत्र्याच्या अमृत महोत्सवी वर्षानिमित्त संपूर्ण देशभरात विविध कार्यक्रमांची रेलचेल सुरु आहे. त्यातच अमृत महोत्सवी वर्षा निमित्त शुक्रवारी धुळे येथे आयोजित केलेल्या मॅरेथान स्पर्धेला नागरिकांनी उस्फुर्त प्रतिसाद दिला.
मॅरेथॉनला आमदार मंजुळाताई गावित आणि जिल्हाधिकारी जलज शर्मा यांनी हिरवा झेंडा दाखवून स्पर्धेला सुरुवात केली. यावेळी स्पर्धकांचा उत्साह वाढविण्यासाठी पोलिस बँडवर देशभक्तिपर गीते वाजविली जात होती, तर ठिकठिकाणी शालेय विद्यार्थी टाळ्यांच्या कडकडाटात स्पर्धकांचे स्वागत करत होते. तर यावेळी विविध सेवाभावी संघटनांचे सामाजिक कार्यकर्ते स्पर्धकांना लिंबू पाणी देऊन खेळाडूंचा उत्साह वाढवित होते.
छत्रपती शिवाजी महाराज यांच्या पुतळ्यापासून मॅरेथॉनला सुरु झालेली ही मॅरेथॉन पाचकंदील, आग्रा रोड, फुलवाला चौक, मोठा पूल, नेहरू चौक, दत्तमंदिर पुन्हा नेहरू चौक, क्रांतिज्योती सावित्रीबाई फुले यांचा पुतळा, वीर सावरकर यांचा पुतळा, जिल्हाधिकारी निवासस्थानमार्गे गरुड मैदानावर मॅरेथानचा समारोप झाला.
मॅरेथानच्या उदघाटन सोहळ्यास आमदार मंजुळाताई गावित आणि जिल्हाधिकारी जलज शर्मा, जिल्हा परिषदेचे अतिरिक्त मुख्य कार्यकारी अधिकारी संदीप माळोदे, जिल्हा क्रीडाधिकारी आसाराम जाधव, उपजिल्हाधिकारी गोविंद दाणेज (रोहयो), उपविभागीय पोलिस अधिकारी ईश्वर कातकडे, इत्यादींसह नागरिक मोठ्या संख्येने सहभागी झाले होते.
आमदार गावित यांनी सांगितले की, भारतीय स्वातंत्र्याला यंदा ७५ वर्षे पूर्ण होत असून यानिमित्त विविध कार्यक्रमांचे आयोजन करण्यात आले आहे. त्याचाच एक भाग म्हणून जिल्हा प्रशासनातर्फे ही स्पर्धा आयोजित केली गेली असून नागरिकांनी या महोत्सवात मोठ्या संख्येने सहभागी व्हावे, असे आवाहन केले.
जिल्हाधिकारी शर्मा यांनी सांगितले, भारतीय स्वातंत्र्याच्या अमृत महोत्सवी वर्षानिमित्त जिल्ह्यात विविध कार्यक्रम सुरू राहणार असून मॅरेथान नंतर शनिवारी १३ ऑगस्ट २०२२ रोजी सायकलिंग, चालणे आदी स्पर्धा होतील. या स्पर्धांनाही नागरिकांनी उत्स्फूर्त प्रतिसाद द्यावा.
