Maharashtra Breaking News Updates Today:
07 Apr 2026 10:17 AM (IST)
ठाणे येथून एक संतापजनक घटना समोर आली आहे. रुगालयातील नर्सवर वार्डबॉयने दोन वेळा अत्याचार केल्याचे समोर आले आहे. तुझ्याशी थोडं खासगी बोलायचं आहे, असे म्हणत नर्सला हॉटेलमध्ये घेऊन गेला. तिथे तिला गुंगीचे औषध देऊन बलात्कार केला. एका ४१ वर्षीय वार्डबॉयने हे कृत्य केले असून या प्रकरणी आरोपीविरुद्ध गुन्हा दाखल करण्यात आला आहे. त्याला लवकरच अटक केली जाईल असे ठाणेनगर पोलिसांनी सोमवारी सांगितले.
07 Apr 2026 09:30 AM (IST)
नाशिक: अध्यात्म आणि दैवी शक्तीच्या नावाखाली महिलांची फसवणूक करणाऱ्या भोंदू बाबा अशोक खरातच्या चौकशीत दररोज नवनवीन खुलासे होत आहेत. पोलीस कोठडीत असतानाही खरातचा अहंकार कमी झालेला नाही. चौकशीदरम्यान त्याने "दुनिया झुकती है, झुकानेवाला चाहिए" असे निर्लज्ज विधान करत आपल्या कृत्यांचे समर्थन करण्याचा प्रयत्न केला आहे.
१० पेक्षा जास्त फसवणुकीचे आणि लैंगिक अत्याचाराचे गुन्हे दाखल होऊनही अशोक खरात अत्यंत उद्धटपणे वागत असल्याचे पोलीस सूत्रांनी सांगितले. पोलीस कोठडीत सुरू असलेल्या कसून चौकशीत त्याने हे धक्कादायक विधान केले असून, यावरून त्याने शेकडो महिलांची केलेली फसवणूक आणि अत्याचाराबद्दल त्याला कोणताही पश्चात्ताप नसल्याचे स्पष्ट होत आहे.
07 Apr 2026 09:20 AM (IST)
राज्याच्या हवामानात मोठे बदल होत असून, पुढील ४८ तासांत विदर्भात पावसाची शक्यता हवामान विभागाने वर्तवली आहे. अरबी समुद्रामार्गे महाराष्ट्रात आर्द्रता येत असली, तरी राज्यावरील कमी दाबाची रेषा आग्नेय दिशेकडे सरकल्याने पावसाचा जोर काही भागांत मर्यादित राहणार आहे. विदर्भात पाऊस आणि मेघगर्जनेसह पावसाचा अंदाज असल्याने तेथे 'यलो अलर्ट' जारी करण्यात आला आहे. पुणे जिल्ह्यासह मध्य महाराष्ट्र आणि मराठवाड्यात पावसाची शक्यता अत्यंत कमी आहे. या भागात हवामान मुख्यत्वे कोरडे राहण्याची चिन्हे आहेत. पावसाच्या सावटासोबतच आता दिवसाच्या तापमानातही हळूहळू वाढ होण्याची शक्यता आहे, ज्यामुळे उन्हाचा चटका अधिक जाणवू लागेल.
07 Apr 2026 09:15 AM (IST)
मुख्यमंत्री माझी लाडकी बहीण योजनेच्या लाभार्थ्यांसाठी राज्याच्या महिला व बालविकास मंत्री आदिती तटकरे यांनी महत्त्वाची घोषणा केली आहे. ई-केवायसी (eKYC) प्रक्रियेत तांत्रिक अडचणी येणाऱ्या आणि चुकीची माहिती भरल्या गेलेल्या महिलांसाठी आता ३० एप्रिल २०२६ पर्यंत मुदतवाढ देण्यात आली आहे. ज्या महिलांनी यापूर्वी केवायसी करताना प्रश्नांची उत्तरे चुकीची दिली होती किंवा ज्यांची माहिती अपूर्ण होती, त्यांना ही दुरुस्ती करण्याची शेवटची संधी मिळणार आहे. याआधी ऑक्टोबर, डिसेंबर आणि मार्चमध्ये मुदतवाढ देण्यात आली होती. मात्र, तांत्रिक कारणांमुळे अनेक महिलांची केवायसी प्रक्रिया अद्याप पूर्ण होऊ शकलेली नाही, ही बाब लक्षात घेऊन हा निर्णय घेण्यात आला.
07 Apr 2026 09:10 AM (IST)
अकोल्यातील पोलीस कारवाईची घटना ताजी असतानाच, आता वाशिममध्ये एका पोलीस उपनिरीक्षकावर निलंबनाची कुऱ्हाड कोसळली आहे. वाशिम शहर पोलीस ठाण्यात कार्यरत असलेले पोलीस उपनिरीक्षक सुनील गिरी यांना जिल्हा पोलीस अधीक्षकांनी थेट निलंबित केले आहे. सुनील गिरी यांच्या विरोधात काही गंभीर स्वरूपाच्या तक्रारी जिल्हा पोलीस अधीक्षकांकडे प्राप्त झाल्या होत्या. या तक्रारींची प्राथमिक शहानिशा केल्यानंतर ही मोठी कारवाई करण्यात आली आहे. एका पोलीस उपनिरीक्षकावर थेट निलंबनाची कारवाई झाल्याने वाशिम पोलीस दलात मोठी खळबळ उडाली आहे.
07 Apr 2026 09:04 AM (IST)
रत्नागिरी: कोकणच्या राजकारणातून एक मोठी बातमी समोर येत आहे. रत्नागिरीत शिवसेना (उद्धव बाळासाहेब ठाकरे) गटाला मोठा धक्का बसला असून, युवासेनेचे आक्रमक नेते उmesh खताते यांनी पक्षाला रामराम ठोकला आहे. खताते आज मुंबईत मुख्यमंत्री एकनाथ शिंदे यांच्या उपस्थितीत अधिकृतपणे शिवसेनेत (शिंदे गट) प्रवेश करणार आहेत. युवासेनेचे माजी तालुकाप्रमुख आणि सक्रिय नेते म्हणून ओळखल्या जाणाऱ्या उमेश खताते यांनी ठाकरे गटाची साथ सोडल्याने खेड-खेर्डी परिसरात राजकीय खळबळ उडाली आहे. खताते एकटेच नव्हे, तर त्यांच्यासोबत शेकडो कार्यकर्त्यांनीही पक्षाला सोडचिठ्ठी दिली असून ते आज मुंबईत शक्तीप्रदर्शन करत शिंदे गटात सामील होणार आहेत.
07 Apr 2026 09:00 AM (IST)
नवी दिल्ली : वायव्येकडील दोन सक्रिय पश्चिमी वाऱ्यांच्या प्रभावामुळे हवामानात बदल झाला आहे. सोमवारी, पश्चिम हिमालयीन प्रदेशात आणि देशाच्या पूर्व भागात हलका ते मध्यम पाऊस आणि जोरदार हिमवृष्टी झाली. जम्मू आणि काश्मीरसह उत्तर प्रदेश आणि पूर्व मध्य प्रदेशातील काही भागांमध्ये गारपीट आणि सोसाट्याचा वाराही आला. उत्तरेकडील डोंगराळ भाग आणि लगतच्या मैदानी प्रदेशात १० एप्रिलपर्यंत हवामान असेच राहण्याची शक्यता असून, या काळात काही भागांसाठी गारपीट आणि मेघगर्जनेचा इशारा देण्यात आला आहे. भारतीय हवामान विभागाच्या (IMD) मते, सध्या पाकिस्तान आणि पंजाबच्या आसपासच्या वरच्या वातावरणात कमी दाबाच्या क्षेत्रासह एक सक्रिय पश्चिमी वारे कार्यरत आहेत. याव्यतिरिक्त, देशाच्या अनेक भागांमध्ये चक्रीवादळी वारे वाहत असून, त्यामुळे वातावरणातील अस्थिरता वाढत आहे.
07 Apr 2026 08:55 AM (IST)
India Share Market Update: अमेरिका – ईराण युद्धाचा भारतीय शेअर बाजारावर मोठ्या प्रमाणात परिणाम होत असल्याचे पाहायला मिळत आहे. आज ७ एप्रिल रोजी मंगळवारी भारतीय शेअर बाजाराचे प्रमुख निर्देशांक, सेन्सेक्स आणि निफ्टी ५०, मंगळवारी घसरणीसह उघडण्याची शक्यता आहे. गिफ्ट निफ्टीमधील ट्रेंड्स देखील भारतीय बेंचमार्क निर्देशांकासाठी नकारात्मक सुरुवातीचे संकेत देत आहेत. गिफ्ट निफ्टी, निफ्टी फ्युचर्सच्या मागील क्लोजिंगपेक्षा जवळपास १२६ अंकांच्या सवलतीवर, २२,९३० च्या पातळीवर व्यवहार करत होता.
Maharashtra to World Breaking News: आज काय घडतंय? कुठे काय झालं? राजकीय उलथापालथीपासून ते क्रिकेटच्या मैदानापर्यंत, सर्व ताज्या बातम्यांचे वेगवान अपडेट्स फक्त येथे
सांगली : आगामी २०२९ च्या लोकसभा निवडणुकीत सांगलीचा खासदार भारतीय जनता पक्षाचाच असेल, असा निर्धार भाजप आमदार गोपीचंद पडळकर यांनी व्यक्त केला आहे. सांगलीत आयोजित भाजपच्या एका मेळाव्यात बोलताना पडळकरांनी विद्यमान खासदार विशाल पाटील यांना थेट आव्हान देत, “२०२९ मध्ये विशाल पाटील खासदार नसणार हे लिहून ठेवा,” असे विधान केले आहे.
पडळकर यांनी या मेळाव्यात बोलताना अत्यंत आक्रमक पवित्रा घेतला. २०२९ च्या निवडणुकीसाठी आतापासूनच कंबर कसली असून, भाजपचा विजय निश्चित करण्यासाठी आपण ‘जीवाचे रान’ करू आणि विरोधकांचा ‘कार्यक्रम’ करू, असा इशारा त्यांनी दिला. विशाल पाटील यांना उद्देशून बोलताना ते म्हणाले की, परिस्थिती काहीही असली तरी पुढील निवडणुकीत पाटील विजयी होणार नाहीत याची खात्री आपण पटवून देऊ.
