गुरुवार, 13 ऑगस्ट 2026
Maharashtra Breaking News LIVE Updates Today:
मुंबई : राज्यातील मतदारयादीच्या विशेष सखोल पुनर्रीक्षण (एसआयआर) प्रक्रिया सुरू आहे. मात्र, या प्रक्रियेत अद्याप सुमारे १ कोटी ८० लाख मतदारांचे गणना अर्ज जमा झालेले नाहीत. विहित मुदतीत त्यांनी अर्ज न भरल्यास त्यांची नावे प्रारूप मतदारयादीतून वगळली जाण्याची शक्यता आहे. राज्याचे मुख्य निवडणूक अधिकारी एस. चोक्कलिंगम यांनी पत्रकार परिषदेत ही माहिती दिली.
एस. चोक्कलिंगम यांनी राज्यातील राजकीय पक्षांच्या प्रतिनिधींसोबत बैठक घेतली. त्यानंतर मंत्रालयात पत्रकार परिषदेत ही माहिती दिली. मुंबईत तर स्थिती आणखी गंभीर आहे. मुंबईतील केवळ ६३ टक्के मतदारांची माहिती डिजिटलाईज झाली आहे. त्यामुळे मुंबईतील सुमारे ३० लाख मतदारांची नावे यादीतून वगळली जाण्याची शक्यता आहे. मतदारांनी स्वतःहून वेबसाईटवर तपासणी करावी, राजकीय पक्षांनीदेखील यादी तपासावी, असे आवाहन चोक्कलिंगम यांनी केले आहे. गणना अर्ज जमा करण्याची अंतिम मुदत १७ ऑगस्ट आहे.
13 Aug 2026 10:07 AM (IST)
Global Oil Price Rise: लाल समुद्र (Red Sea) आणि ओमानच्या आखातात जहाजांवर झालेल्या ताज्या हल्ल्यांमुळे जागतिक इंधन बाजारात पुन्हा एकदा मोठी खळबळ उडाली आहे. या हल्ल्यांमुळे आंतरराष्ट्रीय सागरी वाहतुकीच्या सुरक्षिततेवर गंभीर प्रश्नचिन्ह निर्माण झाले असून तेलाचा पुरवठा खंडित होण्याच्या भीतीने जागतिक बाजारात खनिज तेलाच्या (Crude Oil) किमतीत मोठी वाढ झाली आहे.
आंतरराष्ट्रीय बाजारात ब्रेंट क्रूडचा (Brent Crude) दर ९० डॉलर प्रति बॅरलच्या जवळ पोहोचला असून, वेस्ट टेक्सास इंटरमीडिएटचा (WTI) दर ८४ डॉलर प्रति बॅरलच्या पार गेला आहे. अमेरिकेचे अध्यक्ष डोनाल्ड ट्रम्प यांनी इराणसोबतची परिस्थिती हळूहळू पूर्वपदावर येत असल्याचा दावा केला आहे. तसेच अत्यंत मोक्याच्या मानल्या जाणाऱ्या 'होर्मुझच्या सामुद्रधुनीवर' (Strait of Hormuz) अमेरिकन लष्कराचे पूर्ण नियंत्रण असल्याचे त्यांनी म्हटले आहे.
13 Aug 2026 10:00 AM (IST)
Gold Rate Today: भारतीय सराफा बाजारात १३ ऑगस्ट रोजी सोन्याच्या दरात जोरदार तेजी पाहायला मिळाली. राजधानी दिल्ली, मुंबई, कोलकाता, चेन्नई, पुणे आणि बेंगळुरूसारख्या देशातील प्रमुख शहरांमध्ये सोन्याच्या किमतींमध्ये मोठी वाढ नोंदवली गेली आहे. जागतिक बाजारातील सकारात्मक वातावरण, स्थानिक सराफा बाजारातील वाढती मागणी आणि अमेरिकन बाँड यील्डमध्ये (US Bond Yield) झालेली घसरण या घटकांमुळे सोन्याच्या दराला मोठा आधार मिळाला आहे.
प्रमुख शहरांमधील सोन्याचे दर (प्रति १० ग्रॅम):
दिल्ली: २४ कॅरेट सोन्याचा दर १,५५,०२० रुपये, तर २२ कॅरेट सोन्याचा दर १,४२,११० रुपये नोंदवला गेला.
मुंबई: २४ कॅरेट सोन्याची किंमत १,५४,८७० रुपये, तर २२ कॅरेट सोन्याचा भाव १,४१,९६० रुपयांवर पोहोचला.
13 Aug 2026 09:52 AM (IST)
Mahayuti Meeting Updates: मनसे अध्यक्ष राज ठाकरे यांनी काल (बुधवारी) सकाळी मुख्यमंत्री देवेंद्र फडणवीस यांची भेट घेतल्यानंतर, त्याच दिवशी रात्री उपमुख्यमंत्री एकनाथ शिंदे यांनी अचानक 'वर्षा' या मुख्यमंत्र्यांच्या शासकीय निवासस्थानी जात मुख्यमंत्री फडणवीस यांची भेट घेतली. महायुतीतील या दोन्ही प्रमुख नेत्यांमध्ये जवळपास २० मिनिटे गुप्त बैठक पार पडली. राज ठाकरेंची भेट आणि रात्री महायुतीच्या दोन प्रमुख नेत्यांमधील या भेटीमागील मुख्य कारणे आणि बैठकीतील तपशील समोर आले आहेत.
13 Aug 2026 09:45 AM (IST)
राष्ट्रवादी काँग्रेस पक्षात (अजित पवार गट) विविध संघटनात्मक पदांवर आपल्या पसंतीच्या चेहऱ्यांची निवड केल्यानंतर आता पार्थ पवार यांनी आपला मोर्चा मुंबई अध्यक्षपदाकडे वळवला आहे. समीर भुजबळ यांच्या राजीनाम्यानंतर गेल्या दोन वर्षांपासून रिक्त असलेल्या मुंबई अध्यक्षपदावर आमदार झिशान सिद्दीकी यांची निवड होण्याची दाट शक्यता वर्तवली जात आहे. झिशान सिद्दीकी हे पार्थ पवार यांचे निकटवर्तीय मानले जातात. राष्ट्रीय विद्यार्थी अध्यक्ष, महाराष्ट्र युवती अध्यक्ष आणि विद्यार्थी अध्यक्ष यांसारख्या महत्त्वाच्या संघटनात्मक पदांवर आपल्या समर्थकांची नियुक्ती केल्यानंतर पक्षातील निर्णयप्रक्रियेवर पार्थ पवार यांचा प्रभाव स्पष्टपणे दिसून येत आहे.
