Maharashtra Breaking News Today 01.10.2026
01 Oct 2026 10:30 AM (IST)
देशातील विद्यार्थ्यांच्या मानसिक आरोग्याविषयीची चिंता सतत वाढत आहे. नॅशनल क्राईम रेकॉर्ड्स ब्युरो (NCRB) च्या अलीकडेच प्रसिद्ध झालेल्या अहवालानुसार, गेल्या एका दशकात विद्यार्थ्यांच्या आत्महत्येच्या घटनांमध्ये मोठी वाढ झाली आहे. २०२४ मध्ये देशभरात एकूण १४,४८८ विद्यार्थ्यांनी आत्महत्या केली, जी २०१४ च्या तुलनेत सुमारे ८० टक्क्यांनी जास्त आहे. हा आकडा गेल्या १० वर्षांतील सर्वाधिक आहे आणि यामुळे विद्यार्थ्यांवरील अभ्यास, स्पर्धा परीक्षा आणि पारिवारिक दबावासंदर्भातील गंभीर चर्चा पुन्हा एकदा सुरू झाली आहे.
01 Oct 2026 10:20 AM (IST)
Belagavi Border Dispute Maharashtra Karnataka: महाराष्ट्र आणि कर्नाटक सीमेवरील बेळगावचा महाराष्ट्रात समावेश करण्यासाठी गेल्या अनेक दशकांपासून सुरू असलेला सीमाप्रश्न पुन्हा एकदा राजकीय पटलावर तापला आहे. बेळगाव हा महाराष्ट्राचाच अविभाज्य भाग असून तो राज्याला मिळावा यासाठी दिवंगत शिवसेनाप्रमुख बाळासाहेब ठाकरे यांच्यापासून ते उद्धव ठाकरे यांच्या नेतृत्वाखालील शिवसेनेने सातत्याने आक्रमक भूमिका घेतली आहे. सीमाभागातील मराठी भाषिकांच्या हक्कासाठी हजारो कार्यकर्त्यांनी आजवर तुरुंगवास भोगून रक्त सांडले असताना, कर्नाटकात भाजप असो वा काँग्रेस, दोन्ही पक्ष बेळगाववर स्वतःचा दावा सांगत एकाच व्यासपीठावर येतात. त्यामुळे महाराष्ट्राची न्याय्य मागणी दाबण्याचा प्रयत्न करणाऱ्या कर्नाटक सरकारच्या आडमुठ्या भूमिकेवर ठाकरे गटाने पुन्हा एकदा जोरदार टीकास्त्र सोडले आहे.
01 Oct 2026 10:10 AM (IST)
Narendra Mehta Controversy : मीरा-भाईंदरचे भाजप आमदार नरेंद्र मेहता यांनी ठाण्यातील एका धार्मिक कार्यक्रमात मीरा-भाईंदर ही जैनांचीच नगरी असल्याचा दावा केल्यामुळे नवा राजकीय वाद पेटला आहे. परम पूज्य दादा गुरुदेव यांच्या ३३ व्या पुण्यतिथी कार्यक्रमात मेहता यांनी हे वादग्रस्त विधान केले असून, या वक्तव्याचे तीव्र पडसाद संपूर्ण ठाणे आणि मीरा-भाईंदर परिसरात उमटत आहेत. या विधानानंतर महाराष्ट्र नवनिर्माण सेना (MNS) अत्यंत आक्रमक झाली असून मनसेचे विधानसभा अध्यक्ष सचिन पोपळे यांनी आमदार नरेंद्र मेहता यांचा चांगलाच समाचार घेत थेट आव्हान दिले आहे, ज्यामुळे स्थानिक पातळीवर मनसे विरुद्ध भाजप असा मोठा संघर्ष निर्माण झाला आहे.
01 Oct 2026 10:00 AM (IST)
FlyDubai Flight Hero Pilot Smit Machhar: फ्लायदुबईच्या (FlyDubai) विमानात सह-पायलटने अचानक केलेल्या प्राणघातक हल्ल्यात गंभीर जखमी होऊनही भारतीय वंशाचे मुख्य पायलट स्मित मच्छार यांनी दाखवलेल्या अद्भूत धैर्यामुळे १८० प्रवाशांचे प्राण वाचले आहेत. ओमानच्या सह-पायलटने केलेल्या हल्ल्यात गंभीर दुखापत झालेली असतानाही स्मित मच्छार यांनी प्रसंगावधान राखत विमानाला भीषण अपघातापासून यशस्वीपणे वाचवले आणि सुरक्षित लँडिंग घडवून आणले.
01 Oct 2026 09:50 AM (IST)
Aadhaar Mandatory For Property Registration: महाराष्ट्राच्या महसूल विभागाने दस्त नोंदणीतील (Document Registration) गैरव्यवहार आणि फसवणूक रोखण्याच्या उद्देशाने एक अत्यंत महत्त्वाचा आणि ऐतिहासिक निर्णय घेतला आहे. महसूलमंत्री चंद्रशेखर बावनकुळे यांनी दिलेल्या माहितीनुसार, आता राज्यात कोणत्याही प्रकारच्या दस्ताची नोंदणी करण्यासाठी आधार कार्ड बंधनकारक करण्यात आले असून, आधार कार्ड नसल्यास संबंधित पक्षकाराच्या दस्ताची नोंदणी केली जाणार नाही. नोंदणी प्रक्रियेदरम्यान खोटे पक्षकार अथवा बनावट साक्षीदार उभे करून जमिनी आणि मालमत्तांची होणारी फसवणूक रोखण्यासाठी हा निर्णय घेण्यात आला असून, महाराष्ट्र शासनाने या संदर्भातील अधिकृत राजपत्र (Gazette) देखील प्रसिद्ध केले आहे.
01 Oct 2026 09:40 AM (IST)
Manoj Jarange Associates ED Radar: मराठा आरक्षणाच्या मागणीसाठी आक्रमक आंदोलन उभारणारे मनोज जरांगे पाटील (Manoj Jarange Patil) यांच्या सहकाऱ्यांभोवती शासकीय तपास यंत्रणांचा फास दिवसेंदिवस अधिक आवळला जात आहे. काही दिवसांपूर्वीच अंतरवाली सराटी येथे उपोषण केल्यानंतर जरांगे यांच्यासोबत असलेल्या प्रमुख सहकाऱ्यांची आयकर (Income Tax) विभागाकडून चौकशी सुरू झाली होती. आता हे प्रकरण अधिकच गंभीर व व्याप्ती वाढणारे ठरत असून, जरांगे यांच्याशी संबंधित व्यक्तींच्या संशयास्पद आर्थिक व्यवहारांची थेट सक्तवसुली संचालनालयाकडून (ED) गुप्तवार्ता चौकशी (T-1 Level Intelligence Inquiry) सुरू होणार असल्याची माहिती समोर आली आहे. या नव्या कारवाईमुळे मराठा आरक्षण आंदोलनातील आर्थिक नाड्यांवर केंद्र सरकारचे लक्ष केंद्रित झाल्याचे स्पष्ट होत असून राजकीय वर्तुळात मोठी खळबळ उडाली आहे.
01 Oct 2026 09:30 AM (IST)
Beed Fatal Road Accident: बीड-शिरूर-पाथर्डी मार्गावरील हिवरसिंगा परिसरात रात्रीच्या सुमारास भरधाव टेम्पोने दुचाकीला जोरदार धडक दिल्यामुळे झालेल्या भीषण अपघातात दोन सख्ख्या भावांसह त्यांच्या मामाचा जागीच दुर्दैवी मृत्यू झाला. राम शेळके तसेच मंगेश रोहिदास बजगुडे आणि गणेश रोहिदास बजगुडे अशी अपघातातील मृतांची नावे आहेत. धडक इतकी जोरात होती की तिघांचाही घटनास्थळीच अंत झाला, तर अपघातानंतर टेम्पोचालक वाहनासह पसार झाला. या काळीज पिळवटून टाकणाऱ्या घटनेमुळे संपूर्ण परिसरावर शोककळा पसरली असून, धोकादायक ठरत असलेल्या या महामार्गावरील सुरक्षेचा प्रश्न पुन्हा एकदा ऐरणीवर आला आहे. सध्या शिरूर कासार पोलीस फरार टेम्पोचालकाचा शोध घेत असून पुढील तपास करत आहेत.
01 Oct 2026 09:20 AM (IST)
Shubman Gill Double Century Record: गुवाहाटी येथे पार पडलेल्या वेस्ट इंडिजविरुद्धच्या दुसऱ्या एकदिवसीय (ODI) सामन्यात भारताचा कर्णधार शुभमन गिल याने नाबाद २३३ धावांची वादळी खेळी करत इतिहास रचला आहे. वेस्ट इंडिजने उभारलेल्या ४०५ धावांच्या डोंगरासारख्या आव्हानाचा पाठलाग करताना भारताने रोहित शर्माचे शतक आणि शुभमन गिलच्या ऐतिहासिक द्विशतकाच्या जोरावर अवघ्या २ गड्यांच्या मोबदल्यात हा सामना जिंकत ३ सामन्यांच्या मालिकेत २-० अशी विजयी आघाडी घेतली. गिलने अवघ्या ११७ चेंडूंत आपले द्विशतक पूर्ण करत बांगलादेशविरुद्ध १२६ चेंडूंत द्विशतक ठोकणाऱ्या ईशान किशनचा सर्वात वेगवान एकदिवसीय द्विशतकाचा विक्रम मोडीत काढला. एकूण १३३ चेंडूंत २४ चौकार आणि ८ षटकारांची फटकेबाजी करत गिलने अनेक नव्या विक्रमांना गवसणी घातली आहे.
Maharashtra to World Breaking News :
१ ऑक्टोबरपासून व्यावसायिक एलपीजी (LPG) सिलिंडरच्या दरात वाढ झाली असून सणासुदीच्या काळात सर्वसामान्यांना महागाईचा नवा फटका बसला आहे.भारतीय हवामान विभागाने (IMD) दिलेल्या माहितीनुसार राज्यात मान्सूनच्या परतीचा प्रवास सुरू झाला असून पश्चिम महाराष्ट्र व विदर्भातील काही जिल्ह्यांत पावसाचा यलो अलर्ट जारी करण्यात आला आहे.
मुंबईतील छत्रपती शिवाजी महाराज टर्मिनस (CSMT) स्थानकाच्या पुनर्विकासाच्या कामासाठी १ ऑक्टोबरपासून ७५ दिवसांचा मोठा मेगा ब्लॉक लागू करण्यात आला आहे.आशियाई खेळ २०२६ मधील १२ व्या दिवशी भारतीय कुस्तीपटू आणि नेमबाजांनी आगेकूच केली असली तरी पुरुष व्हॉलीबॉल स्पर्धेत भारताचे आव्हान संपुष्टात आले आहे.
अमेरिकन सैन्याने इराकमधील आपल्या सर्व लष्करी तळांवरून पूर्णपणे बाहेर पडत १२ वर्षांच्या मोहिमेची अधिकृत सांगता केली आहे. सणासुदीच्या पार्श्वभूमीवर पुणे-मुंबई एक्स्प्रेस वे आणि ठाणे शहरात अवजड वाहनांना ठराविक वेळेत प्रवेशबंदी लागू करण्यात आली आहे
.png "Videos"){kind=small}
