Maharashtra Breaking News Updates Today: देवेंद्र फडणवीस मांडणार राज्याचा अर्थसंकल्प

03 Feb 2026 10:35 AM (IST)

BEM–HPCL यांची युती!

ब्लू एनर्जी मोटर्स (BEM) आणि हिंदुस्तान पेट्रोलियम कॉर्पोरेशन लिमिटेड (HPCL) यांनी निवडक ठिकाणी HPCLच्या फ्युएल रिटेल आऊटलेट्सवर बॅटरी स्वॅपिंग स्टेशन (BSS) उभारण्यासाठी एकत्र येण्याची घोषणा केली आहे. या करारानुसार, ब्लू एनर्जी मोटर्स (BEM) HPCL च्या फ्युएल स्टेशन नेटवर्कचा वापर करून इलेक्ट्रिक हेवी-ड्युटी कमर्शियल व्हेइकलसाठी बॅटरी स्वॅपिंगची सुविधा उभारणार आहे. यामुळे वाहन ताफ्यांच्या कामकाजासाठी सोयीस्कर आणि सहज उपलब्ध ऊर्जा केंद्रे तयार होतील. ही भागीदारी कमर्शियल EV फ्लीट्सच्या कामकाजाच्या गरजा पूर्ण करण्यासाठी करण्यात आली आहे.

03 Feb 2026 10:27 AM (IST)

माजी इंग्लिश कर्णधाराची भविष्यवाणी…

मायकेल वॉनने त्याच्या इंस्टाग्राम अकाउंटवर टी-२० विश्वचषकाच्या उपांत्य फेरीत पोहोचू शकणाऱ्या चार संघांची नावे दिली आहेत. वॉनने यजमान भारताला पहिला संघ म्हणून निवडले आहे. सूर्यकुमारच्या नेतृत्वाखाली भारतीय संघाने गेल्या वर्षभरात उत्कृष्ट क्रिकेट खेळले आहे. सूर्याच्या सैन्याला हरवणे हे सध्या प्रत्येक मोठ्या संघाचे स्वप्न आहे. माजी इंग्लंड कर्णधाराने इंग्लंडला दुसऱ्या संघ म्हणून निवडले आहे. वॉनचा असा विश्वास आहे की ऑस्ट्रेलिया आणि न्यूझीलंड देखील अंतिम चारमध्ये स्थान मिळविण्यासाठी शर्यतीत असू शकतात. तथापि, वॉनचा असा विश्वास आहे की पाकिस्तान आणि दक्षिण आफ्रिका उपांत्य फेरीत स्थान मिळवण्यात अपयशी ठरतील.

03 Feb 2026 10:19 AM (IST)

शाहिद कपूरच्या O’Romeo ला मोठा झटका!

चाहते साजिद नाडियाडवाला आणि विशाल भारद्वाज यांच्या “ओ रोमियो” या चित्रपटाची आतुरतेने वाट पाहत आहेत. हा चित्रपट अवघ्या काही दिवसांत प्रदर्शित होत आहे आणि त्याआधीच हे प्रकरण न्यायालयात पोहोचले आहे. गँगस्टर हुसेन उस्ताराची मुलगी सनोबेर शेख हिने सोमवारी मुंबईच्या दिवाणी न्यायालयात याचिका दाखल करून “ओ रोमियो” या चित्रपटाच्या प्रदर्शनावर बंदी घालण्याची विनंती केली आहे. सनोबीने याचिकेत दावा केला आहे की हा चित्रपट तिच्या दिवंगत वडिलांचे अनधिकृत चरित्र आहे आणि त्यांना नकारात्मक पद्धतीने दाखवण्यात आले आहे.

03 Feb 2026 10:13 AM (IST)

ICC समोर पाकिस्तानचे झाले तोंड बंद!

२०२६ च्या टी-२० विश्वचषकापूर्वी, पाकिस्तान सरकारने जाहीर केले आहे की त्यांचा संघ भारताविरुद्ध खेळणार नाही. दोन्ही देशांमधील सामना १५ फेब्रुवारी २०२६ रोजी कोलंबो येथे होणार आहे. पाकिस्तानने न येण्याची घोषणा केल्यानंतर, आयसीसीने स्पष्टीकरण मागितले. असे दिसते की पाकिस्तान क्रिकेट बोर्ड सध्या उत्तर देण्याच्या मनःस्थितीत नाही. भारताविरुद्धच्या सामन्यावर बहिष्कार टाकण्याबाबत ते शांतपणे खेळत आहे.

03 Feb 2026 09:45 AM (IST)

Pune Mayora Election 2026: कोण होणार पुण्याचा महापौर? ‘या’ तीन नावांची चर्चा

Pune Mayoral Election 2026: पुण्याचा महापौर कोण होणार याची उत्सुकता आज संपणार आहे. भाजपाकडून कोणत्या महिला नगरसेविकेला संधी दिली जाणार? काय फॉम्युला असणार? हे आज स्पष्ट होणार आहे. तसेच आरपीआयला भाजपकडून उपमहापौरपद दिले जाण्याची शक्यता वर्तविण्यात येत आहे. पुणे महापालिकेच्या महापौर उपमहापौरपदासाठी येत्या ९ फेब्रुवारी रोजी निवडणूक होत असून, मंगळवारी (दि. ३) उमेदवारी अर्ज दाखल केले जाणार आहेत. महापालिकेत भाजपकडे स्पष्ट बहुमत असल्याने महापौर उपमहापौरपदावर भाजपचाच झेंडा फडकणार, हे जवळपास निश्चित झाले आहे.

03 Feb 2026 09:40 AM (IST)

पश्चिम बंगालमध्ये तिसऱ्या आघाडीची नांदी; हुमायून कबीर यांचे '१५ फेब्रुवारी'चे अल्टिमेटम

 मुख्यमंत्री ममता बॅनर्जी यांच्या तृणमूल काँग्रेसला (TMC) सोडचिठ्ठी देऊन स्वतःचा 'जनता उन्नयन पक्ष' (JUP) स्थापन करणारे माजी आमदार हुमायून कबीर यांनी बंगालच्या राजकारणात नवीन खळबळ माजवली आहे. आगामी विधानसभा निवडणुकांच्या पार्श्वभूमीवर त्यांनी राज्यात 'तिसऱ्या आघाडी'साठी प्रयत्न सुरू केले आहेत. हुमायून कबीर यांनी ममता बॅनर्जी आणि भाजप या दोघांच्याही विरोधात लढण्यासाठी एक मोठी आघाडी उभारण्याची घोषणा केली आहे.

03 Feb 2026 09:30 AM (IST)

 कफ सिरप घोटाळा; ४ महिन्यांपासून कोमात असलेल्या बालकाचा मृत्यू

मध्य प्रदेशातील छिंदवाडा जिल्ह्यातील पारसिया येथे गेल्या वर्षी उघडकीस आलेल्या भेसळयुक्त कफ सिरप घोटाळ्याचे भीषण परिणाम अजूनही समोर येत आहेत. या घोटाळ्यातील विषारी औषधामुळे गंभीर आजारी पडलेल्या बैतुल जिल्ह्यातील एका चार वर्षांच्या निष्पाप बालकाचा उपचारादरम्यान मृत्यू झाला आहे.

03 Feb 2026 09:20 AM (IST)

शेतकरी कर्जमाफीचा शब्द सरकार पाळणार; चंद्रशेखर बावनकुळेंची ग्वाही

धाराशिव जिल्ह्यातील येणेगुर येथे आयोजित करण्यात आलेल्या जाहीर सभेत बोलताना महसूल मंत्री चंद्रशेखर बावनकुळे यांनी राज्यातील गरीब शेतकऱ्यांसाठी कर्जमाफीची मोठी घोषणा केली आहे. सरकारच्या या निर्णयामुळे आर्थिक संकटात सापडलेल्या बळीराजाला मोठा दिलासा मिळण्याची शक्यता आहे.

03 Feb 2026 09:10 AM (IST)

एअर इंडियाच्या इंधन स्विचमध्ये पुन्हा बिघाड; ‘बोईंग 787 ड्रीमलाइनर’च्या उड्डाणात अडथळा

नवी दिल्ली : महाराष्ट्राचे उपमुख्यमंत्री अजित पवार यांचे विमान अपघातात निधन झाले. या अपघातानंतर विमानात बिघाड असल्यापासून ते अनेक तर्कवितर्क लावले जात आहे. असे असताना आता एअर इंडियाच्या बोईंग ७८७ ड्रीमलाइनर या विमानाच्या इंधन स्विचमध्ये पुन्हा बिघाड झाल्याचे समोर आले आहे. यामुळे विमानाच्या उड्डाणात अडथळा निर्माण झाला आहे. इंधन स्विचमध्ये बिघाड झाल्याच्या संशयामुळे बोईंग ७८७ ड्रीमलाइनर विमान ग्राउंड करण्यात आले. वैमानिकांनी इंधन नियंत्रण स्विचमध्ये बिघाड झाल्याची तक्रार केली होती. याबाबत एअर इंडियाकडून माहिती दिली गेली.

03 Feb 2026 09:05 AM (IST)

TET परीक्षेचा अंतिम निकाल आज होणार जाहीर;

मुंबई : महाराष्ट्र राज्य परीक्षा परिषदेतर्फे टीईटी अर्थात शिक्षक पात्रता परीक्षा घेण्यात आली होती. आता या परीक्षेचा निकाल मंगळवारी (दि.३) जाहीर होणार असून, चार लाखांहून अधिक परीक्षार्थींचे लक्ष या निकालाकडे लागले आहे. इतरवेळी विद्यार्थ्यांची परीक्षा घेणाऱ्या शिक्षकांचीच आता एकप्रकारे परीक्षा असणार आहे. महाराष्ट्र राज्य परीक्षा परिषदेतर्फे २३ नोव्हेंबर २०२५ ला राज्यभरात १ हजार ४२० परीक्षा केंद्रांवर टीईटी परीक्षा घेण्यात आली होती. संपूर्ण राज्यभरातून ४ लाख ७५ हजार उमेदवारांनी ही परीक्षा दिली होती. त्यानंतर अंतिम निकाल कधी लागणार याकडे सर्वांचे लक्ष लागून होते. सर्वोच्च न्यायालयाने शिक्षकांना टीईटी उत्तीर्ण होणे अनिवार्य केले आहे. परिणामी, यंदा टीईटी प्रविष्ट होणाऱ्या उमेदवारांची संख्या देखील वाढली असल्याने निकालाची टक्केवारी वाढण्याची शक्यता आहे.

03 Feb 2026 08:58 AM (IST)

'आमच्याकडे परत परत समजवण्याचे प्रकार नसतात'; नितेश राणेंचा बंडखोरांना थेट इशारा

सिंधुदुर्ग जिल्ह्यातील वेंगुर्ले तालुक्यातील परुळे पंचायत समितीच्या जागेवरून महायुतीत पेच निर्माण झाला आहे. ही जागा शिंदे यांच्या शिवसेनेला सुटलेली असतानाही भाजपमधून निलेश सामंत यांनी बंडखोरी केल्याने राजकीय वातावरण तापले आहे. या पार्श्वभूमीवर, राज्याचे बंदरे व मत्स्यव्यवसाय मंत्री नितेश राणे यांनी कॉर्नर सभा घेत बंडखोर उमेदवाराला कडक शब्दांत तंबी दिली आहे.

"ज्या निवडणुकीचे नेतृत्व नारायण राणे करतात, तिथे संभ्रम नसतो. राणेंनी घेतलेला निर्णय आमच्यासाठी आणि कार्यकर्त्यांसाठी अंतिम शब्द असतो," असे नितेश राणे यांनी स्पष्ट केले. तसेच, "इथे जी काही वळवळ किंवा हिंमत दाखवण्याचा कार्यक्रम सुरू आहे, तो योग्य वेळी थांबला नाही तर लक्षात ठेवा, ९ फेब्रुवारीनंतर १० फेब्रुवारी उजाडणारच आहे. त्या दिवशी आमचा हिशोब होईल." असा इशाहा नितेश राणेंनी दिला आहे.

03 Feb 2026 08:52 AM (IST)

लाडकी बहीण' योजनेला अजितदादांचे नाव द्या; अमोल मिटकरींची मागणी

Ladki Bahin Yojna  उपमुख्यमंत्री अजित पवार यांच्या अकाली निधनानंतर संपूर्ण महाराष्ट्र अजूनही शोकाकुल आहे. अशातच राष्ट्रवादी काँग्रेसचे आमदार अमोल मिटकरी यांनी सरकारकडे एक अत्यंत महत्त्वाची आणि भावनिक मागणी केली आहे.

 राज्य सरकारची अत्यंत लोकप्रिय आणि महत्त्वाकांक्षी असलेली 'मुख्यमंत्री लाडकी बहीण योजना' आता 'अजितदादांची लाडकी बहीण योजना' या नावाने ओळखली जावी, अशी मागणी मिटकरींनी केली आहे.ही योजना अजितदादांच्या कल्पनेतून आणि त्यांच्या आर्थिक नियोजनातून आकाराला आली आहे. त्यामुळे त्यांच्या स्मृती जपण्यासाठी हे नामकरण अत्यंत गरजेचे असल्याचे मिटकरी यांनी नमूद केले.

03 Feb 2026 08:46 AM (IST)

IND A vs USA : तिलक वर्माचा दमदार कमबॅक!

IND A vs USA : भारत विरूद्ध यूएसए यांच्यामध्ये विश्वचषकाआधी सराव सामना खेळवला गेला. या सामन्यामध्ये भारताच्या अ संघाने कमालीची कामगिरी केली. २०२६ च्या टी२० विश्वचषकासाठी सराव सामने सुरू झाले आहेत. २ फेब्रुवारी रोजी भारत अ आणि अमेरिका यांच्यात सराव सामना झाला. या सामन्यात तिलक वर्मा यांनी बॅट आणि बॉल दोन्हीने आपली हुशारी दाखवली. त्यांच्या प्रभावी कामगिरीने भारतीय अ संघाच्या अमेरिकेविरुद्धच्या विजयातही महत्त्वाची भूमिका बजावली. पुनरागमन सामन्यातील तिलकच्या कामगिरीची आता चर्चा होत आहे.