Today's Maharashtra Breaking News Updates in marathi 21.11.2026
Maharashtra to World Breaking News : भाजपने राज्यनिहाय प्रभारी आणि सहप्रभारींच्या नियुक्त्या जाहीर केल्या आहेत. महाराष्ट्राच्या प्रभारीपदी वैजयंत पांडा यांची नियुक्ती करण्यात आली असून अमित मालवीय, सदानंद तनवाडे आणि कमलजीत सहरावत यांच्यावर सहप्रभारीपदाची जबाबदारी सोपवण्यात आली आहे. दरम्यान, विनोद तावडे यांची उत्तर प्रदेशच्या प्रभारीपदी नियुक्ती करण्यात आली आहे.
इस्रो (ISRO) आणि युरोपियन स्पेस एजन्सी (ESA) यांनी २०२३ ते २०३२ पर्यंतची आपली अंतराळ सहकार्य भागीदारी नूतनीकरण केली आहे. हरियाणा आणि झारखंडसह काही राज्यांमध्ये स्थानिक सण व हुतात्मा दिनानिमित्त २३ सप्टेंबर रोजी शाळांना सुट्टी जाहीर करण्यात आली आहे.
भारतीय महिला क्रिकेट संघाने अंतिम सामन्यात श्रीलंकेचा १४७ धावांनी पराभव करत आशियाई खेळ २०२६ मध्ये भारतासाठी पहिले सुवर्णपदक जिंकले. बंगालच्या उपसागरातील कमी दाबाच्या पट्ट्यामुळे पूर्व विदर्भ आणि कोकणासह राज्यातील २० राज्यांमध्ये हवामान खात्याने पावसाचा इशारा दिला आहे.
23 Sep 2026 05:59 PM (IST)
बँक ग्राहकांसाठी महत्त्वाची बातमी समोर आली आहे. रविवार, 27 सप्टेंबर 2026 रोजी सार्वजनिक क्षेत्रातील बँका (PSBs) आणि प्रादेशिक ग्रामीण बँका (RRBs) नियमितपणे सुरू राहणार आहेत. 28, 29 आणि 30 सप्टेंबर रोजी युनायटेड फोरम ऑफ बँक युनियन्सने (UFBU) प्रस्तावित केलेल्या तीन दिवसांच्या देशव्यापी संपाच्या पार्श्वभूमीवर हा निर्णय घेण्यात आला आहे.
23 Sep 2026 05:45 PM (IST)
शिक्षकांसाठी महत्त्वाची बातमी समोर आली आहे. वरिष्ठ वेतनश्रेणी व निवड वेतनश्रेणी प्रशिक्षण २०२६ साठी ऑनलाइन नावनोंदणी करताना प्रशिक्षण प्रकार आणि प्रशिक्षण गट निवडण्यात अनेक शिक्षकांच्या चुका झाल्या आहेत. त्यामुळे या चुका दुरुस्त करण्यासाठी शिक्षकांना अंतिम संधी देण्यात आली आहे. २२ ते २५ सप्टेंबर २०२६ या कालावधीत संबंधित प्रशिक्षणार्थींना ऑनलाइन दुरुस्ती करता येणार आहे. अशी माहिती सेवापूर्व उपसंचालक शिक्षण अरुणा यादव यांनी प्रसिद्धीपत्रकाद्वारे माहिती दिली.
23 Sep 2026 05:30 PM (IST)
जागतिक तापमानवाढ आणि हवामान बदलाच्या वाढत्या धोक्यांमध्ये जगभरातील हवामान शास्त्रज्ञांनी एका अत्यंत धक्कादायक आणि चिंतातुर करणाऱ्या संभाव्य मानवी आपत्तीचा इशारा दिला आहे. शिकागो विद्यापीठाच्या प्रसिद्ध ‘क्लायमेट इम्पॅक्ट लॅब’ (Climate Impact Lab) ने प्रसिद्ध केलेल्या एका नवीन सर्वसमावेशक मूल्यांकनानुसार, पॅसिफिक महासागरात एक अत्यंत शक्तिशाली ‘एल निनो’ (El Nino) आकार घेत आहे. या असाधारण आणि तीव्र एल निनोच्या प्रभावामुळे पुढील सहा महिन्यांत म्हणजे सप्टेंबर २०२६ ते फेब्रुवारी २०२७ या कालावधीत जगभरात तीव्र उष्णतेची लाट येऊन तब्बल ४,५०,००० (४.५ लाख) हून अधिक अतिरिक्त लोकांचा मृत्यू होण्याची शक्यता व्यक्त करण्यात आली आहे.
23 Sep 2026 05:15 PM (IST)
अहमदाबादमधील नारनपुरा भागात सुमारे ८२५ कोटी रुपये खर्चून उभारण्यात आलेले ‘वीर सावरकर स्पोर्ट्स कॉम्प्लेक्स’ आता खेळाडूंना आंतरराष्ट्रीय दर्जाच्या क्रीडा सुविधा उपलब्ध करून देत आहे. हे अत्याधुनिक क्रीडा संकुल अहमदाबाद शहराला राष्ट्रीय आणि आंतरराष्ट्रीय स्तरावरील मोठ्या क्रीडा स्पर्धांचे आयोजन करण्यासाठी सज्ज करण्यात अत्यंत महत्त्वाची भूमिका बजावत आहे.
23 Sep 2026 05:00 PM (IST)
सावित्रीबाई फुले पुणे विद्यापीठाच्या आवारातील विद्यार्थ्यांसाठीची वाय-फाय (Wi-Fi) सुविधा गेल्या काही महिन्यांपासून बंद असल्याचा आरोप रिपब्लिकन बहुजन विद्यार्थी परिषद (A) कडून करण्यात आला आहे. विद्यापीठाच्या डिजिटल सुविधांवर मोठ्या प्रमाणात खर्च होत असताना विद्यार्थ्यांना मूलभूत इंटरनेट सुविधेपासून वंचित राहावे लागत असल्याने या प्रकरणाची चौकशी करावी, अशी मागणी संघटनेचे पुणे शहर अध्यक्ष सुरज श्रीराम गायकवाड यांनी कुलगुरूंकडे निवेदनाद्वारे केली आहे.सविस्तर वाचा
23 Sep 2026 04:55 PM (IST)
आयआयटी मुंबईचा (IIT Bombay) विद्यार्थी साहिल वाकोडे याच्या आत्महत्या प्रकरणाने शैक्षणिक क्षेत्रात एकच खळबळ माजली आहे. साहिलने जातीय भेदभाव आणि संस्थात्मक दबावातून आत्महत्या केली, असा आरोप केला जात आहे. या सगळ्या घटनांच्या पार्श्वभूमीवर साहिलच्या एका जवळच्या मित्राने एक वेगळीच माहिती दिली आहे. सविस्तर वाचा
23 Sep 2026 04:50 PM (IST)
लखीमपूर खीरी : उत्तर प्रदेशातील लखीमपूर खीरी जिल्ह्यात शाळेच्या परिसरात महिला शिक्षिकेवर गोळीबार करून तिची हत्या केल्यानंतर आरोपीनेही स्वतःवर गोळी झाडल्याची धक्कादायक घटना घडली. निशात फातिमा असे मृत शिक्षिकेचे नाव असून, सऊद अन्सारी असे आरोपीचे नाव आहे. दोघेही सुमारे ११ वर्षांपासून एकमेकांना ओळखत होते. याच शाळेत दोघांनी शिक्षण घेतल्याची माहिती समोर आली आहे.सविस्तर वाचा
23 Sep 2026 04:45 PM (IST)
राजकारणात मोठी बातमी समोर येत असून भाजपने देशभरातील पक्षसंघटनेत मोठे फेरबदल करत विविध राज्ये आणि केंद्रशासित प्रदेशांसाठी प्रभारी आणि सहप्रभारींच्या नियुक्त्या जाहीर केल्या आहेत. भाजपचे राष्ट्रीय अध्यक्ष नितीन नबीन यांच्या नेतृत्वाखाली जाहीर झालेल्या या संघटनात्मक फेरबदलात 28 राज्ये आणि आठ केंद्रशासित प्रदेशांसाठी जबाबदाऱ्यांचे वाटप करण्यात आले आहे.सविस्तर वाचा
23 Sep 2026 04:40 PM (IST)
हिंदी चित्रपटसृष्टीत अनेक असे चित्रपट आहेत, ज्यांनी कमी बजेटमध्ये बनूनही बॉक्स ऑफिसवर मोठी कमाई केली आहे. आता या यादीत ‘हनुमान अंश’ या चित्रपटाचाही समावेश झाला आहे. ११ सप्टेंबर रोजी आंतरराष्ट्रीय स्तरावर प्रदर्शित झालेल्या या चित्रपटाने अवघ्या १२ दिवसांत ओव्हरसीज मार्केटमध्ये $3.5 मिलियनहून अधिक कमाई केली आहे. विशेष म्हणजे, २०२६ मध्ये सर्वाधिक ओव्हरसीज कलेक्शन करणाऱ्या चित्रपटांमध्ये ‘हनुमान अंश’ने दुसरे स्थान मिळवल्याचा दावा करण्यात आला आहे.सविस्तर वाचा
23 Sep 2026 04:35 PM (IST)
महिंद्राने आपल्या 3-डोअर Thar OG मध्ये आतापर्यंतचे मोठे अपडेट केले आहे. विशेष म्हणजे नवीन प्लॅटफॉर्म, सस्पेंशन, स्टीयरिंग, इंजिन आणि ऑफ-रोड फीचर्समध्ये बदल करूनही काही तुलनात्मक व्हेरिएंट्सच्या किंमती जवळपास जुन्याच ठेवण्यात आल्या आहेत. एंट्री-लेव्हल 1.5-लिटर डिझेल AXT ची किंमत ₹10.32 लाख, तर LXT 1.5 डिझेलची किंमत ₹12.99 लाख आहे. या किंमती डिलिव्हरीसाठी 30 नोव्हेंबर 2026 पर्यंत लागू आहेत.सविस्तर वाचा
23 Sep 2026 04:30 PM (IST)
अमेरिकन शास्त्रज्ञ युलिन चेन नोव्हेंबर २०२४ पासून चीनमध्ये तुरुंगात असून, त्यांची पत्नी युफांग रोंग आपल्या पतीला परत आणण्यासाठी सर्वतोपरी प्रयत्न करत आहेत. अमेरिकेचे अध्यक्ष डोनाल्ड ट्रम्प आणि चीनचे अध्यक्ष शी जिनपिंग (Trump-Xi Jinping) यांच्यात होणाऱ्या उच्चस्तरीय बैठकीदरम्यान ट्रम्प हा मुद्दा शी जिनपिंग यांच्यासमोर उपस्थित करतील, अशी आशा युफांग रोंग यांना आहे. चिनी अधिकाऱ्यांनी आपल्या पतीवर चुकीच्या पद्धतीने हेरगिरीचे आरोप लावले असून, त्यांना खोट्या खटल्यात अडकवण्याची भीतीही रोंग यांनी व्यक्त केली आहे.सविस्तर वाचा
23 Sep 2026 04:20 PM (IST)
मराठी चित्रपटसृष्टीत सध्या वेगवेगळ्या विषयांवर आधारित चित्रपट प्रेक्षकांच्या भेटीला येत आहेत. त्यात आता ‘देवघर ऑन रेंट’ या बहुचर्चित चित्रपटाची भर पडली आहे. अध्यात्म, रहस्य, थरार आणि अॅक्शन यांचा संगम असलेल्या या चित्रपटाची कथा एका रहस्यमय देवघराभोवती घडणाऱ्या घटनांवर आधारित आहे. पोलिसांचा पाठलाग, गुन्हेगारी आणि सूडाची कहाणी चित्रपटातून उलगडणार आहे.सविस्तर वाचा
23 Sep 2026 04:10 PM (IST)
(Asian games 2026) मध्ये भारतीय महिला हॉकी संघाची विजयी घोडदौड कायम आहे. उझबेकिस्तान आणि इंडोनेशियाला पराभूत केल्यानंतर, भारतीय संघाने थायलंडचाही धुव्वा उडवत आपला सलग तिसरा दणदणीत विजय नोंदवला. बुधवारी खेळल्या गेलेल्या पूल बी च्या सामन्यात भारताने शानदार कामगिरी करत थायलंडला २०-१ अशा मोठ्या फरकाने पराभूत केले. ६० मिनिटे चाललेल्या या एकतर्फी सामन्यावर भारतीय संघाचे पूर्णपणे वर्चस्व होते.या सामन्यात दीपिका सेहरावतने नऊ गोल करून भारतासाठी सर्वाधिक गोल केले. नवनीत कौरने चार, ऋतुजा पिसाळने तीन, तर लालरेम्सियामी, नेहा, साक्षी आणि सलीमा यांनी प्रत्येकी एक गोल केला.सविस्तर वाचा
23 Sep 2026 04:05 PM (IST)
महिंद्राने आपल्या 3-डोअर Thar OG मध्ये आतापर्यंतचे मोठे अपडेट केले आहे. विशेष म्हणजे नवीन प्लॅटफॉर्म, सस्पेंशन, स्टीयरिंग, इंजिन आणि ऑफ-रोड फीचर्समध्ये बदल करूनही काही तुलनात्मक व्हेरिएंट्सच्या किंमती जवळपास जुन्याच ठेवण्यात आल्या आहेत. एंट्री-लेव्हल 1.5-लिटर डिझेल AXT ची किंमत ₹10.32 लाख, तर LXT 1.5 डिझेलची किंमत ₹12.99 लाख आहे. या किंमती डिलिव्हरीसाठी 30 नोव्हेंबर 2026 पर्यंत लागू आहेत.सविस्तर वाचा
23 Sep 2026 04:01 PM (IST)
अमेरिकेचे राष्ट्राध्यक्ष डोनाल्ड ट्रम्प यांनी १८ सप्टेंबर २०२६ रोजी CNN ,MSNOW आणि POLITICO या तीन टेलिव्हिजन प्रसार माध्यमांवर व्हाईट हाऊस प्रवेशावर बंदी घातली . आणि १९ सप्टेंबर २०२६ रोजी त्यांच्या प्रवेशाचे पासेस प्रत्यक्षात रद्द केले . त्यामुळे अमेरिकेत एका नव्या वादाला सुरवात झाली .सविस्तर वाचा
23 Sep 2026 04:00 PM (IST)
शीतलकुमार शिंदे, धाराशिव : जिल्ह्यात पावसाअभावी खरीप हंगाम अक्षरशः हातातून गेला असून आता रब्बी हंगामावरही संकट घोंघावत आहे. अनेक जलस्रोत कोरडे पडल्याने आगामी काळात पिण्याच्या पाण्याचा प्रश्न गंभीर होण्याची शक्यता आहे. या भीषण परिस्थितीची मुख्यमंत्री देवेंद्र फडणवीस यांनी बुधवारी (२३ सप्टेंबर) करजखेडा येथील शंभर टक्के कोरड्या पडलेल्या मसाई तलावाची पाहणी करून प्रत्यक्ष दखल घेतली. शेतकऱ्यांना सरसकट मदत देण्यासाठी येत्या दोन दिवसांत शासन निर्णय काढण्याचा प्रयत्न केला जाईल, अशी घोषणा त्यांनी केली. (Devendra Fadnavis)
23 Sep 2026 03:55 PM (IST)
Mumbai Real Estate Market : मुंबई रियल इस्टेडने मार्केट मध्ये एक वेगळा टप्पा गाठला आहे. तब्बल 712 कोटींची खरेदी करण्यात आली आहे. मुंबईच्या जुहू तारा मध्ये जिथे मोठं-मोठे सेलिब्रेटी आणि फिल्म इंडस्ट्री मधले अभिनेते राहता. तब्बल ग्राऊंड पासून 07 मजल्या पर्यंक खरेदी करण्यात आली आहे. ही खरेदी केली आहे. ही खरेदी केली आहे, ‘एंजेल वन’ चे संस्थापक दिनेश ठक्कर यांनी केली आहे. मुंबईच्या जुहू येथे तब्बल 712 कोटींमध्ये ही खरेदी करण्यात आली आहे. ही खरेदी देशातील सर्वात किंमतीची आणि सर्वात मोठी डील मानली जात आहे. या मध्ये एम्बेसी टेराझा प्रकल्पातील 63,000 हजार कारपेट चा एरिया असून या टॉवर मध्ये लक्झरी सुविधा आहे. मुंबई रिअल इस्टेटमधील ही खरेदी ऐतिहासिक मानली आहे.
23 Sep 2026 03:50 PM (IST)
Asian Games 2026/Kabaddi: सध्या जपानमध्ये एशियन गेम्स 2026 स्पर्धा सुरू आहे. या स्पर्धेत भारतीय पुरुष कबड्डी संघाने आपली विजयी घौडदौड कायम ठेवली आहे. बांग्लादेशचा पराभव करत भारताने सेमीफायनलमध्ये प्रवेश केला आहे. या शानदार कामगिरीसह भारतीय संघाने स्पर्धेतील आपले पदकही निश्चित केले आहे.कर्णधार सुनील कुमारच्या नेतृत्वाखाली खेळणाऱ्या भारतीय संघाने बुधवारी टोकाई सिटिजन्स जिम्नेजियम येथे झालेल्या ‘ग्रुप ए’च्या सामन्यात बांगलादेशचा ४८-२५ असा धुव्वा उडवला.
23 Sep 2026 03:45 PM (IST)
महानगर गॅस लिमिटेड (एमजीएल) (Mahanagar Gas) ने आपल्या ग्राहकांसाठी एक महत्त्वाचा संदेश दिला आहे. एमजीएलने गॅस बिलाचे अपडेट्स किंवा गॅस पुरवठा तत्काळ खंडित करणे याच्याशी संबंधित असल्याचा दावा करणारे, एसएमएस आणि व्हॉट्सअॅप याद्वारे प्रसारित केले जाणारे फसवणुकीचे संदेश व कॉल्स, घोटाळ्याच्या लिंक्स, घातक एपीके डाउनलोड्स आणि तोतयागिरीच्या प्रयत्नांपासून सतर्क राहण्याचे आवाहन केले आहे.
वाचा सविस्तर : Mahanagar Gas : तुम्ही महानगर गॅसधारक आहात? तर, ही बातमी नक्कीच तुमच्यासाठी आहे..!
23 Sep 2026 03:40 PM (IST)
Nagpur News : दिवसेंदिवस विज्ञान संशोधन होत आहे . तंत्रज्ञान वाढत आहे तसतसे मानवी सुविधा सुकर होत चालल्या आहेत . याचीच प्रचिती आपल्याला आता नागपूरच्या डॉ. बाबासाहेब आंबेडकर आंतरराष्ट्रीय विमानतळावर प्रवाशांचा प्रवेश आता आणखी वेगवान आणि सुलभ होणार आहे. जीएमआर नागपूर इंटरनॅशनल एअरपोर्ट लिमिटेडने ‘डिजी यात्रा’ प्रणालीमध्ये महत्त्वपूर्ण सुधारणा केली असून, सर्व डिजी यात्रा सक्षम प्रवेशद्वारांवर आता ‘सिंगल स्टेप फेस रिकग्निशन’ तंत्रज्ञान कार्यान्वित करण्यात आले आहे. त्यामुळे विमानतळाच्या प्रवेशद्वारावर बोर्डिंग पास किंवा क्यूआर कोड स्कॅन करण्याचा अतिरिक्त टप्पा आता राहणार नाही.
23 Sep 2026 03:35 PM (IST)
23 Sep 2026 03:30 PM (IST)
मेढा : राज्यात दारूबंदीच्या प्रयोगासाठी ओळखल्या जाणाऱ्या जावळी तालुक्यात अवैध मद्यविक्रीचा प्रश्न पुन्हा ऐरणीवर आला आहे. राज्य उत्पादन शुल्क विभागाने २१ सप्टेंबर रोजी तालुक्यातील विविध गावांमध्ये अचानक छापे टाकत आठ संशयितांविरुद्ध गुन्हे दाखल केले. या कारवाईत देशी-विदेशी दारू आणि बिअरसह एकूण २९ हजार ५०० रुपयांचा मुद्देमाल जप्त करण्यात आला. संपूर्ण जावळी तालुक्यात दारूबंदी असतानाही काही भागांत अवैधपणे दारू विक्री होत असल्याच्या तक्रारी आहेत. या कारवाईमुळे दारूबंदीच्या अंमलबजावणीवर पुन्हा प्रश्न उपस्थित झाले आहेत. अवैध मद्यविक्री रोखण्याची जबाबदारी पोलिस आणि उत्पादन शुल्क विभागाची असताना, दोन्ही विभागांमधील समन्वयाबाबतही प्रश्न उपस्थित होत आहेत.
23 Sep 2026 03:25 PM (IST)
भारत आणि कॅनडा (India-Canada Trade) यांच्यातील राजनैतिक आणि व्यापारी संबंधांमध्ये गेल्या काही काळात आलेल्या दुराव्यानंतर आता पुन्हा एकदा सकारात्मक आणि नव्या पर्वाची सुरुवात होताना दिसत आहे. भारताचे पंतप्रधान नरेंद्र मोदी (PM Narendra Modi) या वर्षाच्या अखेरीस, म्हणजेच डिसेंबर २०२६ च्या सुमारास कॅनडाच्या दौऱ्यावर जाण्याची दाट शक्यता आहे. कॅनडाचे नवे पंतप्रधान मार्क कार्नी यांनी न्यूयॉर्कमधील संयुक्त राष्ट्र महासभेच्या (UNGA) महत्त्वपूर्ण बैठकीदरम्यान पत्रकारांशी बोलताना या बातमीला अधिकृतपणे दुजोरा दिला आहे. या दौऱ्यादरम्यान दोन्ही देशांमध्ये बहुप्रतिक्षित ‘सर्वसमावेशक आर्थिक भागीदारी करारावर’ (CEPA) स्वाक्षरी होण्याची शक्यता वर्तवण्यात येत असून, यामुळे दोन्ही देशांमधील आर्थिक आणि व्यापारी संबंधांना अभूतपूर्व गती मिळण्याची अपेक्षा व्यक्त केली जात आहे.
23 Sep 2026 03:20 PM (IST)
Vasant Davkhare CD Case: राज्याच्या राजकीय वर्तुळाचे लक्ष लागलेल्या दिवंगत नेते वसंत डावखरे यांच्या मानहानी खटल्याचा तब्बल 17 वर्षांनंतर निकाल लागला आहे. कल्याण न्यायालयाने उद्धव ठाकरे, उपमुख्यमंत्री एकनाथ शिंदे, माजी खासदार आनंद परांजपे आणि रमाकांत देवळेकर या चौघांची निर्दोष मुक्तता केली. 23 सप्टेंबर 2026 रोजी हा निकाल देण्यात आला. हे प्रकरण 2009 च्या लोकसभा निवडणुकीशी संबंधित आहे. त्यावेळी कल्याण लोकसभा मतदारसंघात वसंत डावखरे आणि आनंद परांजपे यांच्यात निवडणूक लढत झाली होती. 22 एप्रिल 2009 रोजी परांजपे यांच्या प्रचारासाठी झालेल्या सभेत तत्कालीन शिवसेना कार्याध्यक्ष उद्धव ठाकरे यांनी डावखरे यांच्याशी संबंधित असल्याचा दावा करण्यात आलेला एक व्हिडिओ/CD सार्वजनिकरीत्या दाखवला होता.
23 Sep 2026 03:15 PM (IST)
भारतीय पुरुष क्रिकेट संघ आता आशियाई क्रीडा (Asian Games 2026) स्पर्धेसाठी सज्ज आहे. जपानमधील आयची-नागोया येथे सुरू असलेल्या आशियाई क्रीडा स्पर्धेत भारतीय महिला क्रिकेट संघाने अंतिम सामन्यात श्रीलंकेला हरवून सुवर्णपदक जिंकले. आता सर्वांचे लक्ष भारतीय पुरुष क्रिकेट संघावर लागले आहे. भारतीय संघ जपानमध्ये दाखल झाला असून श्रेयस अय्यरच्या नेतृत्वाखाली भारतीय संघ लवकरच एशियम गेम्समधील सामन्यांसाठी मैदानात उतरणार आहे. आशियाई क्रीडा स्पर्धेत टीम इंडिया आपला पहिला सामना कधी खेळेल, जाणून घेऊयात.
23 Sep 2026 03:10 PM (IST)
सातारा : सातारा जिल्हा मध्यवर्ती सहकारी बँकेच्या निवडणुकीचा कार्यक्रम जाहीर होताच जिल्ह्यातील सहकार क्षेत्रातील राजकीय हालचालींना वेग आला आहे. संचालकांच्या २१ जागांसाठी २०१९ मतदार मतदान करणार असल्याने प्रत्येक मतदारसंघातील राजकीय आणि संस्थात्मक समीकरणांना महत्त्व प्राप्त झाले आहे. उमेदवारी निश्चितीपासून पॅनेलच्या बांधणीपर्यंत पुढील काही दिवसांत जोरदार हालचाली होण्याची होण्याची चिन्हे आहेत.
सातारा जिल्हा मध्यवर्ती बँकेची आचारसंहिता लागू झाली असून, एक नोव्हेंबर रोजी मतदान तर तीन नोव्हेंबर रोजी मतमोजणी होणार आहे. जिल्हा बँकेच्या सत्ताकारणात विविध राजकीय गटांचा प्रभाव असल्याने ही निवडणूक केवळ सहकारी संस्थांच्या प्रतिनिधींची निवड न राहता स्थानिक राजकीय समीकरणांचीही परीक्षा घेणारी ठरणार आहे. महायुतीतील भाजप, राष्ट्रवादी काँग्रेसचा अजित पवार गट आणि शिवसेनेचा एकनाथ शिंदे गट यांच्यातील स्थानिक समन्वय कसा होतो, याकडे राजकीय वर्तुळाचे लक्ष लागले आहे.
23 Sep 2026 03:05 PM (IST)
IIT Bombay Student Sahil Vakode Suicide Case : आयआयटी बॉम्बेमधील बी.टेक द्वितीय वर्षाचा विद्यार्थी साहिल वाकोडे याच्या आत्महत्या प्रकरणात एक मोठा निर्णय घेण्यात आला आहे. सूत्रांनी दिलेल्या माहितीनुसार, या प्रकरणाच्या निष्पक्ष चौकशीसाठी आयआयटी प्रशासनाने १० सदस्यांची एक विशेष समिती स्थापन केली असून, एका आठवड्याच्या आत अहवाल सादर करण्याचे निर्देश दिले आहेत. चौकशी प्रक्रिया पूर्ण होईपर्यंत प्राध्यापक सूर्यनारायण डुल्ला यांना रजेवर पाठवण्यात आले आहे, जेणेकरून तपासात निष्पक्षता राहील.
23 Sep 2026 02:59 PM (IST)
अल निनोच्या भयंकर सावटाने अहिल्यानगर जिल्ह्यातील शेवगाव तालुक्यातील बळीराजा पार कोलमडून गेला आहे. ऐन पावसाळ्यात निसर्गाने दिलेल्या हुलकावणीमुळे डोळ्यांदेखत उभी पिके जळून खाक झाली आहेत. आधीच दुष्काळी भाग म्हणून ओळखल्या जाणाऱ्या शेवगाव तालुक्यात सप्टेंबर महिना संपत आला तरी पावसाचा थेंबही न पडल्याने परिस्थिती अत्यंत भीषण बनली आहे. निसर्गाच्या या अवकृपेमुळे तालुक्यातील हजारो शेतकरी आता कर्जाच्या महाभयंकर चक्रव्यूहात पार अडकले आहेत.
23 Sep 2026 02:47 PM (IST)
शासनाच्या विविध धोरणांमुळे सरकारी व अनुदानित शाळा बंद पडण्याच्या मार्गावर असल्याच्या निषेधार्थ आणि शिक्षण हक्काच्या रक्षणासाठी ‘शाळा वाचवा, शिक्षण वाचवा मंच, महाराष्ट्र’च्या वतीने येत्या ५ ऑक्टोबरपासून मुंबईतील आझाद मैदानावर बेमुदत धरणे आंदोलन छेडण्यात येणार आहे. या आंदोलनात कुडाळ तालुक्यातून किमान ७००, तर संपूर्ण सिंधुदुर्ग जिल्ह्यातून २५०० ते ३००० नागरिक सहभागी होतील, अशी माहिती सेवानिवृत्त शिक्षक संजय वेतुरेकर आणि अंकुश कदम यांनी पत्रकार परिषदेत दिली.
कुडाळ येथील मराठा समाज हॉलमध्ये या आंदोलनाच्या पूर्वतयारीसाठी विविध सामाजिक संघटना, शिक्षणप्रेमी, संस्थाचालक, सरपंच, शिक्षक आणि पालकांची बैठक पार पडली. या बैठकीनंतर आयोजित पत्रकार परिषदेत आंदोलनाची पार्श्वभूमी व प्रमुख मागण्या स्पष्ट करण्यात आल्या.
23 Sep 2026 02:36 PM (IST)
कर्जत तालुक्यातील सर्वात मोठ्या नेरळ ग्रामपंचायत मध्ये आज नळाला गढूळ पाणी आले.त्याबद्दल प्रचंड संताप व्यक्त केला जात असून जलशुद्धीकरण केंद्र असून देखील गढूळ पाण्याचे वितरण करण्यात आल्याने ग्रामपंचायत चे कारभारावर प्रश्नचिन्ह निर्माण झाले आहे.
कर्जत तालुक्यातील सर्वात श्रीमंत ग्रामपंचायत म्हणून ओळख असलेल्या नेरळ ग्रामपंचायतीचा कारभार सध्या पूर्णपणे कोलमडला आहे. प्रशासकीय राजवट सुरू झाल्यापासून ग्रामपंचायतीला जणू ग्रहणच लागले आहे. गेल्या कित्येक महिन्यांपासून विविध माध्यमातून आणि सामाजिक कार्यकर्त्यांकडून प्रशासनाचा भोंगळ कारभार चव्हाट्यावर आणला जात आहे. तरीही प्रशासक राजवट असून अधिकाऱ्यांकडून ग्रामस्थ आणि रहिवाशी यांना सुखसोयी सुविधा उपलब्ध करून देण्याचा प्रयत्न झालेला दिसून येत नाही.पावसाळ्यातील चार महिने बहुसख्य ठिकाणी पाण्याचा उपसा होतो तेथे गढूळ पाणी असते.नेरळ नळपाणी योजनेचे पाणी उचलले जाते त्या उल्हास नदीमध्ये देखील गढूळ पाणी आहे.त्यामुळे जल शुद्धीकरण यंत्रणा महत्वाची ठरत असते. परंतु नेरळ ग्रामपंचायत नळपाणी योजनेची जल शुद्धीकरण यंत्रणा कार्यक्षम असताना देखील नळाद्वारे येणारे पाणी हे गढूळ येत असल्याने ग्रामस्थ संतप्त आहेत.
23 Sep 2026 02:25 PM (IST)
वसई-विरार शहर महानगरपालिकेच्या परिवहन समितीवर बहुजन विकास आघाडीचं पूर्ण वर्चस्व पाहायला मिळालं आहे. परिवहन समितीच्या निवडणुकीत १२ पैकी १२ जागा बविआने मिळवल्या असून भाजपला एकही जागा मिळालेली नाही.
एकूण २४ अर्ज पात्र ठरल्यानंतर त्यापैकी १२ सदस्यांची परिवहन समितीवर निवड करण्यात आली. त्यामुळे समितीचं पक्षीय संख्याबळ बविआ १२ आणि भाजप ० असं राहणार आहे.
शहरातील बससेवा, बस मार्ग, प्रवाशांच्या सुविधा आणि तिकीट व्यवस्थेसह सार्वजनिक वाहतुकीशी संबंधित महत्त्वाचे निर्णय या समितीसमोर असणार आहेत. वाढती लोकसंख्या आणि सार्वजनिक वाहतुकीवरील ताण लक्षात घेता नव्या समितीसमोर सक्षम परिवहन व्यवस्था उभारण्याचं आव्हान असणार आहे.
23 Sep 2026 02:00 PM (IST)
गणेशोत्सव हा केवळ उत्सव नसून सामाजिक बांधिलकी जपण्याचा सण आहे, याचा प्रत्यय विनायक नवयुग मित्र मंडळाने घालून दिला आहे. मंडळातर्फे गरजू विद्यार्थ्यांसाठी मदतीचा हात पुढे करण्यात आला आहे. मंडळातर्फे बाल शिक्षण मंदिर शाळा आणि लॉ कॉलेज रस्त्यावरील रामचंद्र राठी शाळेतील एकल पालक असलेल्या विद्यार्थी आणि विद्यार्थिनींना शालेय फीचे वितरण करण्यात आले. तसेच महारोगी सेवा समिती, वरोरा (आनंदवन) येथील विद्यार्थ्यांना शालेय साहित्याचे वाटप करण्यात आले. या कार्यक्रमाला प्रमुख पाहुणे म्हणून पुणे महापालिका आयुक्त नवल किशोर राम उपस्थित होते.
23 Sep 2026 01:55 PM (IST)
गणेशोत्सवाच्या पार्श्वभूमीवर गणेशभक्तांसाठी एक नवा संगीतमय नजराणा प्रेक्षकांच्या भेटीला आला आहे. ‘वीरता प्रॉडक्शन’च्या ‘बाप्पा माझा’ या नव्या गाण्याने अल्पावधीतच प्रेक्षकांचे लक्ष वेधून घेतले आहे. प्रसिद्ध गायक दिव्या कुमार यांच्या दमदार आवाजातील या गाण्याने प्रदर्शित झाल्यानंतर अवघ्या चार दिवसांत 1 मिलियन व्ह्यूजचा टप्पा पार केला आहे.
23 Sep 2026 01:50 PM (IST)
राज्य शासनाने सार्वजनिक वितरण व्यवस्थेत पारदर्शकता आणण्यासाठी आणि अपात्र लाभार्थ्यांना आळा घालण्यासाठी ‘मिशन सुधार’ अभियान हाती घेतले आहे. या मोहिमेंतर्गत आधार डेटाबेस आणि शिधापत्रिकेवरील माहितीचा मेळ घालून लाभार्थ्यांची व्यापक पडताळणी करण्यात येत आहे. अकोला जिल्ह्यात राबवण्यात आलेल्या या मोहिमेत १० हजार ७२८ शिधापत्रिका अपात्र ठरविण्यात आल्या असून, त्यावरील धान्याचा पुरवठा बंद करण्यात आला आहे, अशी माहिती पुरवठा विभागाने दिली.
23 Sep 2026 01:45 PM (IST)
झी मराठीवर लवकरच ‘धाकट्या सुनबाई’ ही नवी मालिका प्रेक्षकांच्या भेटीला येत आहे. नात्यांमधला जिव्हाळा, माणुसकी आणि भावनांची सुंदर गुंफण या मालिकेतून पाहायला मिळणार आहे. या मालिकेत अभिनेत्री चिन्मयी मोरे ‘राधिका’ची प्रमुख भूमिका साकारत आहे. सोज्वळ, प्रेमळ आणि आपल्या माणसांच्या सुख-दुःखात खंबीरपणे साथ देणारी राधिका प्रेक्षकांच्या मनात आपली जागा निर्माण करेल, असा विश्वास चिन्मयी व्यक्त करते.
23 Sep 2026 01:40 PM (IST)
जागतिक भू-कारभारात आणि आंतरराष्ट्रीय राजकारणात सध्या अत्यंत वेगाने घडामोडी घडत आहेत. अमेरिकेचे अध्यक्ष डोनाल्ड ट्रम्प (Donald Trump) यांनी मध्यपूर्वेतील वाढत्या तणावाच्या पार्श्वभूमीवर एक अत्यंत मोठा आणि धोरणात्मक निर्णय घेतला आहे. मध्यपूर्वेतील ऊर्जेच्या पायाभूत सुविधा आणि तेल वाहतुकीचे मार्ग इराणी तपासणी नाक्यांपासून दूर हलवण्याची गरज अधोरेखित करत त्यांनी ‘भारत-मध्य पूर्व-युरोप आर्थिक कॉरिडॉर’ (IMEC) या महत्त्वाकांक्षी प्रवाहाला आपल्या प्रशासनाचा पूर्ण पाठिंबा असल्याचे जाहीर केले आहे. ट्रम्प यांच्या या वक्तव्यामुळे मध्यपूर्वेतील व्यापारी मार्गांचे भविष्य आणि भारताच्या धोरणात्मक सहभागाला नवे बळ मिळाले आहे.
23 Sep 2026 01:35 PM (IST)
जम्मू-काश्मीरमधील हिरानगर मतदारसंघाचे भाजप आमदार विजय शर्मा यांचा मुलगा बेपत्ता झाल्याची माहिती समोर आली होती. पण अवघ्या काही तासात मुलाला शोधण्यात पोलिसांना यश आले. आदित्य शर्मा बेपत्ता झाल्यापासून संपूर्ण राज्यात एकच खळबळ माजली होती. अपहरण आणि दहशतवादी संबंधांसह सर्व प्रकारचे तर्कवितर्क समोर येऊ लागले. शेवटी पोलिसांच्या पथकाने काही तासात त्याचा शोध घेतला, पोलिसांच्या तपासादरम्यान तो दिल्लीत असल्याची माहिती मिळाली आणि पोलिसांनी त्याला दिल्लीतून ताब्यात घेतले.
23 Sep 2026 01:30 PM (IST)
भारताची स्टार वेटलिफ्टर मीराबाई चानूने आशियाई क्रीडा स्पर्धेत ( Asian Games 2026) इतिहास रचला आहे. मीराबाईने महिलांच्या ४९ किलो वजनी गटात एकूण १९८ किलो वजन उचलून रौप्य पदक जिंकले. हे मीराबाईचे आशियाई क्रीडा स्पर्धेतील पहिले पदक आहे. २८ वर्षांनंतर वेटलिफ्टिंगमध्ये भारताला मिळालेले हे पहिले आशियाई क्रीडा पदक आहे.
23 Sep 2026 01:25 PM (IST)
परदेशात शिक्षण घेण्याची इच्छा असणाऱ्या आणि अमेरिकेतील उच्च शिक्षणाबद्दल माहिती घेण्यास उत्सुक असणाऱ्या विद्यार्थ्यांसाठी एक अत्यंत महत्त्वाची बातमी समोर आली आहे. प्रसिद्ध ‘यूएस न्यूज अँड वर्ल्ड रिपोर्ट’ने आपली ‘बेस्ट कॉलेज रँकिंग २०२७’ प्रसिद्ध केली आहे. यावेळच्या रँकिंगमध्ये एक ऐतिहासिक बदल पाहायला मिळाला आहे. मॅसेच्युसेट्स इन्स्टिट्यूट ऑफ टेक्नॉलॉजीने (MIT) सलग १५ वर्षांपासून पहिल्या क्रमांकावर असलेल्या प्रिन्स्टन युनिव्हर्सिटीला मागे टाकत अव्वल स्थान पटकावले आहे.
23 Sep 2026 01:20 PM (IST)
OTT प्रेक्षकांसाठी सप्टेंबरचा हा चौथा आठवडा मनोरंजनाने भरलेला आहे. विविध प्रकारच्या कथा असलेले चित्रपट आणि वेब सीरिज या आठवड्यात वेगवेगळ्या OTT प्लॅटफॉर्मवर प्रदर्शित होणार आहेत. परिणीती चोप्राची थ्रिलर सीरिज, यशचा ‘टॉक्सिक’, ‘हुंकार: द रोअर’सह एकूण 7 चित्रपट आणि सीरिज प्रेक्षकांच्या भेटीला येत आहेत.
23 Sep 2026 01:15 PM (IST)
सध्या बंगालच्या उपसागरात निर्माण झालेल्या कमी दाबाच्या क्षेत्रामुळे आणि हवामान बदलांमुळे चक्रीवादळाचा धोका निर्माण झाला असून प्रशासनाला सतर्क राहण्याचा इशारा देण्यात आला आहे. बंगालच्या उपसागरात निर्माण झालेली हवामान प्रणाली अधिक तीव्र झाली असून तिचे ‘डीप डिप्रेशन’मध्ये रूपांतर झाले आहे. यामुळे ओडिशा आणि आंध्र प्रदेशात मुसळधार पाऊस आणि वेगवान वाऱ्यांचा धोका वाढला आहे. संभाव्य आपत्कालीन परिस्थिती लक्षात घेऊन दोन्ही राज्यांमध्ये प्रशासनाने खबरदारीच्या उपाययोजना सुरू केल्या आहेत.
23 Sep 2026 01:05 PM (IST)
मोबाईल यूजर्ससाठी एक आनंदाची आणि महत्त्वाची बातमी आहे. ज्या यूजर्सना रिचार्ज प्लॅनमध्ये इंटरनेट डेटाची आवश्यकता नसते आणि केवळ कॉलिंग किंवा एसएमएसची गरज असते, अशा यूजर्ससाठी टेलीकॉम रेगुलेटरी अथॉरिटी ऑफ इंडिया म्हणजेच ट्रायने एक महत्त्वाचा निर्णय घेतला आहे.
23 Sep 2026 01:00 PM (IST)
नागपूर : दारू पिण्यासाठी पैसे देण्यास नकार दिल्याच्या रागातून एका मुलाने स्वतःच्या आईवर चाकूने हल्ला करून तिच्या हत्येचा प्रयत्न केला. ही खळबळजनक घटना जगन्नाथ परिसरातील कुंभारपुरा येथील शिवभोजन थाळी केंद्रात सोमवारी (दि.21) घडली. आईवर पुन्हा वार करण्यापूर्वी तिच्या सहकारी महिलेने धाडस दाखवत आरोपीच्या हातातील चाकू हिसकावून घेतल्याने मोठा अनर्थ टळला.
23 Sep 2026 12:50 PM (IST)
Milk Price Hike: कर्नाटकातील सहकारी दूध उत्पादक संघटनांनी वाढता उत्पादन खर्च आणि उत्पादन खर्चाचे कारण देत, नंदिनी दुधाच्या खरेदी आणि किरकोळ दरात प्रति लिटर ८-१० रुपयांनी वाढ करण्याची राज्य सरकारला विनंती केली आहे. दूध संघाच्या प्रतिनिधी मंडळाने मंगळवारी विधान सौध येथे मुख्यमंत्री डी. के. शिवकुमार यांची भेट घेतली आणि दुधाच्या दरात प्रति लिटर ८-१० रुपयांनी वाढ करण्याची मागणी केली.
23 Sep 2026 12:40 PM (IST)
IIM Admissions 2026 : देशातील प्रतिष्ठित ‘इंडियन इंस्टीट्यूट्स ऑफ मॅनेजमेंट’ (IIM) आता त्यांच्या अंडरग्रेजुएट प्रवेश प्रक्रियेत मोठा बदल करण्याच्या तयारीत आहेत. माहितीचा अधिकार अंतर्गत १५ सप्टेंबर २०२६ रोजी समोर आलेल्या दस्तऐवजांनुसार, सर्व IIM मिळून UG प्रोग्राम्ससाठी एकच ‘कॉमन एंट्रन्स टेस्ट’ आणि एमबीए प्रवेशासाठी ‘सेंट्रलाइज्ड डिजिटल कौन्सिलिंग प्लॅटफॉर्म’ सुरू करण्यावर चर्चा करत आहेत. हा प्रस्ताव १४ मे २०२६ रोजी केंद्रीय शिक्षण मंत्री धर्मेंद्र प्रधान यांच्या अध्यक्षतेखाली झालेल्या IIM कोऑर्डिनेशन फोरमच्या बैठकीत मांडण्यात आला होता.
23 Sep 2026 12:30 PM (IST)
1. आधारची माहिती: UAN शी जोडलेला आधार आणि EPFO रेकॉर्डमधील वैयक्तिक माहिती योग्य आहे का, हे तपासा. विशेषतः नाव आणि जन्मतारखेसारख्या तपशिलांकडे लक्ष द्या.
2. PAN तपशील: UAN मध्ये नोंदवलेला PAN क्रमांक योग्य आहे का आणि त्यावरील नाव EPFO रेकॉर्डशी सुसंगत आहे का, हे पाहा.
3. बँक खाते आणि IFSC: PF ची रक्कम ज्या खात्यात जमा होणार आहे, त्या खात्याचा क्रमांक आणि IFSC अचूक असणे अत्यंत महत्त्वाचे आहे. संबंधित बँक खाते कार्यरत असल्याचीही खात्री करा.
4. नाव: EPFO, आधार आणि PAN मधील नावाच्या स्पेलिंगमध्ये तफावत असल्यास ती आधी दुरुस्त करणे योग्य ठरेल.
5. जन्मतारीख: UAN मध्ये नोंदवलेली जन्मतारीख योग्य आहे का, हे तपासा. सदस्याची ओळख आणि EPFO रेकॉर्डच्या दृष्टीने हा महत्त्वाचा तपशील आहे.
6. नोकरीच्या तारखा: कंपनीत रुजू झाल्याची Date of Joining आणि नोकरी सोडल्याची Date of Exit योग्य नोंदली आहे का, हेही तपासा.
23 Sep 2026 12:20 PM (IST)
सणासुदीच्या पार्श्वभूमीवर अन्न व औषध प्रशासनाने राज्यभर धडक कारवाई करत संशयास्पद भेसळयुक्त, चुकीचे लेबल असलेले आणि निकृष्ट दर्जाचे अन्नपदार्थ जप्त केले. विविध कारवायांमध्ये १० हजार ८३६.६५ किलो/लिटर अन्नसाठा जप्त करण्यात आला असून, त्याची एकूण किंमत ३० लाख ८१ हजार ८८८ रुपये आहे. यात खवा-मावा, पेढे, तूप, तेल, बर्फी, चहा पावडर, मिठाई आणि अन्य दुग्धजन्य पदार्थांचा समावेश आहे.
23 Sep 2026 12:12 PM (IST)
राज्यासह संपूर्ण देशात कॉकरोच जनता पार्टीची स्कूल ठिक करो मोहिम सुरू असतानाच सीजेपीचे सह-संयोजक आणि प्रवक्ते सौरभ दास यांनी दिल्ली पोलिसांवर गंभीर आरोप केले आहेत. दिल्ली पोलीस अजूनही आपली आणि आपल्या सहकाऱ्यांची चौकशी करत असून, एका कथित ‘राष्ट्रविरोधी’ कथानकात अडकवण्याचा प्रयत्न केला जात असल्याचा दावा दास यांनी केला आहे.
23 Sep 2026 11:54 AM (IST)
भारत आणि न्यूझीलंड यांच्यातील पाच सामन्यांची टी-२० मालिका २२ ऑक्टोबरपासून सुरू होत आहे. या मालिकेसाठी न्यूझीलंड क्रिकेट संघाची घोषणा करण्यात आली आहे. स्टार खेळाडू रचिन रवींद्र दुखापतीमुळे संपूर्ण मालिकेतून बाहेर पडला आहे, तर वेगवान गोलंदाज ॲडम मिल्नेचे संघात पुनरागमन झाले आहे. या मालिकेसाठी भारतीय संघ न्यूझीलंडचा दौरा करणार आहे. न्यूझीलंडने या टी-२० मालिकेसाठी १६ सदस्यीय संघाची घोषणा केली आहे.
23 Sep 2026 11:45 AM (IST)
देशातील पहिल्या बुलेट ट्रेन प्रकल्पाबाबत म्हणजेच मुंबई-अहमदाबाद हाय स्पीड रेल कॉरिडोअरबाबत नागरिकांमध्ये प्रचंड उत्सुकता आहे. याच पार्श्वभूमीवर बुलेट ट्रेनचा ड्रायव्हर होण्यासाठी नेमकी कोणती प्रक्रिया असते, असा प्रश्न अनेक तरुणांच्या मनात निर्माण होत आहे. ‘नॅशनल हाय स्पीड रेल कॉर्पोरेशन लिमिटेड’ या संपूर्ण प्रकल्पाचे संचालन करत असून, याच संस्थेकडून बुलेट ट्रेन चालकांची म्हणजेच HSR पायलटची भरती केली जाते. या पदासाठी आवश्यक पात्रता, अर्ज प्रक्रिया आणि मिळणारा पगार याबाबतची सविस्तर माहिती आज आपण जाणून घेणार आहोत.






