Maharashtra Today’s Live News in Marathi: शिवसेना पक्ष आणि धनुष्यबाण चिन्हावरून शिंदे गटाचा आज युक्तिवाद

23 Sep 2026 09:45 AM (IST)

Fuel Price Update: आंतरराष्ट्रीय बाजारात चढ-उतार चालूच; देशात पेट्रोल-डिझेलचे दर स्थिर 

Fuel Price Update: जागतिक बाजारपेठेत कच्च्या तेलाच्या (Crude Oil) किमतीत सातत्याने चढ-उतार होत असले, तरी आज देशभरात इंधनाचे दर स्थिर राहिले आहेत. तेल कंपन्यांनी जाहीर केलेल्या ताज्या दरांनुसार, देशातील पेट्रोल आणि डिझेलच्या किमतींमध्ये कोणतीही मोठी वाढ किंवा कपात झालेली नाही. सध्या देशात पेट्रोलचा सरासरी दर १११.२१ रुपये प्रति लिटर तर डिझेलचा दर ९७.८३ रुपये प्रति लिटर नोंदवला गेला आहे. इतर मेट्रो शहरांच्या तुलनेत देशाची राजधानी दिल्लीत इंधनाचे दर सर्वात कमी आहेत. 

23 Sep 2026 09:36 AM (IST)

Cancer Drug Price Overcharging: कॅन्सरच्या औषधांवरील नफेखोरीवरून सुप्रीम कोर्ट आक्रमक 

Cancer Drug Price Overcharging:   कॅन्सरसारख्या गंभीर आजारावरील उपचारांदरम्यान औषध कंपन्या आणि विक्रेत्यांकडून होणाऱ्या अवाढव्य नफेखोरीवर सुप्रीम कोर्टाने तीव्र शब्दांत संताप व्यक्त केला आहे. कॅन्सरचे उपचार आधीच अत्यंत किचकट आणि खर्चिक असताना, औषधांच्या विक्रीत चाललेल्या या उघड लुटीवरून न्यायालयाने संबंधित घटकांची चांगलीच खरडपट्टी काढली.

देशात सध्या एका औषधाची मूळ कमाल किरकोळ किंमत (MRP) २,७०० रुपये असताना रिटेलर्सना किंवा प्रत्यक्ष ग्राहकांना ते औषध तब्बल २७ हजार रुपयांना विकले जात असल्याचे धक्कादायक वास्तव समोर आले आहे. मूळ किमतीच्या दहा पट अधिक दराने विक्री करून रुग्णांची आर्थिक पिळवणूक केली जात असल्याबद्दल सर्वोच्च न्यायालयाने गंभीर चिंता व्यक्त केली.

23 Sep 2026 09:30 AM (IST)

Drought In Solapur: दक्षिण सोलापुरात पाझर तलाव कोरडा पडल्याने संकट गहिरे

Drought In Solapur: दक्षिण सोलापूर तालुक्यात पावसाने दडी मारल्यामुळे दुष्काळाची परिस्थिती दिवसेंदिवस अत्यंत गंभीर बनत चालली आहे. नांदणी गावाचा आणि परिसराचा मुख्य पाण्याचा आधार असलेला पाझर तलाव पूर्णपणे कोरडा पडल्याने स्थानिक नागरिकांवर पिण्याच्या पाण्याचे भीषण संकट ओढवले आहे.

गेल्या वर्षी याच काळात हा पाझर तलाव पाण्याने तुडूंब भरून वाहत होता. मात्र, यंदा सप्टेंबर महिना उजाडला तरी तलावात पाण्याचा थेंबही शिल्लक राहिलेला नाही. नांदणीसह परिसरातील ५ ते ६ गावांसाठी हा तलाव अत्यंत महत्त्वाचा जलस्रोत मानला जातो. हा जलसाठा आटल्यामुळे ग्रामस्थांच्या पिण्याच्या पाण्यासोबतच पशुधनाच्या चाऱ्या-पाण्याचा प्रश्नही गंभीर बनला आहे.

23 Sep 2026 09:25 AM (IST)

UP Rajysabha Election: उत्तर प्रदेशातील राज्यसभेच्या ११ जागांसाठी निवडणूक जाहीर 

UP Rajysabha Election:  उत्तर प्रदेशातील राज्यसभेच्या ११ जागांसाठी तसेच एका जागेच्या पोटनिवडणुकीसाठी निवडणूक जाहीर होताच राज्यातील राजकीय हालचालींना वेग आला आहे. या निवडणुकीत संख्याबळाच्या गणितानुसार सर्वच राजकीय पक्षांची प्रतिष्ठा पणाला लागली आहे. विधानसभेतील संख्याबळानुसार भाजप ८ जागांवर सहज विजय मिळवून आपले वर्चस्व कायम राखण्याच्या स्थितीत आहे.संख्याबळाच्या जोरावर समाजवादी पक्षाला २ जागा मिळण्याची शक्यता वर्तवली जात आहे. बहुजन समाज पक्षाकडे (BSP) आवश्यक आमदारांचे संख्याबळ नसल्यामुळे त्यांची रिक्त होणारी जागा पुन्हा जिंकणे अत्यंत कठीण झाले आहे.

23 Sep 2026 09:20 AM (IST)

Cold desert in India: भारतातील थंड वाळवंट जिथे मायनस 35 डिग्रीपर्यंत पोहचते तापमान,

Cold desert in India: जेव्हाही आपण राजस्थान या ठिकाणाविषयी बोलतो तेव्हा मनात उष्ण वातावरण आणि वाळवंटाचा विचार येतो. थर वाळवंट त्याच्या सोनेरी वाळू, उंच वाळूचे ढिगारे आणि भाजून काढणाऱ्या उष्णतेसाठी जगभर ओळखले जाते. राजस्थानच्या अनेक भागात वाळूचा विस्तीर्ण प्रदेश आणि प्रखर सूर्यप्रकाश पाहायला मिळतो. उन्हाळ्यात तापमान खूप वाढते आणि दिवसा वाळू इतकी गरम होते की यावरुन चालणेही कठीण होऊन बसते. पण विचार करा, जर आम्ही तुम्हाला सांगितलं की, वाळवंटात तुम्हाला उष्ण वाऱ्यांशिवाय थंड बर्फाळ वाऱ्यांचा अनुभव घ्यायला मिळेल तर तुम्हाला हे पटेल का? हिवाळ्यात तापमान शून्याखाली जाऊ शकते. म्हणूनच याला ‘थंड वाळवंट’ म्हटले जाते.

23 Sep 2026 09:12 AM (IST)

Weather update: मुंबई, पुणे, रत्नागिरीसह राज्यातील अनेक जिल्ह्यांत विजांसह पावसाची शक्यता

पुणे : गेल्या काही दिवसांपासून बदलत्या वातावरणाचा सामना नागरिकांना करावा लागत होता. वाढत्या उष्णतेमुळे नागरिक हैराण झाले होते. त्यातच आता पुन्हा पावसाने हजेरी लावल्याने उकाड्यापासून आता दिलासा मिळत आहे. राज्यात परतीच्या पावसाच्या मध्यम ते जोरदार सरी काही ठिकाणी हजेरी लावत आहेत. परंतु सर्वदूर पावसाची सरी हजेरी लावत नाहीत. त्यामुळे अनेक भागात पावसाची प्रतीक्षा कायम आहे. पुणे, सांगली, कोल्हापूरसह राज्यातील अनेक जिल्ह्यांत विजांसह पावसाची शक्यता आहे.