Maharashtra Breaking News
08 Dec 2025 09:55 AM (IST)
India Share Market Update: जागतिक बाजारातील संमिश्र संकेतांमुळे आज ८ डिसेंबर रोजी भारतीय शेअर बाजारातील बेंचमार्क निर्देशांक, सेन्सेक्स आणि निफ्टी ५०, सपाट पातळीवर उघडण्याची शक्यता वर्तवण्यात आली आहे. गिफ्ट निफ्टीवरील ट्रेंड देखील भारतीय बेंचमार्क निर्देशांकाची सुरुवात मंदावल्याचे दर्शवितात, अशी माहिती तज्ज्ञांनी दिली आहे. गिफ्ट निफ्टी २६,३२२ च्या आसपास व्यवहार करत होता, जो निफ्टी फ्युचर्सच्या मागील बंदपेक्षा जवळजवळ ११ अंकांनी कमी होता.
08 Dec 2025 09:50 AM (IST)
Stambheshwar Mahadev Temple : भारत हा प्राचीन मंदिरांचा आणि गूढ कथांचा देश आहे. या मंदिरांपैकी, गुजरातच्या किनाऱ्यावर असलेले स्तंभेश्वर महादेव मंदिर (Stambheshwar Mahadev Temple) हे त्याच्या अविश्वसनीय वैशिष्ट्यामुळे संपूर्ण जगात ओळखले जाते. हे मंदिर गुजरातमधील सर्वात जुन्या मंदिरांपैकी एक असून, याची निर्मिती ७ व्या शतकाच्या आसपास झाली होती. असे मानले जाते की, या मंदिराचे शिवलिंग दिवसातून दोन वेळा समुद्राच्या पाण्यात बुडते आणि पुन्हा आपोआप दर्शनासाठी उपलब्ध होते! या अद्भुत घटनेमुळेच या मंदिराला ‘समुद्रात बुडणारे शिवमंदिर’ म्हणून ओळखले जाते. भक्त या घटनेला भगवान महादेवाचा ‘जलप्रलय’ किंवा समुद्राद्वारे होणारा ‘स्वयंचलित अभिषेक’ मानतात. विज्ञान आणि श्रद्धेचा अद्भुत संगम येथे पाहायला मिळतो.
08 Dec 2025 09:45 AM (IST)
धुळे: धुळे व नांदेड जिल्ह्यात मोठी कारवाई करण्यात आल्याचे समोर आले आहे. शिरपूर तालुक्यातील जामन्या पाणी गावाच्या हद्दीत तीन वेगवेगळ्या ठिकाणी पोलिसांनी कारवाई केली आहे. या संपूर्ण कारवाईत वनविभागाच्या हद्दीतील तब्बल 122 गुंठे जागेतील अंदाजे 2 हजार 125 किलो गांजाची झाडे नष्ट करून तब्ब्ल १ कोटी ६ लाख २५ हजार रुपयांचा मुद्देमाल नष्ट करण्यात आला आहे. तर गांजाची लागवड करणाऱ्या अज्ञात व्यक्तींविरुद्ध शिरपूर तालुका पोलीस ठाण्यात गुन्हा देखील दाखल करण्यात आला आहे.
08 Dec 2025 09:40 AM (IST)
राज्यातील आयएएस अधिकारी तुकाराम मुंढे यांच्या विरोधात हिवाळी अधिवेशनात भाजप आमदार विशेष लक्षवेधी सूचना मांडणार आहेत. मुंढे नागपुर महानगरपालिकेचे आयुक्त असताना अधिकृत नियुक्ती नसतानाही "स्मार्ट सिटी प्रकल्प"चा प्रभार स्वतःकडे घेऊन नियमबाह्य कामकाज केले, असा भाजपाचा आरोप आहे. या पार्श्वभूमीवर त्यांना निलंबित करण्याची मागणी विधिमंडळ अधिवेशनात करण्यात येणार असल्याची माहिती समोर आली आहे.
08 Dec 2025 09:40 AM (IST)
ऑस्ट्रेलिया आणि इंग्लड यांच्यामध्ये पाच सामन्यांची कसोटी मालिका खेळवली जात आहे. या मालिकेमध्ये पहिल्या सामन्यामध्ये ऑस्ट्रेलियाच्या संघाने सामना जिंकला होता. तर दुसऱ्या सामन्यामध्ये देखील ऑस्ट्रेलियाने बाजी मारली आणि मालिकेमध्ये आघाडी घेतली आहे. दुसऱ्या सामन्यामध्ये देखील इंग्लडची फलंदाजी दुसऱ्या डावामध्ये फेल ठरली. ऑस्ट्रेलियाने रविवारी इंग्लंडचा आठ विकेट्सने पराभव करून पाच सामन्यांच्या कसोटी मालिकेत २-० अशी आघाडी घेतली.
08 Dec 2025 09:35 AM (IST)
युरोपियन संघाने (EU) आपल्या डिजिटल सेवा कायदा (Digital Services Act – DSA) अंतर्गत X वर 120 दशलक्ष युरो (सुमारे १,२५६ कोटी रुपये) दंड ठोठावला आहे. EU आयोगाच्या तपासानुसार, X च्या ‘ब्लू टिक’ (Blue Tick) प्रणालीची रचना भ्रामक (deceptive) होती — ज्यामुळे सामान्य वापरकर्त्यांना खरे आणि Verified अकाउंट्समध्ये फरक पटत नाही. त्याचप्रमाणे, X ने जाहिरातींच्या डेटाबेसमध्ये अपेक्षित पारदर्शकता राखली नाही आणि संशोधकांना सार्वजनिक डेटावर प्रवेश देण्यास अडचणी निर्माण केल्या.
08 Dec 2025 09:35 AM (IST)
ऑस्ट्रेलिया आणि इंग्लड यांच्यामध्ये कसोटी मालिका खेळवली जात आहे, या मालिकेचे दोन सामने खेळवले जात आहेत. पहिल्या दोन्ही सामन्यामध्ये ऑस्ट्रेलियाच्या संघाने विजय मिळवला आहे. ऑस्ट्रेलियाने सलग दुसऱ्या कसोटी सामन्यात इंग्लंडचा ८ विकेट्सने पराभव करत शानदार कामगिरी केली. गाब्बा येथे खेळल्या गेलेल्या पिंक बॉल टेस्टमध्ये इंग्लिश फलंदाज कांगारू गोलंदाजांसमोर अजिबात नव्हते आणि दोन्ही डावांमध्ये संघाची फलंदाजीची कामगिरी लाजिरवाणी होती.
08 Dec 2025 09:30 AM (IST)
रणवीर सिंहचा बहुप्रतिक्षित स्पाय थ्रिलर ‘धुरंधर’ प्रदर्शित होताच बॉक्स ऑफिसवर जोरदार कामगिरी करत आहे. रिलीजच्या पहिल्या दिवशी अपेक्षेपेक्षा जास्त कमाई करून या चित्रपटाने रणवीरच्या करिअरमधील सर्वात मोठा ओपनर ठरण्याचा विक्रम केला. तसेच, वर्षातील तिसऱ्या क्रमांकाचा सर्वात मोठा ओपनर ठरत ‘सैय्यारा’ला मागे टाकण्यातही त्याने यश मिळवले.
दुसऱ्या दिवशीही महसूल टिकवून ठेवत, तिसऱ्या दिवशी चित्रपटाने बॉक्स ऑफिसवर “आग लावली” असा प्रतिसाद मिळाला. ‘धुरंधर’कडून प्रेक्षक आणि उद्योगातील मोठ्या अपेक्षा होत्या, ज्यांची पूर्तता चित्रपटाने पहिल्याच वीकेंडमध्ये केली आहे.
08 Dec 2025 09:20 AM (IST)
गेल्या काही दिवसांत निर्माण झालेल्या तांत्रिक अडथळ्यांमुळे इंडिगो एअरलाइन्सने मोठ्या प्रमाणात उड्डाणे रद्द केली होती. यामुळे प्रवाशांना मोठा फटका बसला आणि त्यांचा तीव्र संताप व्यक्त झाला. मात्र, आता सेवा हळूहळू पूर्ववत होत असून काल 1,500 पेक्षा जास्त उड्डाणे सुरु झाली.
आज इंडिगोने 1,650 फ्लाईट्सचे नियोजन केले असून, तरीही जवळपास 650 उड्डाणे रद्दच राहणार आहेत. दररोज सरासरी 2,300 उड्डाणे करणाऱ्या इंडिगोची काल वेळेवर उड्डाणांची कामगिरी फक्त 30 टक्के होती, तर आज ती 75 टक्क्यांपर्यंत सुधारली आहे. कंपनीने सांगितले की, 138 पैकी 137 ठिकाणी फ्लाईट्स ऑपरेशन्स कार्यरत आहेत. तसेच 15 डिसेंबर 2025 पर्यंतच्या सर्व बुकिंगसाठी रद्दीकरण आणि पुनर्नियोजनावर पूर्ण शुल्क माफी दिली जाणार आहे.
08 Dec 2025 09:15 AM (IST)
भारतीय महिला क्रिकेट संघाची उपकर्णधार स्मृती मानधना आणि संगीतकार पलाश मुच्छल यांचे लग्न मोडल्याची अधिकृत घोषणा करण्यात आली आहे. दोघांनीही सोशल मीडियावर पोस्ट शेअर करत विवाहसोहळा रद्द केल्याची माहिती दिली आहे. या घोषणेनंतर सोशल मीडियावर स्मृती आणि पलाश यांच्या नावाने विविध प्रतिक्रिया उमटत असून, अनेक मीम्स, पोस्ट्स आणि कमेंट्स व्हायरल होत आहेत. लग्न का मोडले याबाबत नेटकऱ्यांनी विविध तर्क-वितर्क लढवण्यासही सुरुवात केली आहे.
08 Dec 2025 09:10 AM (IST)
महाराष्ट्राच्या राजकारणावर ठसा उमटवणारे राज्य विधिमंडळाचे हिवाळी अधिवेशन उद्या, सोमवार ८ डिसेंबरपासून नागपूर येथे सुरू होत आहे. अवघ्या सात दिवसांचे (८ ते १४ डिसेंबर) अधिवेशन असले तरी, स्थानिक स्वराज्य संस्थांच्या निवडणुका आणि प्रलंबित प्रश्नांमुळे हे अधिवेशन अत्यंत वादळी ठरण्याची चिन्हे आहेत.
अधिवेशनाच्या पूर्वसंध्येला (७ डिसेंबर) सरकारकडून आयोजित करण्यात आलेल्या चहापान कार्यक्रमावर विरोधी पक्षांनी बहिष्कार घातला. त्यामुळे अधिवेशन सुरू होण्यापूर्वीच सत्ताधारी आणि विरोधकांमधील तणाव उघड झाला आहे. विरोधकांनी पत्रकार परिषद घेऊन सरकारवर गंभीर आरोप करत, शासन लोकशाही मुल्यांकडे दुर्लक्ष करत असल्याचा आरोप केला. तर सरकारकडून या टीकेवर अद्याप औपचारिक प्रतिक्रिया देण्यात आलेली नाही.
08 Dec 2025 09:05 AM (IST)
‘बिग बॉस 19’ च्या ग्रँड फायनलमध्ये आज अखेर विजेत्याचे नाव जाहीर झाले आहे! गौरव खन्नाने या सीझनच्या स्पर्धेत आपली पकड मजबूत ठेवली आणि त्याने इतर सर्व स्पर्धकांना मागे टाकत विजेतेपद मिळवले. फरहाना भट्टने गौरवला कमालीची टक्कर दिली. स्पर्धेच्या अखेरच्या टप्प्यात अनेक रोमांचक आणि भावनिक क्षण पाहायला मिळाले. सलमान खानच्या “बिग बॉस १९” च्या टॉप पाच स्पर्धकांमध्ये गौरव खन्ना, प्रणीत मोरे, फरहाना भट्ट, अमाल मलिक आणि तान्या मित्तल यांचा समावेश होता. हे सर्व प्रेक्षकांच्या मनावर ठराविक छाप सोडून गेले आहेत. ‘बिग बॉस 19’ चा ग्रँड फिनाले मोठ्या उत्साहात पार पडला. यावेळी अनेक परफॉर्मन्स झाले.
08 Dec 2025 09:02 AM (IST)
Gold Rate Today: भारतात 8 डिसेंबर रोजी 24 कॅरेट सोन्याच्या प्रति ग्रॅमचा दर 13,014 रुपये, 22 कॅरेट सोन्याच्या प्रति ग्रॅमचा दर 11,929 रुपये आणि 18 कॅरेट सोन्याच्या प्रति ग्रॅमचा दर 9,760 रुपये आहे. भारतात 8 डिसेंबर रोजी 22 कॅरेट सोन्याच्या प्रति 10 ग्रॅमचा दर 1,19,290 रुपये, 24 कॅरेट सोन्याच्या प्रति 10 ग्रॅमचा दर 1,30,140 रुपये आणि 18 कॅरेट सोन्याच्या प्रति 10 ग्रॅमचा दर 97,600 रुपये आहे. भारतात 8 डिसेंबर रोजी चांदीचा भाव प्रति ग्रॅम 189.90 रुपये आणि प्रति किलोग्रॅम 1,89,900 रुपये आहे.
Marathi Breaking news live updates- पुणे पोलीस दलातील अंतर्गत वादामुळे एक पोलीस कर्मचारी बेपत्ता झाल्याची गंभीर घटना समोर आली आहे. यवत पोलीस ठाण्यात कार्यरत असलेले पोलीस नाईक निखिल रणदिवे हे ५ डिसेंबरपासून बेपत्ता असून, त्यांच्या शोधासाठी पोलिसांनी व्यापक चोखंदळ मोहीम सुरू केली आहे.
निखिल रणदिवे यांच्या कुटुंबीयांनी थेट मुख्यमंत्री देवेंद्र फडणवीस यांच्याकडे दाद मागितल्यानंतर पोलीस विभागाने तत्काळ हालचाली सुरू केल्या. त्यांच्या शोधासाठी पाच विशेष पथकांची नियुक्ती करण्यात आली आहे.
मिळालेल्या माहितीनुसार, रणदिवे यांना त्यांच्या वरिष्ठांकडून त्रास दिला जात होता आणि याच मानसिक ताणाला कंटाळून त्यांनी हे पाऊल उचलल्याची चर्चा आहे. या घटनेमुळे पुणे पोलीस दलातील अंतर्गत राजकारण, कनिष्ठ कर्मचाऱ्यांवर होत असलेली पिळवणूक आणि अधिकारांचा गैरवापर या मुद्द्यांवर पुन्हा प्रश्नचिन्ह उभे राहिले आहे.
