Maharashtra Breaking News Updates Today: महाराष्ट्रासह देश-विदेशातील ताज्या घडामोडींचे लाईव्ह अपडेट्स एका क्लिकवर

13 Mar 2026 10:10 AM (IST)

वयाच्या 66 व्या वर्षी खरंच प्रेग्नंट आहेत नीना गुप्ता?

बॉलीवूडमधील ज्येष्ठ अभिनेत्री नीना गुप्ता पुन्हा एकदा चर्चेत आल्या आहेत, पण यावेळी अभिनेत्री कोणत्या चित्रपटामुळे नाही तर त्यांच्या गरोदरपणाच्या अफवांमुळे चर्चेत आली आहे. गेल्या काही दिवसांपासून सोशल मीडियावर असे दावे फिरत आहेत की ६६ वर्षीय नीना गुप्ता प्रेग्नंट आहेत. आता, नीना गुप्ता यांनी स्वतः या प्रकरणावर मौन सोडले आहे आणि विनोदी पद्धतीने या अफवांना नकार दिला आहे.

13 Mar 2026 10:04 AM (IST)

राज्यात चार दिवस वादळी पाऊस आणि गारपिटीची शक्यता

राज्यातील काही भागांमध्ये 17 ते 20 मार्च दरम्यान मेघगर्जनेसह पाऊस, विजांचा कडकडाट आणि वादळी वाऱ्यांची शक्यता हवामान विभागाने व्यक्त केली आहे. हा परिणाम प्रामुख्याने विदर्भ, मराठवाडा, खानदेश आणि मध्य महाराष्ट्रातील काही भागांमध्ये जाणवू शकतो. 18 ते 20 मार्च दरम्यान परिस्थिती अधिक तीव्र होण्याची शक्यता असून काही ठिकाणी गारपीट होण्याचीही शक्यता आहे.

रब्बी हंगामातील पिकांची काढणी सुरू असल्याने शेतकऱ्यांनी काढलेली पिके सुरक्षित ठिकाणी साठवून ठेवावीत किंवा झाकून ठेवावीत. हवामानाच्या अद्ययावत अंदाजावर लक्ष ठेवून शेतीची कामे नियोजित करावीत आणि संभाव्य पाऊस व वादळी वाऱ्यांपासून पिकांचे नुकसान टाळण्यासाठी आवश्यक ती खबरदारी घ्यावी, असे कृषी विभागाकडून आवाहन करण्यात आले आहे.

13 Mar 2026 10:02 AM (IST)

PS Plus वर येत आहेत सुपरहिट गेम्स

टेक कंपनी सोनीने मार्च महिन्यासाठी त्यांच्या प्लेस्टेशन प्लस गेम कॅटलॉगसाठी अधिकृतपणे नवीन यादीची घोषणा केली आहे. कंपनीने अधिकृत घोषणा करण्यापूर्वीच या आगामी लाईनअपची माहिती लीक झाली होती. आता याबाबत अधिकृतपणे घोषणा देखील करण्यात आली आहे. यावेळी कंपनी गेमर्ससाठी अनेक मोठे आणि लोकप्रिय गेम्स जोडण्याची तयारी करत आहे. मार्च महिन्यात प्लेस्टेशन प्लस गेम कॅटलॉगसाठी कोणते नवीन गेम्स जारी होणार जाणून घेऊया.

13 Mar 2026 09:50 AM (IST)

 गॅस पुरवठ्याच्या मुद्द्यावरून हरदीप सिंह पुरींचे राहुल गांधींना  प्रत्युत्तर

नवी दिल्ली: इराण-इस्रायल युद्धामुळे जागतिक ऊर्जा बाजारात अस्थिरता निर्माण झाली असली तरी भारताचा तेल आणि गॅस पुरवठा पूर्णपणे सुरक्षित आहे, अशी ग्वाही केंद्रीय पेट्रोलियम मंत्री हरदीप सिंह पुरी यांनी गुरुवारी लोकसभेत दिली. विरोधी पक्षनेते राहुल गांधी यांनी विचारलेल्या प्रश्नाला उत्तर देताना त्यांनी स्पष्ट केले की, भारताने वेळीच पावले उचलून तेल आयातीसाठी पर्यायी मार्ग आणि नवे स्त्रोत शोधले आहेत.

पुरी यांनी सांगितले की, एकेकाळी भारत आपल्या गरजेच्या ४५% तेलासाठी 'स्ट्रेट ऑफ होर्मुज' (Strait of Hormuz) वर अवलंबून होता, मात्र आता हे अवलंबित्व कमी झाले आहे. भारताने आपल्या तेल पुरवठादार देशांची संख्या २७ वरून ४० पर्यंत वाढवली असून, आता रशिया, अमेरिका, कॅनडा आणि नॉर्वे यांसारख्या देशांकडून मोठ्या प्रमाणावर तेल आणि एलएनजी (LNG) आयात केली जात आहे.

13 Mar 2026 09:40 AM (IST)

पत्नीला शिवी देताच व्यक्तीने महिलेला केली जबर मारहाण, घटनेचा Video Viral

सोशल मिडियावर अनेक वेगवेगळ्या घटनांचे व्हिडिओज व्हायरल होत असतात. अशात अलिकडे इथे रेल्वेच्या जनरल कोचमधील व्हिडिओ शेअर करण्यात आला आहे ज्यात घडलेल्या हाय व्होल्टेज ड्रामाचे दृष्य दिसून आले. जनरल कोच हा रेल्वेमधील सर्वात गर्दीचा कोच असतो. लोकांची संख्या फार असल्याने इथे नेहमीच सीटवरुन भांडणं होत असतात. अशाच एका भांडणाचा व्हिडिओ आता सोशल मिडियावर खूप जास्त व्हायरल होत आहे ज्यात व्यक्तीने राागाच्या भरात महिलेला जोरदार चोप दिल्याचं दिसून आलं. चला नक्की काय ते जाणून घेऊया. वाचा सविस्तर- 

13 Mar 2026 09:35 AM (IST)

तरुणीवर कोयत्याने हल्ला करणाऱ्या आरोपीची आत्महत्या 

जुन्नर (पुणे): जुन्नर शहरात बुधवारी सकाळी एका तरुणीवर झालेल्या अंगावर शहारे आणणाऱ्या हल्ल्याच्या प्रकरणाला आता अनपेक्षित वळण मिळाले आहे. तरुणीवर जीवघेणा हल्ला करणारा मुख्य आरोपी महेश डामसे याने गुरुवारी सकाळी आत्महत्या केल्याचे उघडकीस आले आहे. एकतर्फी प्रेमातून त्याने आधी तरुणीचे आयुष्य संपवण्याचा प्रयत्न केला आणि त्यानंतर स्वतःचेही जीवन संपवले.

लग्नासाठी दिलेल्या नकाराचा राग मनात धरून महेशने बुधवारी सकाळी सरकारी रुग्णालयाच्या मागे तरुणीवर कोयत्याने भीषण हल्ला केला होता. या हल्ल्यात तरुणी गंभीर जखमी झाली असून तिच्यावर सध्या उपचार सुरू आहेत. या घटनेमुळे संपूर्ण जुन्नर तालुक्यात दहशतीचे आणि संतापाचे वातावरण निर्माण झाले होते.

13 Mar 2026 09:30 AM (IST)

  'महाराष्ट्र धर्मस्वातंत्र्य विधेयक २०२६' आज विधानसभेत मांडले जाणार

मुंबई: महाराष्ट्राच्या राजकारणात आणि सामाजिक वर्तुळात अत्यंत महत्त्वाचे ठरलेले 'महाराष्ट्र धर्मस्वातंत्र्य विधेयक २०२६' (Maharashtra Freedom of Religion Act 2026) आज, १३ मार्च रोजी विधानसभेत मांडले जाणार आहे. बळजबरीने, फसवणुकीने किंवा आमिष दाखवून केले जाणारे धर्मांतर रोखण्यासाठी राज्य सरकारने हे कडक पाऊल उचलले आहे. गेल्या आठवड्यात झालेल्या मंत्रिमंडळ बैठकीत या विधेयकाच्या मसुद्याला अधिकृत मंजुरी देण्यात आली होती.

13 Mar 2026 09:25 AM (IST)

जरांगेंपाठोपाठ आता धनगर समाजाचाही आझाद मैदानावर उपोषणाचा इशारा

मुंबई: महाराष्ट्रात आरक्षणाचा मुद्दा पुन्हा एकदा ऐरणीवर आला आहे. मराठा आरक्षणासाठी मनोज जरांगे पाटील यांनी आंदोलनाचे संकेत दिल्यानंतर, आता धनगर समाजानेही आपल्या प्रलंबित मागण्यांसाठी कंबर कसली आहे. धनगर समाजाचा 'एसटी' (ST) प्रवर्गात समावेश करावा, या मागणीसाठी येत्या १६ मार्चपासून मुंबईतील आझाद मैदानावर बेमुदत उपोषणाचा इशारा देण्यात आला आहे. या इशाऱ्यामुळे राज्य सरकारची धावपळ उडाली असून प्रशासकीय स्तरावर तातडीने हालचाली सुरू झाल्या आहेत.

13 Mar 2026 09:20 AM (IST)

लग्नाच्या अवघ्या ४ दिवस आधी नवरदेवाचा गळफास घेऊन शेवट 

लाखांदूर (भंडारा): ज्या घरात लग्नाचे सनई-चौघडे वाजणार होते आणि पाहुण्यांच्या मांदियाळीने उत्साह ओसंडून वाहत होता, त्याच घरात आता शोककळा पसरली आहे. लाखांदूर तालुक्यातील परसोडी पावळदवना येथील २७ वर्षीय तरुण राजेश अविनाश भेंडारकर याने लग्नाच्या अवघ्या चार दिवस आधी टोकाचे पाऊल उचलत आपली जीवनयात्रा संपवली. राजेशने शुक्रवारी पहाटे ४ वाजेच्या सुमारास राहत्या घराजवळील आंब्याच्या झाडाला गळफास लावून आत्महत्या केली.

राजेशचा विवाह १६ मार्च रोजी एरंडी येथील वैष्णवी दोनोडे हिच्याशी होणार होता. विशेष म्हणजे, लग्नाच्या खरेदीसाठी नवरी मुलगी स्वतः ११ मार्च रोजी राजेशच्या घरी आली होती. घरात लग्नाची लगबग सुरू असतानाच राजेशने अचानक घेतलेल्या या निर्णयामुळे कुटुंब सुन्न झाले असून संपूर्ण गावावर दुःखाचा डोंगर कोसळला आहे.

13 Mar 2026 09:15 AM (IST)

 पुण्यात गॅस संकटामुळे २५ हजार पोळ्या बनवणारे केंद्र बंद होण्याच्या मार्गावर

पुणे: मध्यपूर्वेतील युद्धामुळे उद्भवलेल्या गॅस टंचाईचा मोठा फटका आता पुण्याच्या अन्न पुरवठा साखळीला बसू लागला आहे. पुण्यातील एका मोठ्या 'पोळी निर्मिती केंद्रा'चा गॅस साठा संपत आल्याने हे केंद्र बंद होण्याच्या स्थितीत आहे. दररोज २५ हजार पोळ्यांची निर्मिती करणाऱ्या या केंद्रातून इन्फोसिस, विप्रो यांसारख्या आयटी कंपन्यांसह शहरातील विविध रुग्णालयांना पोळ्यांचा पुरवठा केला जातो. सध्या या केंद्राकडे केवळ आजचा दिवस पुरेल इतकाच गॅस शिल्लक असल्याने उद्यापासून पुरवठा खंडित होण्याची भीती निर्माण झाली आहे.

या संकटामुळे केवळ कंपन्यांची अन्नाची सोयच थांबणार नाही, तर तेथे काम करणाऱ्या ६० ते ७० महिलांवर बेरोजगारीची कुऱ्हाड कोसळणार आहे. "परिस्थिती कोव्हिड काळापेक्षाही बिकट झाली आहे," असे मत या केंद्राच्या विक्रेत्याने व्यक्त केले आहे. सध्या ४ ते ५ रुपयांना मिळणाऱ्या एका पोळीची किंमत गॅस टंचाई आणि वाढत्या दरांमुळे आगामी काळात वाढण्याची दाट शक्यता आहे.

13 Mar 2026 09:10 AM (IST)

क्रिकेट चाहते संतापले, SRH ला बॉयकॉट करण्याची दिली धमकी!

The Hundred Auction 2026 : द हंड्रेड ऑक्शन २०२६ मध्ये सर्वांनाच आश्चर्य वाटले जेव्हा सनरायझर्स लीड्स संघाने पाकिस्तानी फिरकी गोलंदाज अबरार अहमदला विकत घेतले. काव्या मारनच्या संघाने त्याच्यासाठी ₹२.३४ कोटी (२३.४ दशलक्ष रुपये) दिले. या निर्णयामुळे भारतीय चाहते संतप्त झाले आहेत. त्यांनी सनरायझर्स लीड्सच्या मालकीण काव्या मारनला ट्रोल करण्यास सुरुवात केली आहे. ते सनरायझर्स हैदराबादवर बहिष्कार टाकण्याची धमकी देखील देत आहेत.

13 Mar 2026 09:05 AM (IST)

Stock Market Today: गुंतवणूकदारांनो…एनटीपीसी आणि अ‍ॅक्सिस बँकसह या स्टॉक्सवर ठेवा लक्ष

India Share Market Update:  अमेरिका-इराण युद्धामुळे कच्च्या तेलाच्या किंंमतीत सतत वाढ होत आहे. याचा परिणाम भारतीय शेअर बाजारावर मोठ्या प्रमाणात होत असल्याचे पाहायला मिळत आहे. आज, १३ मार्च रोजी शुक्रवारी भारतीय शेअर बाजारातील बेंचमार्क निर्देशांक, सेन्सेक्स आणि निफ्टी ५०, सपाट किंवा नकारात्मक पातळीवर उघडण्याची शक्यता वर्तवण्यात आली आहे. गिफ्ट निफ्टीवरील ट्रेंड देखील भारतीय बेंचमार्क निर्देशांकाची कमकुवत सुरुवात दर्शवितात. गिफ्ट निफ्टी २३,५६० च्या आसपास व्यवहार करत होता, जो निफ्टी फ्युचर्सच्या मागील बंदपेक्षा जवळजवळ १६८ अंकांनी कमी होता.

13 Mar 2026 09:00 AM (IST)

Kritika Kamra-Gaurav Kapoor च्या रिसेप्शनला सेलिब्रिटी कलाकार – खेळाडूंची मेहफिल

 टी20 विश्वचषक 2026 चा विश्वचषक संपला आता भारताचे माजी खेळाडू हे लग्नसमारंभामध्ये सहभागी होताना दिसत आहेत. सोशल मिडियावर या खेळाडूंची मोठ्या प्रमाणात चर्चा पाहायला मिळत आहे. अभिनेत्री कृतिका कामरा आणि क्रिकेट काॅमेंटेटर, होस्ट गौरव कपूर हे लग्नबंधनात अडकले आहेत. काल त्याचे रिसेप्शन पार पडले, यामध्ये अनेक बाॅलिवूडचे कलाकार त्याचबरोबर दिग्गज खेळाडू सहभागी झाले होते.  ११ मार्च रोजी कृतिका कामरा आणि गौरव कपूर यांनी त्यांच्या जवळच्या प्रियजनांच्या उपस्थितीत एका साध्या समारंभात लग्न केले.

13 Mar 2026 08:57 AM (IST)

MNGL कडून घरगुती पीएनजीचा अखंडित पुरवठा सुरू राहणार

पुणे: मध्यपूर्वेतील युद्धजन्य परिस्थितीमुळे जागतिक स्तरावर एलएनजी (LNG) पुरवठ्यात अडथळे येत असताना, केंद्र सरकारने देशांतर्गत गॅस पुरवठ्याबाबत मोठे पाऊल उचलले आहे. पेट्रोलियम आणि नैसर्गिक वायू मंत्रालयाने (MoPNG) घरगुती वापराला १००% प्राधान्य देण्याचे निर्देश दिले आहेत. या पार्श्वभूमीवर, 'महाराष्ट्र नॅशनल गॅस लिमिटेड'ने (MNGL) पुणे आणि पिंपरी-चिंचवडमधील ८ लाख घरगुती ग्राहकांना अखंडित पुरवठ्याबाबत आश्वस्त केले आहे.