Maharashtra Breaking News Updates Today: महाराष्ट्रासह देश-विदेशातील ताज्या घडामोडींचे लाईव्ह अपडेट्स एका क्लिकवर

30 Mar 2026 11:45 AM (IST)

Tamil Nadu Election 2026 : थलपथीची राजकीय खेळी: अभिनेता विजय दोन जागांवरून लढवणार निवडणूक

Tamil Nadu Election 2026 : तमिळनाडू : निवडणूक आयोगाने पाच राज्यांच्या निवडणूका जाहीर केल्या असून  तामिळनाडूच्या राजकारणामध्ये हालचालींना वेग आला आहे. मागील दीर्घकाळापासून डीएमके आणि एआयएडीएमके या दोन प्रमुख पक्षांचे (Political News) वर्चस्व राहिले आहे, परंतु २०२६ च्या निवडणुका एक मोठे स्थित्यंतर घडवून आणू शकतात. प्रसिद्ध अभिनेते आणि तामिळनाडू वेत्री कळघम (टीव्हीके) चे प्रमुख विजय (Thalapathy Vijay) यांनी चेन्नईमध्ये आपल्या पक्षाच्या उमेदवारांची यादी जाहीर करून अधिकृतपणे आपल्या राजकीय कारकिर्दीला सुरुवात केली आहे.

30 Mar 2026 11:40 AM (IST)

Stock Market Today: लाल रंगात उघडणार आजचा शेअर बाजार, तज्ज्ञांनी दिला सावध राहण्याचा इशारा

India Share Market Update: मध्य पूर्वेत सुरु असलेल्या अमेरिका-इराण युद्धामुळे आणि कच्च्या तेलाच्या किमतींत वाढ होत असल्याने शेअर बाजारावर नकारात्मक परिणाम होत आहे. आज ३० मार्च रोजी भारतीय शेअर बाजाराचे प्रमुख निर्देशांक, सेन्सेक्स आणि निफ्टी ५०, घसरणीसह आणि लाल रंगात उघडण्याची शक्यता आहे. ज्यामुळे मागील आठवड्यातील तोटा आणखी वाढेल. गिफ्ट निफ्टीमधील ट्रेंड्स देखील भारतीय बेंचमार्क निर्देशांकासाठी गॅप-डाउन सुरुवातीचे संकेत देत आहेत. गिफ्ट निफ्टी, निफ्टी फ्युचर्सच्या मागील क्लोजपेक्षा जवळपास २६६ पॉइंट्सच्या सवलतीवर, २२,५५१ च्या पातळीवर व्यवहार करत होता.

30 Mar 2026 11:35 AM (IST)

ल-अक्सा नंतर आता 'चर्च'वर निर्बंध; कार्डिनलच्या अपमानने इस्रायल अडचणीत

जेरुसलेम, जे जगातील तीन प्रमुख धर्मांचे श्रद्धास्थान मानले जाते, तिथे सध्या कमालीचा तणाव निर्माण झाला आहे. अल-अक्सा मशिदीतील निर्बंधांनंतर आता इस्रायलने ख्रिश्चन धर्मीयांच्या अत्यंत पवित्र स्थळावर, म्हणजेच 'चर्च ऑफ द होली सेपल्कर'वर कडक निर्बंध लादले आहेत. या कारवाईचा सर्वात मोठा फटका व्हॅटिकनचे कार्डिनल पियरबतिस्ता पिझाबाला यांना बसला, ज्यांना पोलिसांनी चर्चमध्ये प्रवेश करण्यापासून मज्जाव केला. शतकानुशतके चालत आलेल्या परंपरेत अशा प्रकारे वरिष्ठ धर्मगुरूंना रोखण्याची ही पहिलीच घटना असल्याने संपूर्ण ख्रिस्ती जगतातून इस्रायलचा निषेध केला जात आहे.

30 Mar 2026 11:30 AM (IST)

RR vs CSK Playing 11 : MS Dhoni ला कोण करणार रिप्लेस? वैभव सूर्यवंशीवर असणार नजर

RR vs CSK Probable Playing 11 : राजस्थान रॉयल्स (RR) आणि चेन्नई सुपर किंग्स (CSK) आज आयपीएल 2026 मध्ये आपल्या मोहिमेला सुरुवात करतील. दोन्ही संघ गुवाहाटी येथील बरसापारा क्रिकेट स्टेडियमवर संध्याकाळी 7:30 वाजता भिडतील. पाच वेळचा चॅम्पियन सीएसके संघ महान यष्टीरक्षक-फलंदाज एम.एस. धोनीशिवाय खेळेल. पोटरीच्या दुखापतीमुळे धोनी हंगामाच्या पहिल्या दोन आठवड्यांसाठी संघाबाहेर असेल. सीएसकेला मागील हंगामातील निराशाजनक कामगिरी मागे टाकून एक नवीन छाप सोडायची असेल. त्याच वेळी, आरआरलाही आपल्या कामगिरीत सुधारणा करायची असेल. राजस्थान संघ आयपीएल 2025 मध्ये नवव्या स्थानावर राहिला होता. संजू सॅमसन सीएसकेमध्ये गेल्यानंतर, आता रियान पराग आरआरची जबाबदारी सांभाळत आहे.

30 Mar 2026 11:25 AM (IST)

मुंबईत हक्काच्या घराचे स्वप्न होणार साकार! म्हाडाच्या २६४० सदनिकांची सोडत जाहीर

मुंबई, दि. २९ मार्च, २०२६ : महाराष्ट्र गृहनिर्माण व क्षेत्र विकास प्राधिकरणाचा (म्हाडा) (MHADA Lottery 2026) विभागीय घटक असलेल्या मुंबई मंडळातर्फे मुंबईतील कन्नमवार नगर-विक्रोळी, पत्राचाळ सिद्धार्थ नगर-गोरेगाव, जुने मागाठाणे-बोरीवली, गोराई-बोरीवली, सुभाष नगर-चेंबुर, गांधीनगर- वांद्रे, पंतनगर-घाटकोपर, गिरगाव, वडाळा, कोपरी-पवई, माझगाव, तुंगा पवई, लोकमान्य नगर-दादर, पहाडी गोरेगाव, अँटॉप हिल-वडाळा आदी गृहनिर्माण प्रकल्पांमधील विविध उत्पन्न गटातील २६४० सदनिकांच्या विक्रीसाठी सोडत जाहीर करण्यात आली असून ऑनलाईन अर्ज नोंदणी व अर्ज भरणा प्रक्रियेला दि. ३० मार्च, २०२६ रोजी दुपारी ३.०० वाजेपासून प्रारंभ होणार आहे. या सोडतीची जाहिरात दि. ३० मार्च, २०२६ रोजी राज्यातील विविध वृत्तपत्रांत तसेच म्हाडाच्या https://housing.mhada.gov.in या संकेतस्थळावर प्रसिद्ध करण्यात येणार असून सदनिका सोडत प्रक्रियेबाबत माहिती देणारी पुस्तिका संकेतस्थळावर उपलब्ध करून देण्यात येणार आहे.

30 Mar 2026 11:20 AM (IST)

94,000 मेट्रिक टन गॅस घेऊन दोन महाकाय जहाजे भारताकडे रवाना; 31 मार्चला मुंबईत होणार दाखल

LPG gas supply: देशात सध्या जाणवत असलेल्या एलपीजी (LPG) टंचाईच्या पार्श्वभूमीवर केंद्र सरकारने (Central Goverment) मोठी आणि दिलासादायक बातमी दिली आहे. सुमारे 94,000 मेट्रिक टन एलपीजी घेऊन दोन महाकाय गॅस टँकर जहाजे सुरक्षितपणे भारतीय किनारपट्टीच्या दिशेने झेपावत आहेत. मध्यपूर्वेतील वाढता तणाव आणि सागरी मार्गावरील धोके लक्षात घेता, या जहाजांच्या सुरक्षिततेसाठी विशेष खबरदारी घेण्यात आली असून, यामुळे देशातील गॅस पुरवठा सुरळीत होण्यास मदत होणार आहे.

30 Mar 2026 11:15 AM (IST)

भोर विधानसभा मतदारसंघातील प्रत्येक तालुक्यात ‘कृषी भवन’ उभारण्यासाठी प्रयत्न करणार

भोर : भोर विधानसभा मतदारसंघातील शेतकऱ्यांच्या शेतमालाला योग्य बाजारभाव मिळावा आणि शेतीविषयक सर्व सोयीसुविधा एकाच छताखाली मिळाव्यात, या उद्देशाने मतदारसंघातील प्रत्येक तालुक्यात ‘कृषी भवन’ उभारण्यासाठी विशेष प्रयत्न करणार असल्याची माहिती आमदार शंकर मांडेकर यांनी दिली.​ सह्याद्री मंगल कार्यालयात आयोजित मुख्यमंत्री पाणंद रस्ते योजना, खरीप हंगाम आणि पाणीटंचाई आढावा बैठकीत ते बोलत होते. यावेळी व्यासपीठावर प्रांताधिकारी डॉ. विकास खरात, तहसीलदार राजेंद्र नजन, गटविकास अधिकारी चंद्रकांत विपट, जिल्हा परिषदेचे माजी उपाध्यक्ष रणजित शिवतरे, विक्रम खुटवड, नगराध्यक्ष रामचंद्र आवारे यांसह विविध विभागांचे अधिकारी व पदाधिकारी उपस्थित होते.

30 Mar 2026 11:10 AM (IST)

उन्हाळी सुट्ट्यातील गर्दी कमी करण्यासाठी पुणे विभागाचा ‘हा’ निर्णय; थेट…

पुणे: महाराष्ट्र राज्य परिवहन (एसटी) पुणे विभागातून उन्हाळी सुट्ट्यातील गर्दी कमी करण्यासाठी ७४ बसेस अतिरिक्त सोडण्यात येणार आहेत. उन्हाळ्याच्या सुट्ट्यांत विद्यार्थी,शिक्षक,विविध क्षेत्रातील कर्मचारी आणि कारखान्यातील कामगार मोठ्या प्रमाणात गावाकडे जात असतात.त्यामुळे होणारी अतिरिक्त गर्दी लक्षात घेऊन दि.१४ एप्रिल ते १० जून २०२६ दरम्यान (MSRTC) जादा बसेस सोडण्याचा निर्णय पुणे एसटी विभागाने घेतला आहे.

30 Mar 2026 11:07 AM (IST)

इराणच्या तेल साठ्यावरही ट्रम्पचा डोळा; खारग बेटावर अमेरिकेची ‘शह-काटशह’ नीती

Trump claim Iran coup 2026 : मध्य-पूर्वेतील (US-Israel Iran War) रणधुमाळी आता एका अशा वळणावर पोहोचली आहे जिथे केवळ बॉम्बगोळेच नाही, तर ‘तेल’ आणि ‘सत्तेच्या’ मोठ्या खेळी खेळल्या जात आहेत. अमेरिकेचे राष्ट्राध्यक्ष डोनाल्ड ट्रम्प (Donald Trump) यांनी इराणबाबत एक अत्यंत खळबळजनक विधान केले आहे. ट्रम्प यांच्या मते, इराणमध्ये ज्या काही घडामोडी घडल्या आहेत, तो एक प्रकारचा सत्तापालटच आहे आणि आता अमेरिका इराणच्या सर्वात मौल्यवान ‘खारग’ बेटावर ताबा मिळवण्याच्या तयारीत आहे.

30 Mar 2026 10:59 AM (IST)

IPL 2026 मध्ये CSK ला तिसरा मोठा धक्का!

राजस्थान रॉयल्सविरुद्धच्या हंगामाच्या सलामीच्या सामन्यापूर्वी सीएसकेचा स्टार फलंदाज जखमी झाला आहे. यामुळे तो पहिल्या दोन ते तीन सामन्यांमधून बाहेर राहण्याची शक्यता आहे. चेन्नई सुपर किंग्ससाठी आणखी एक वाईट बातमी आली आहे. रेव्ह स्पोर्ट्सच्या एका नवीन अहवालानुसार, फ्रँचायझीचा सामना जिंकून देणारा फलंदाज, देवाल्ड ब्रेविस, बरगडीच्या दुखापतीमुळे पहिल्या दोन ते तीन सामन्यांमधून बाहेर राहू शकतो. जर ब्रेविस खेळला नाही, तर चेन्नई सुपर किंग्सची फलंदाजी आणखी कमकुवत होईल.

30 Mar 2026 10:51 AM (IST)

‘Dhurandhar 2’ ने पहिल्या भागाचा मोडला रेकॉर्ड

बॉलीवूड स्टार्स रणवीर सिंग, संजय दत्त, अर्जुन रामपाल, आर. माधवन, राकेश बेदी आणि सारा अर्जुन यांचा ‘धुरंधर २’ हा चित्रपट नुकताच प्रदर्शित झाला. लोकांना हा चित्रपट प्रचंड आवडत आहे. ‘धुरंधर २’ ने बॉक्स ऑफिसवर इतर अनेक चित्रपटांना मागे टाकत जगभरात मोठी कमाई केली आहे. दरम्यान, अशी बातमी समोर आली आहे की ‘धुरंधर २’ प्रदर्शनाच्या ११ व्या दिवशीही बॉक्स ऑफिसवर धुमाकूळ घालत आहे.

30 Mar 2026 10:42 AM (IST)

रुपाली चाकणकरांना अटक होणार?

भोंदू अशोक खरातची चौकशी करणाऱ्या विशेष तपास पथकाने (एसआयटी) राज्य महिला आयोगाच्या माजी अध्यक्षा रुपाली चाकणकर यांना समन्स बजावला आहे. त्यामुळे रुपाली चाकणकर यांच्यावर चौकशी व त्यानंतर अटकेची टांगती तलवार उभी राहिल्याचा दावा केला जात रुपाली ठोंबरे पाटील यांनी अशी शक्यता आहे. सत्ताधारी राष्ट्रवादी काँग्रेसच्या नेत्या बोलून दाखवली आहे.

30 Mar 2026 10:34 AM (IST)

सोनाली पंडितचा 10 वर्षांनी मराठीत कमबॅक

कोणतीही भूमिका स्वीकारल्यानंतर प्रेक्षकांना या भूमिकेत हीच व्यक्ती योग्य आहे असं वाटणं म्हणजे उत्तम अभिनय आणि तब्बल १० वर्षांनी मराठी मालिकेतून प्रेक्षकांच्या भेटीला आलेल्या अभिनेत्री सोनाली पंडितच्या बाबतीत जर बोलायचं झालं तर हीच भावना येते. भूमिका कोणतीही असो ती अगदी चपखलरित्या सोनाली साकारताना दिसते. कलर्स मराठीवर सुरू झालेल्या ‘मोहिनी’ या नव्या मालिकेतून सोनाली पंडित आता प्रेक्षकांसमोर पुन्हा एकदा येते आहे.

30 Mar 2026 10:29 AM (IST)

बीडमध्ये तारा चोरीचा प्रयत्न जीवावर, टॉवर कोसळून 2 ठार

बीड येथून एक धक्कादायक घटना समोर आली आहे. हायव्होल्टेज विद्युत तार चोरी करण्याच्या प्रयत्न दोन चोर करत होते मात्र ही चोरी त्यांच्या जीवावर बेतली. थेट टॉवरच कोसळल्याने दोन चोरट्यांचा जागीच मृत्यू झाला. या घटनेत इतर साथीदारांनी अपघाताचा बनाव रचून मृतदेह परभणीला नेले, मात्र तिथे गेल्यांनतर या संपूर्ण बनाव उघडकीस आला.

30 Mar 2026 10:21 AM (IST)

गोलंदाजी करण्यास नकार देण्यावर रहाणेने व्यक्त केली नाराजी

तीन वेळचे विजेते कोलकाता नाईट रायडर्स आयपीएल २०२६ ची सुरुवात विजयाने करू शकले नाहीत. रविवारी वानखेडे स्टेडियमवर झालेल्या सामन्यात मुंबई इंडियन्सने त्यांना सहा गडी राखून पराभूत केले. कॅमेरॉन ग्रीनची मैदानातील अनुपस्थिती चर्चेचा विषय ठरली आणि सामन्यानंतर या घटनेबद्दल विचारले असता कर्णधार अजिंक्य रहाणे थोडा नाराज दिसला. कोलकाता नाईट रायडर्सने ग्रीनला २५.२० कोटी रुपयांना (२५.२ कोटी रुपये) विकत घेतले.

30 Mar 2026 10:15 AM (IST)

इराणच्या नव्या नेत्याचा इराकला गुप्त निरोप

मध्य-पूर्वेतील युद्धाच्या (US-Israel Iran War) ज्वाळा अद्याप शमलेल्या नाहीत, पण आता रणांगणापेक्षा अधिक चर्चा इराणच्या नव्या नेतृत्वाची सुरू आहे. अयातुल्ला अली खामेनी यांच्या निधनानंतर त्यांचे पुत्र मोजतबा खामेनी (Mojtaba Khamenei) इराणचे तिसरे सर्वोच्च नेते बनले खरे, पण ते जगासमोर आलेले नाहीत. नुकताच त्यांनी इराकी जनतेला उद्देशून एक लिखित संदेश जारी केला आहे. या संदेशाने केवळ इराकशी असलेल्या संबंधांवरच प्रकाश टाकला नाही, तर अमेरिकेच्या संरक्षण मंत्रालयात (पेंटागॉन) मोठी खळबळ उडवून दिली आहे.

30 Mar 2026 09:59 AM (IST)

इराणच्या IRGC चा अमेरिकेला 30 मार्चचा ‘फायनल’ अल्टिमेटम

Iran threat to burn US soldiers 2026 : मध्य-पूर्वेतील रणसंग्राम (US-Israel Iran War) आता एका अशा वळणावर पोहोचला आहे, जिथून परतीचा कोणताही रस्ता दिसत नाहीये. अमेरिका आणि इस्रायलच्या सततच्या हवाई हल्ल्यांनी घायाळ झालेल्या इराणने आता थेट ‘आर-पार’ची लढाई लढण्याची घोषणा केली आहे. इराणचे संसद अध्यक्ष मोहम्मद बागेर गालिबाफ यांनी दिलेली ‘सैनिकांना जाळून टाकण्याची’ धमकी ही केवळ शब्दांची लढाई नसून, जमिनीवर होणाऱ्या संभाव्य आक्रमणापूर्वीचा एक मोठा इशारा मानला जात आहे.

30 Mar 2026 09:50 AM (IST)

जंगलात नेऊन तरुणीवर सामूहिक अत्याचार

अमरावती: अमरावती येथून एक धक्कादायक घटना समोर आली आहे. १८ वर्षीय तरुणी आपल्या मित्रांसोबत दुचाकीवरून जात होती. त्याच दरम्यान ५ जणांनी त्यांना अडवलं आणि जंगलात नेऊन तरुणीसोबत सामूहिक अत्याचार केल्याचे समोर आले आहे. ही धक्कादायक घटना अमरावती जिल्ह्यातील भानखेडा गावाजवळील जंगलात घडली. या प्रकरणी फ्रेजरपुरा पोलिसांनी गुन्हा दाखल करून ५ जणांना अटक केली आहे.

30 Mar 2026 09:40 AM (IST)

पुन्हा एकदा Mumbai Indians मॅच फिक्सिंगच्या जाळ्यात!

मुंबई इंडियन्स विरुद्ध कोलकता नाईट राइडर्स यांच्यामध्ये काल सामना पार पडला, या सामन्यामध्ये मुंबई इंडियन्सच्या संघाने 14 वर्ष जुनी परंपरा मोडली आणि त्याचा पहिला सामना जिंकून पहिला विजय नावावर केला आहे. कालच्या सामन्यामध्ये हार्दिक पांड्या आणि अजिंक्य रहाणे हे दोन्ही कर्णधार जेव्हा नाणेफेकीसाठी आले होते यावेळी एक अशी घटना झाली त्यामुळे मुंबई इंडियन्सच्या संघावर आता अनेक प्रश्न उपस्थित केले जात आहेत.

30 Mar 2026 09:30 AM (IST)

लग्नसराईपूर्वीच घसरले सोन्या-चांदीचे भाव!

Gold Rate Today: भारतात 30 मार्च रोजी 24 कॅरेट सोन्याच्या प्रति ग्रॅमचा दर 14,808 रुपये, 22 कॅरेट सोन्याच्या प्रति ग्रॅमचा दर 13,574 रुपये आणि 18 कॅरेट सोन्याच्या प्रति ग्रॅमचा दर 11,106 रुपये आहे. भारतात 30 मार्च रोजी 22 कॅरेट सोन्याच्या प्रति 10 ग्रॅमचा दर 1,35,740 रुपये, 24 कॅरेट सोन्याच्या प्रति 10 ग्रॅमचा दर 1,48,080 रुपये आणि 18 कॅरेट सोन्याच्या प्रति 10 ग्रॅमचा दर 1,11,060 रुपये आहे. भारतात 30 मार्च रोजी चांदीचा भाव प्रति ग्रॅम 244.90 रुपये आणि प्रति किलोग्रॅम 2,44,900 रुपये आहे.

30 Mar 2026 09:20 AM (IST)

महादेवाचा अवतार' सांगणाऱ्या ढोंगी बाबाला चोप; वसईतील बैठकीत राडा

पुणे/वसई: स्वतःला महादेवाचा अवतार सांगून पुण्यातील एका महिलेवर अत्याचार केल्याचा आरोप असलेल्या ऋषिकेश वैद्य याच्याबाबत एक नवीन धक्कादायक माहिती समोर आली आहे. या प्रकरणावरून वसईत झालेल्या एका बैठकीत पिडीत महिलेच्या पतीने आरोपीला बेदम चोप दिल्याची घटना उघडकीस आली आहे.

वादाचे मुख्य कारण: आरोपी ऋषिकेश वैद्य हा गेल्या दोन वर्षांपासून पिडीत महिलेशी सतत फोन आणि मेसेजद्वारे संपर्क साधत होता. यावरून पिडीतेचा पती अत्यंत संतप्त होता. २९ ऑक्टोबर रोजी वसईतील हयात बंगल्याजवळ या विषयावर चर्चा करण्यासाठी बैठक बोलावण्यात आली होती.

30 Mar 2026 09:15 AM (IST)

मुंबई लोकलमध्ये गरोदर महिलांसाठी स्वतंत्र डब्याची मागणी 

मुंबई: उपनगरीय रेल्वेतून (लोकल) प्रवास करणाऱ्या गरोदर महिलांच्या सुरक्षिततेसाठी स्वतंत्र डबा आरक्षित ठेवण्याची मागणी जोर धरत आहे. यासंदर्भात मुंबई महानगरपालिका रेल्वे प्रशासनाला अधिकृत निवेदन देणार आहे.

नोकरी आणि व्यवसायानिमित्त रोज प्रवास करणाऱ्या महिलांना गर्दीच्या वेळी होणारा त्रास आणि संभाव्य धोका टाळण्यासाठी ही विशेष सोय गरजेची असल्याचे सांगण्यात आले आहे. पालिकेच्या स्थायी समितीचे अध्यक्ष प्रभाकर शिंदे यांनी यासंदर्भात ठरावाची सूचना मांडली आहे. आगामी ९ तारखेला महापालिका सभागृहात या विषयावर सविस्तर चर्चा होणार आहे. या चर्चेनंतर रेल्वे प्रशासनाकडे या मागणीचा पाठपुरावा करण्यासाठी रीतसर निवेदन पाठवले जाईल.

30 Mar 2026 09:10 AM (IST)

बीड: वीज तारांच्या चोरीचा प्रयत्न अंगलट

बीड: जिल्ह्यातील केज तालुक्यातील नांदूर घाट शिवारात वीज तारा चोरी करण्याच्या प्रयत्नात असलेला हायव्होल्टेज टॉवर कोसळून दोन तरुणांचा जागीच मृत्यू झाला. अविनाश पाटोळे आणि आकाश आडे अशी मृत पावलेल्यांची नावे असून, ते पुणे येथील पाच जणांच्या टोळीतील सदस्य होते.

घटनेचा थरार आणि बनाव: शनिवारी रात्री ही टोळी तारा कापण्यासाठी टॉवरवर चढली होती, मात्र त्याच वेळी संपूर्ण टॉवर जमिनीवर कोसळला. अपघातानंतर इतर साथीदारांनी या घटनेचा बनाव रचत मृतदेह परभणीला नेले. मात्र, तिथे गेल्यावर या संपूर्ण प्रकरणाचा उलगडा झाला.

30 Mar 2026 09:05 AM (IST)

  अशोक खरातचा पाय खोलात 

नाशिक: संशयित भोंदूबाबा अशोक खरात याच्या एसआयटी (SIT) चौकशीचा आज १२ वा दिवस असून, तपासातून दररोज नवनवीन धक्कादायक माहिती समोर येत आहे. कालही खरातची पाच तास कसून चौकशी करण्यात आली. दरम्यान, न्यायालयाने खरातच्या पोलीस कोठडीत १ एप्रिलपर्यंत वाढ केली आहे.

 पोलिसांनी खरातचा लॅपटॉप आणि मोबाईल जप्त केला आहे. त्याच्या मोबाईलमध्ये तब्बल अडीच हजारांहून अधिक संपर्क क्रमांक 'कोडवर्ड'मध्ये सेव्ह असल्याचे आढळल्याने तपासाचे आव्हान वाढले आहे.

 एवढ्या मोठ्या प्रमाणावर मालमत्ता खरेदी करण्यासाठी खरातकडे इतका पैसा कुठून आला, याचा शोध सध्या एसआयटी घेत आहे.

अशोक खरात तपासात योग्य सहकार्य करत नसल्याचा दावा एसआयटीने न्यायालयात केला आहे.

30 Mar 2026 09:00 AM (IST)

Amravati Crime: अमरावतीत  जंगलात नेऊन तरुणीवर सामूहिक अत्याचार 

अमरावती: अमरावती येथून एक धक्कादायक घटना समोर आली आहे. १८ वर्षीय तरुणी आपल्या मित्रांसोबत दुचाकीवरून जात होती. त्याच दरम्यान ५ जणांनी त्यांना अडवलं आणि जंगलात नेऊन तरुणीसोबत सामूहिक अत्याचार केल्याचे समोर आले आहे. ही धक्कादायक घटना अमरावती जिल्ह्यातील भानखेडा गावाजवळील जंगलात घडली. या प्रकरणी फ्रेजरपुरा पोलिसांनी गुन्हा दाखल करून ५ जणांना अटक केली आहे.

काय घडलं नेमकं?

28 मार्च 2026 रोजी रात्री साडेआठ ते नऊच्या सुमारास पीडित तरुणी आणि तिचा मित्र दुचाकीवरून जात असतांना त्यांना ५ लोकांनी अडवलं, त्यांनतर लाथाबुक्यांनी मारहाण केली. पीडितेच्या मित्राच्या खिशातील १२० रुपये काढून घेतले, एवढेच नाही तर पीडितेवर अत्याचार करण्यात आला. याघटनेनंतर पीडितेची प्रकृती खालावली. उपचारासाठी तिला जिल्हा रुग्णालयात दाखल करण्यात आले. सध्या पीडितेची प्रकृती स्थिर असल्याची माहिती समोर आली आहे.

30 Mar 2026 08:55 AM (IST)

Stock Market Today: लाल रंगात उघडणार आजचा शेअर बाजार

India Share Market Update: मध्य पूर्वेत सुरु असलेल्या अमेरिका-इराण युद्धामुळे आणि कच्च्या तेलाच्या किमतींत वाढ होत असल्याने शेअर बाजारावर नकारात्मक परिणाम होत आहे. आज ३० मार्च रोजी भारतीय शेअर बाजाराचे प्रमुख निर्देशांक, सेन्सेक्स आणि निफ्टी ५०, घसरणीसह आणि लाल रंगात उघडण्याची शक्यता आहे. ज्यामुळे मागील आठवड्यातील तोटा आणखी वाढेल. गिफ्ट निफ्टीमधील ट्रेंड्स देखील भारतीय बेंचमार्क निर्देशांकासाठी गॅप-डाउन सुरुवातीचे संकेत देत आहेत. गिफ्ट निफ्टी, निफ्टी फ्युचर्सच्या मागील क्लोजपेक्षा जवळपास २६६ पॉइंट्सच्या सवलतीवर, २२,५५१ च्या पातळीवर व्यवहार करत होता.